New Delhi તા, 20
ભારતીય ક્રિકેટ કંટ્રોલ બોર્ડ (BCCI) એ દુલીપ ટ્રોફી 2026-27ની ફાઇનલ મેચ બેંગલુરૂના સેન્ટર ઓફ એક્સેલન્સ (CoE) ના બદલે ચેન્નઈના એમ.એ. ચિદમ્બરમ સ્ટેડિયમમાં રમાડવાનો નિર્ણય કર્યો છે. આ નિર્ણયના કારણે હવે ક્રિકેટપ્રેમીઓ સ્ટેડિયમમાં જઈને આ રોમાંચક ફાઇનલ મેચનો આનંદ માણી શકશે. આ ફાઇનલ મુકાબલો 6 સપ્ટેમ્બરથી 10 સપ્ટેમ્બર દરમિયાન રમાશે. બેંગલુરૂના ઈજ્ઞઊ કેમ્પસમાં સરકારી નિયમોનાં કારણે સામાન્ય દર્શકોનાં પ્રવેશ પર પ્રતિબંધ હોવાથી BCCIએ આ મેચ ચેન્નઈ શિફ્ટ કરવી પડી છે.
BCCIના સેક્રેટરી દેવજિત સૈકિયાએ જણાવ્યું હતું કે દુલીપ ટ્રોફી એ આપણી ફર્સ્ટ-ક્લાસ ક્રિકેટની ખૂબ જ મહત્વપૂર્ણ અને જૂની ટુર્નામેન્ટ છે. આ ટુર્નામેન્ટમાં રમતનું સ્તર ઉચ્ચ કક્ષાનું હોય છે, તેથી અમે ઈચ્છતાં હતાં કે ચાહકોને સ્ટેડિયમમાં આવીને આ મેચ જોવાનો મોકો મળે. બેંગલુરૂના ગ્રાઉન્ડ પર દર્શકોની હાજરી અંગે ચોક્કસ નિયંત્રણો હતાં, જેનાં કારણે ફાઇનલ મેચને એવા સ્થળે ખસેડવી યોગ્ય લાગી જ્યાં ફેન્સ મોટી સંખ્યામાં હાજર રહીને મેચની મજા માણી શકે.
ફાઇનલ મેચ ચેન્નઈમાં રમાશે, પરંતુ તે પહેલાંની તમામ મેચો-એટલે કે ક્વાર્ટર-ફાઇનલ અને સેમિફાઇનલ-બેંગલુરૂના ઈજ્ઞઊ ગ્રાઉન્ડ પર દર્શકો વગર (બંધ બારણે) જ રમાડવામાં આવશે. આ ટુર્નામેન્ટની શરૂઆત 23 ઓગસ્ટથી થઈ રહી છે, જેમાં ક્વાર્ટર ફાઇનલમાં ઈસ્ટ ઝોન સામે નોર્થ ઈસ્ટ ઝોન અને નોર્થ ઝોન સામે વેસ્ટ ઝોનની ટક્કર થશે. જ્યારે ગત વર્ષની ચેમ્પિયન સેન્ટ્રલ ઝોન અને રનર-અપ સાઉથ ઝોનની ટીમ સીધી સેમિ-ફાઇનલમાં પ્રવેશ કરી ચૂકી છે, જે મેચો 30 ઓગસ્ટથી શરૂ થશે.
ગયા વર્ષે આખી ટુર્નામેન્ટ બંધ બારણે રમાઈ હોવાથી ફેન્સમાં થોડી નિરાશા હતી, જેને ધ્યાનમાં રાખીને આ વખતે BCCIએ બ્રોડકાસ્ટિંગનો વ્યાપ પણ વધાર્યો છે.
આ સીઝનની તમામ મેચોનું લાઈવ સ્ટ્રીમિંગ ઉપલબ્ધ રહેશે, જ્યારે એક ક્વાર્ટર ફાઇનલ, એક સેમિફાઇનલ અને ફાઇનલ મેચનું ટીવી પર લાઈવ પ્રસારણ કરવામાં આવશે. નોંધનીય છે કે ગયા વર્ષે સાઉથ ઝોનને હરાવીને સેન્ટ્રલ ઝોનની ટીમ ચેમ્પિયન બની હતી અને આ વખતે તેઓ પોતાનાં ટાઇટલનો બચાવ કરવા મેદાનમાં ઉતરશે.
