New Delhi, તા.13
વર્લ્ડ કપ જીત્યા પછી, ટીમ ઈન્ડિયા હવે ઉજવણી કરતાં પડકારોનો સામનો વધારે કરશે. આગામી 12 મહિના ભારતીય ક્રિકેટ માટે અગ્નિ પરીક્ષાની રહેશે. સમયપત્રક એટલું બીઝી હશે કે ખેલાડીઓની ફિટનેસ, વર્કલોડ મેનેજમેન્ટ અને ટીમ રચના મહત્વપૂર્ણ રહેશે.
ભારતીય ટીમ વર્લ્ડ કપ જીત્યા પછી આરામ કરી શકશે નહીં. ક્રિકબઝ અનુસાર, આગામી વર્ષના બીસીસીઆઈના શેડ્યૂલમાં વારંવાર વિદેશી પ્રવાસો અને મલ્ટી-ફોર્મેટ શ્રેણીનો સમાવેશ થાય છે. વધારાની મેચો માટે ચર્ચા ચાલી રહી છે, જેનાથી શેડ્યૂલને વધુ વ્યસ્ત બની શકે છે.
ભારતીય ટીમ IPL પછી જૂનમાં અફઘાનિસ્તાન સામેની ઘરઆંગણે શ્રેણી સાથે શરૂઆત કરશે, જેમાં એક ટેસ્ટ અને ત્રણ ODI હશે. ત્યારબાદ ટીમ જુલાઈમાં ઇંગ્લેન્ડનો પ્રવાસ કરશે. ઇંગ્લેન્ડ પહોંચતા પહેલા આયર્લેન્ડમાં સંભવિત ત્રણ મેચની T20 શ્રેણી અંગે પણ ચર્ચા ચાલી રહી છે.
ઈંગ્લેન્ડ પછી, ભારતીય ટીમ શ્રીલંકાના પ્રવાસે જશે, જ્યાં બે ટેસ્ટ પહેલાથી જ નક્કી છે. શ્રીલંકાએ ભારત સામે ત્રણ ટી20 મેચોની વધારાની શ્રેણી માટે વિનંતી કરેલ છે.ગયા વર્ષે ચક્રવાત ‘દિતવાહ’થી પ્રભાવિત વિસ્તારો માટે રાહત ભંડોળ એકત્ર કરવાના ઉદ્દેશ્યથી આ શ્રેણીનું આયોજન કરી શકાય છે.
સપ્ટેમ્બર મહિનો ભારતીય ક્રિકેટ માટે ખૂબ જ વ્યસ્ત રહેવાનો છે. અફઘાનિસ્તાન વિરૂધ્ધ ત્રણ મેચની T20I શ્રેણી ઉપરાંત, બાંગ્લાદેશનો પ્રવાસ પણ છે. જોકે, આ શ્રેણી ભારત સરકારની મંજૂરી પર નિર્ભર રહેશે. દરમિયાન, ઝિમ્બાબ્વે અને વેસ્ટ ઇન્ડીઝ સામેની શ્રેણી પણ રમવાની છે.
એશિયન ગેમ્સ અને ઘરેલુ શ્રેણી એકસાથેઃ આ બધા વચ્ચે, સપ્ટેમ્બર અને ઓક્ટોબરમા એશિયન ગેમ્સ પણ જાપાનના નાગોયામાં યોજાવાની છે, જ્યાં ક્રિકેટ T20 ફોર્મેટમાં રમાશે અને ભારત ગોલ્ડ મેડલ જીતવા માટે રમશે. આ સ્થિતિમાં, ભારતે બે અલગ-અલગ ટીમો ઉતારવી પડી શકે છેઃ એક એશિયન ગેમ્સ માટે અને બીજી વેસ્ટ ઇન્ડીઝ સામેની ઘરઆંગણે શ્રેણી માટે.
સૌથી વધુ મેચ રમનારા ખેલાડીઓ
2020 થી, મોહમ્મદ સિરાજ ભારત માટે સૌથી વધુ આંતરરાષ્ટ્રીય મેચ રમનારા ખેલાડીઓની યાદીમાં ટોચ પર છે. તેમણે આ સમયગાળા દરમિયાન 45 ટેસ્ટ રમી છે. તેમના પછી કોહલી (39), અને જાડેજા અને શુભમન (37-37) આવે છે.
