પોલીસે હાઇવે પર ફસાયેલી બાઇક અને ટેન્કરને બાજુ પર ખસેડીને વાહનવ્યવહાર પૂર્વવત કરાવ્યો હતો
Banaskantha,તા. 27
બનાસકાંઠા જિલ્લાના સરહદી વિસ્તાર એવા અમીરગઢ પંથકમાંથી એક અત્યંત ગમખ્વાર અને ભયાનક માર્ગ અકસ્માત સામે આવ્યો છે. અમીરગઢ પોલીસ ચેકપોસ્ટ નજીક નેશનલ હાઇવે પર એક બાઇક અને ટેન્કર વચ્ચે કાળજું કંપાવી દેનારો અકસ્માત સર્જાયો હતો. અકસ્માત એટલો જોખમી અને ભયંકર હતો કે બાઇક ધડાકાભેર ટેન્કરના આગળના ભાગમાં ઘૂસી ગઈ હતી અને વ્હીલ વચ્ચે ખરાબ રીતે ફસાઈ ગઈ હતી. ટક્કરનો અવાજ સાંભળીને આસપાસના લોકો તેમજ ચેકપોસ્ટ પર હાજર પોલીસકર્મીઓ તાત્કાલિક મદદ માટે દોડી આવ્યા હતા.આ ગોઝારી દુર્ઘટનામાં બાઇક ચાલક યુવાનને શરીરે અને માથાના ભાગે અત્યંત ગંભીર ઇજાઓ પહોંચી હતી. લોહીલુહાણ હાલતમાં બાઇક ચાલકનું ઘટનાસ્થળે જ કરુણ અને કમકમાટીભર્યું મોત નીપજ્યું હતું. પોલીસે હાઇવે પર ફસાયેલી બાઇક અને ટેન્કરને બાજુ પર ખસેડીને વાહનવ્યવહાર પૂર્વવત કરાવ્યો હતો. મૃતક યુવકના શવને કબજે કરીને પીએમની કાર્યવાહી માટે અમીરગઢ સામુહિક આરોગ્ય કેન્દ્ર ખાતે મોકલી આપવામાં આવ્યો હતો. મરણજનાર યુવકની ઓળખ વિધિ કરતાં તે પાડોશી રાજ્ય રાજસ્થાનના ખારા ગામનો હોવાનું સામે આવ્યું છે.
અકસ્માત અંગેની પ્રાથમિક તપાસમાં સામે આવેલી વિગતો મુજબ, નેશનલ હાઇવે પર હાલ રોડ રિપેરિંગ અથવા ડાયવર્ઝનનું કામ ચાલી રહ્યું હતું. રોડની કામગીરીના કારણે હાઇવેના માર્ગને વન-વે કરવામાં આવ્યો હતો. સામસામેથી આવી રહેલા વાહનો એક જ રોડ પરથી પસાર થવાના કારણે બંને ચાલકો વાહન પરનો કાબૂ ગુમાવી બેઠા હતા અને આ ગમખ્વાર અકસ્માત સર્જાયો હતો. પોલીસે આ મામલે ટેન્કર ચાલક વિરૂદ્ધ ગુનો નોંધીને અકસ્માતના કારણો અંગે આગળની કાયદેસરની તપાસ હાથ ધરી છે.
