New Delhi તા, 20
નીધરલેન્ડ્સના એમસ્ટેલવીનમાં રમાઈ રહેલાં FIH હોકી વર્લ્ડ કપમાં ભારતીય પુરુષ હોકી ટીમે પાકિસ્તાનને 5-3 થી હરાવીને ટૂર્નામેન્ટના આગામી રાઉન્ડમાં પ્રભાવશાળી રીતે પ્રવેશ કરી લીધો છે. ભારતે સમગ્ર મેચ દરમિયાન શાનદાર તાલમેલ અને આક્રમક રમતનું પ્રદર્શન કર્યું હતું.
આ મહત્વપૂર્ણ વિજય સાથે ભારતે વર્લ્ડ કપના ઇતિહાસમાં પાકિસ્તાન સામેનો પોતાનો સૌથી મોટો વિજય પણ નોંધાવ્યો છે, જ્યારે બીજી તરફ આ શરમજનક પરાજયના કારણે પાકિસ્તાનની ટીમ માટે ટૂર્નામેન્ટની આગળની સફર આ તબક્કે જ પૂર્ણ થઈ ગઈ છે અને તેઓ બહાર થઈ ગયા છે.
મેચના પ્રથમ મિનિટથી જ ભારતીય ટીમે પાકિસ્તાનનાં ડિફેન્સ પર ભારે દબાણ બનાવીને મેચ પર પોતાની પકડ મજબૂત બનાવી લીધી હતી. મેચની પાંચમી જ મિનિટે ભારતને પેનલ્ટી કોર્નર મળ્યો હતો, જેના પર કેપ્ટન હરમનપ્રીત સિંહે પોતાનાં પરિચિત અંદાજમાં ડ્રેગ ફ્લિક દ્વારા બોલને નેટમાં મોકલીને ભારતનું ખાતું ખોલ્યું હતું.
ત્યાર બાદ 11મી મિનિટે મનદીપ સિંહ અને અભિષેક વચ્ચેનાં અદ્ભુત તાલમેલથી અભિષેકે શાનદાર ફીલ્ડ ગોલ કરીને ભારતને 2-0 ની પ્રારંભિક લીડ અપાવી હતી. બીજા ક્વાર્ટરમાં પણ આક્રમણ જાળવી રાખીને 21મી મિનિટે હરમનપ્રીતે વ્યક્તિગત બીજો અને ટીમ માટે ત્રીજો ગોલ નોંધાવ્યો હતો. જોકે, 22મી મિનિટે પાકિસ્તાનના હનાન શાહિદે વળતો પ્રહાર કરીને ભારત સામે પોતાનું પ્રથમ ગોલ ખાતું ખોલ્યું હતું.
બીજા ક્વાર્ટરના અંતિમ મિનિટોમાં બંને ટીમો વચ્ચે બરાબરીનો રોમાંચ જોવા મળ્યો હતો, જેમાં 24મી મિનિટે અભિષેકે અદ્ભુત 3ઉ સ્કિલ્સ અને દિલધડક ડ્રિબલિંગ સાથે પોતાનો બીજો ફીલ્ડ ગોલ કરીને સ્કોર 4-1 કરી દીધો હતો. પરંતુ તે જ મિનિટે પાકિસ્તાન તરફથી સુફિયાન ખાને પેનલ્ટી કોર્નરને ગોલમાં ફેરવીને સ્કોર 4-2 કર્યો, જેથી હાફ-ટાઇમ સુધી ભારતે 4-2 ની મજબૂત સરસાઈ જાળવી રાખી હતી.