ફાસ્ટ બોલરો પર સૌથી વધુ બોજ
2023 ની શરૂઆતથી, ભારતીય બોલરોમાં, જાડેજાએ સૌથી વધુ ઓવર (830) ફેંકી છે. ઝડપી બોલરોમાં, મોહમ્મદ સિરાજે 683.5 ઓવર ફેંકી છે, જ્યારે બુમરાહે 560.1 ઓવર ફેંકી છે.
સતત મેચ રમવાનું દબાણ
2023 પછી, સિરાજે ભારત માટે 57 આંતરરાષ્ટ્રીય મેચ રમી છે અને 100 થી વધુ વિકેટો લીધી છે. આટલી મોટી સંખ્યામાં મેચ રમવાને કારણે, તેને ટીમનો અંતિમ ‘વર્કહોર્સ’ માનવામાં આવે છે.
ટેસ્ટ ક્રિકેટમાં ભારે વર્કલોડ
તેની ટેસ્ટ કારકિર્દીમાં, સિરાજે 45 મેચોમાં 1,160 થી વધુ ઓવર ફેંકી છે, જે તેને વિશ્વના સૌથી મહેનતુ ઝડપી બોલરોમાં સ્થાન આપે છે.
રોટેશન આવશ્યક છે
BCCI પસંદગીની શ્રેણી માટે ઝડપી બોલરોને આરામ આપે છે. ઉદાહરણ તરીકે, જસપ્રીત બુમરાહને મોટી ટેસ્ટ શ્રેણી અને વૈશ્વિક ટુર્નામેન્ટ માટે ફિટ રહેવા માટે ટૂંકી શ્રેણી દરમિયાન વારંવાર આરામ આપવામાં આવ્યો છે.
ટીમ ઈન્ડિયાની મુખ્ય શ્રેણી
► જૂન 2026ઃ અફઘાનિસ્તાન (ભારતમાં) – 1 ટેસ્ટ, 3 વનડે
► જૂન એન્ડઃ આયર્લેન્ડ (સંભવિત) – 3 ટી20આઈ
► જુલાઈ 2026ઃ ઇંગ્લેન્ડનો પ્રવાસ – 3 વનડે, 5 ટી20 મેચ
► જુલાઈ-ઓગસ્ટ 2026ઃ શ્રીલંકા પ્રવાસ – 2 ટેસ્ટ (+ 3 ટી20 પ્રસ્તાવિત)
► સપ્ટેમ્બર 2026ઃ અફઘાનિસ્તાન (યુએઈ) – 3 ટી20 મેચ
► સપ્ટેમ્બર 2026ઃ બાંગ્લાદેશ પ્રવાસ – 3 વનડે, 3 ટી20 મેચ (સરકારની મંજૂરીને આધીન)
► સપ્ટેમ્બર 2026ઃ ઝિમ્બાબ્વે પ્રવાસ (સંભવિત) – 3 ટી20 મેચ
► સપ્ટેમ્બર-ઓક્ટોબર 2026ઃ એશિયન ગેમ્સ, નાગોયા (જાપાન) ઝ20 ફોર્મેટ
► સપ્ટેમ્બર-ઓક્ટોબર 2026ઃ વેસ્ટ ઈન્ડિઝનો ભારત પ્રવાસ (3 ODI, 5 T20I)
► ઓક્ટોબર-નવેમ્બર 2026ઃ ન્યુઝીલેન્ડનો પ્રવાસ – 5 વનડે, 5 ટી20, 2 ટેસ્ટ
► ડિસેમ્બર 2026ઃ શ્રીલંકાનો ભારત પ્રવાસ – 3 વનડે, 3 ટી20 મેચ
► જાન્યુઆરી-ફેબ્રુઆરી 2027ઃ બોર્ડર-ગાવસ્કર ટ્રોફી (ભારત) ટેસ્ટ શ્રેણી
