Junagadh,તા.૨૭
જૂનાગઢની એન.બી. કાંબલીયા કન્યા વિદ્યાલય ખાતે ગત રોજ શાળા પ્રવેશોત્સવ કાર્યક્રમ યોજાયો હતો. આ કાર્યક્રમ દરમિયાન ધારાસભ્ય સંજય કોરડીયાએ દીકરીઓને આત્મનિર્ભર બનવાની અપીલ કરતું મજબૂત વક્તવ્ય આપ્યું હતું. આ વક્તવ્ય સોશિયલ મીડિયામાં ઝડપથી વાયરલ થઈ રહ્યું છે અને મહિલા સુરક્ષાના મુદ્દે ચર્ચાનો વિષય બન્યું છે.
શાળા પ્રવેશોત્સવ કાર્યક્રમમાં ધારાસભ્ય સંજય કોરડીયાએ કહ્યું હતું કે, “દીકરીઓને કોઈ હેરાન કરે તો ફેરવીને બે મારી દેવાની. આત્મરક્ષા માટે લડો, બાકીની જવાબદારી મારી.” તેમણે દીકરીઓને સ્પષ્ટ સંદેશ આપતાં જણાવ્યું હતું કે,”આપણે ઉભા હોઈએ અને ૫ ફૂટ નજીક કોઈ આવે તો તેને શોર્ટ લાગે, એવો શોટ મારવો જોઈએ, એવી તાકાત દીકરીઓની હોવી જોઈએ. ૫ ફૂટનું ડિસ્ટન્સ તો રાખવું જોઈએ.”
તેમણે કહ્યું હતું કે, “આપણે બહાર નીકળી ત્યારે એક વસ્તુ ધ્યાન રાખવાની કે આપણને જે નથી ગમતું એ વસ્તુ આપણી ટેરેટરીની અંદર આવે એટલે ફેરવીને બે મારી જ દેવાની, કોઈના બાપની ચિંતા નહીં કરવાની. એક વખત હિંમત કરશો તો તમારી નજીક આવતા કોઈ વિચાર કરશે અને દીકરીમાં એ હિંમત હોવી જ જોઈએ.”
ધારાસભ્યએ કહ્યું હતું કે, “તમને કોઈ હેરાન કરતું હોય, કોઈને કંઈ કહેવાની જરૂર નથી, ઉભા રહીને બે મારી લેવાની, બાકીની જવાબદારી મારી. આ ક્ષમતા દીકરીઓની અંદર હોવી જ જોઈએ. આ તાકાત દીકરીઓની અંદર હોવી જોઈએ.”
ધારાસભ્ય સંજયભાઈ કોરડીયાનું વક્તવ્ય સોશિયલ મીડિયામાં વાયરલ થયું છે. આ વક્તવ્યમાં મહિલાઓ અને દીકરીઓની સુરક્ષાને લઈને સમાજને એક મજબૂત સંદેશ આપવામાં આવ્યો છે. ધારાસભ્યના આ નિવેદનને સોશિયલ મીડિયા યુઝર્સ તરફથી ભારે પ્રતિસાદ મળી રહ્યો છે.