હાફ-ટાઇમ પછી ત્રીજા ક્વાર્ટરમાં (34મી મિનિટે) સુખજીત સિંહ પર થયેલા ફાઉલના કારણે ભારતને પેનલ્ટી સ્ટ્રોક મળ્યો હતો, જેને હાર્દિક સિંહે સરળતાથી ગોલમાં ફેરવીને સ્કોર 5-2 કરી દીધો હતો. ચોથા ક્વાર્ટરમાં 46મી મિનિટે પાકિસ્તાનનાં હનાન શાહિદે ગોલ કરીને સ્કોર 5-3 કર્યો હતો, પરંતુ ભારતીય ડિફેન્સે આખરી સમય સુધી પાકિસ્તાની આક્રમણને નિષ્ફળ બનાવીને જીત સુનિશ્ચિત કરી હતી.
FIH હોકી વર્લ્ડ કપ જેવા મોટા મંચ પર આ બંને પરંપરાગત હરીફ ટીમો 16 વર્ષના લાંબા સમયગાળા બાદ (છેલ્લે 2010 નવી દિલ્હી વર્લ્ડ કપ પછી) પ્રથમ વખત સામસામે આવી હતી. 2014 અને 2023ના વર્લ્ડ કપમાં પાકિસ્તાન ક્વોલિફાય કરી શક્યું નહોતું, જ્યારે 2018માં બંને વચ્ચે મેચ થઈ ન હતી. આ ઐતિહાસિક મુકાબલામાં ભારતે 5-3 થી જીત મેળવીને વર્લ્ડ કપના ઇતિહાસમાં પાકિસ્તાન સામેનો પોતાનો સૌથી સર્વશ્રેષ્ઠ સ્કોર નોંધાવ્યો છે અને 16 વર્ષ બાદ પણ પોતાનો વિજયી સિલસિલો બરોબર જાળવી રાખ્યો છે.
ગ્રુપ-ડીમાંથી બીજા રાઉન્ડમાં ક્વોલિફિકેશન
આ મહત્વપૂર્ણ વિજય સાથે ભારતીય ટીમે કુલ 6 પોઈન્ટ મેળવીને પોતાના ગ્રુપ-ડીમાંથી ઇંગ્લેન્ડ બાદ બીજા ક્રમે રહીને આગળનાં રાઉન્ડ (ક્વોર્ટર-ફાઇનલ/બીજા તબક્કા) માટે ક્વોલિફાય કરી લીધું છે. ભારતે ટૂર્નામેન્ટની પોતાની પ્રથમ મેચમાં વેલ્સને 3-1 થી પરાજય આપ્યો હતો, જોકે બીજી મેચમાં ઇંગ્લેન્ડ સામે 2-4 થી હારનો સામનો કરવો પડ્યો હતો. હવે ભારત બીજા રાઉન્ડમાં નીધરલેન્ડ્સ અને આર્જેન્ટિના અથવા ન્યૂઝીલેન્ડ જેવી મજબૂત ટીમો સામે આત્મવિશ્વાસ સાથે મેદાનમાં ઉતરશે.
ભારતીય ટીમ 10 વર્ષથી પાકિસ્તાન સામે એક પણ મેચ હારી નથી
ભારતીય પુરુષ હોકી ટીમનો આંતરરાષ્ટ્રીય સ્તરે પાકિસ્તાન સામે દબદબો અભૂતપૂર્વ રહ્યો છે અને ભારતીય ટીમ છેલ્લાં 10 વર્ષથી પાકિસ્તાન સામે અજેય રહી છે. વર્ષ 2016ના સાઉથ એશિયન ગેમ્સની ફાઇનલ મેચ બાદ બંને દેશો વચ્ચે રમાયેલી કુલ 20 આંતરરાષ્ટ્રીય મેચોમાંથી ભારતે 18 મેચોમાં વિજય મેળવ્યો છે,
જ્યારે 2 મેચો ડ્રો પરિણમી છે. આ સમયગાળા દરમિયાન પાકિસ્તાનની ટીમ ભારતને એકપણ મેચમાં હરાવવામાં સફળ રહી નથી, જે ભારતીય હોકીના વર્ચસ્વને સ્પષ્ટપણે દર્શાવે છે.
