જોડિયા તાલુકાના જશાપર ગામના ખેડૂત પ્રૌઢને રૂ.૨૯ લાખની લોન સામે લાખોનું રાક્ષસી વ્યાજ વસૂલ્યાનો આક્ષેપ
(નયના દવે દ્વારા)
Jamnagar તા.૨૯ઃ
Jamnagar જોડિયા તાલુકાના જશાપર ગામના ૫૬ વર્ષીય ખેડૂતે લતીપર ગામના બે શખ્સો સામે લાયસન્સ વિના નાણાં ધીરધાર કરી ઊંચા વ્યાજે રકમ વસૂલવા તેમજ ધાકધમકી આપ્યાની ફરિયાદ નોંધાવી છે. ફરિયાદના આધારે પોલીસે ભારતીય ન્યાય સંહિતાની કલમ ૩૦૮(૨), ૩૫૧(૧), ૫૪ તથા ગુજરાત મનીલેન્ડર્સ અધિનિયમની સંબંધિત કલમો હેઠળ ગુનો નોંધ્યો છે.ફરિયાદી નરભેરામ ડાયાભાઈ પનારા ખેતીકામ કરે છે. ફરિયાદ મુજબ, વર્ષ ૨૦૨૩માં પુત્રના લગ્ન તથા રાજકોટમાં મકાન ખરીદવા માટે નાણાંની જરૂર પડતાં લતીપરના જનકભાઈ જીલુભાઈ ડાંગર પાસેથી પ્રથમ રૂ.૫ લાખ ૩ ટકા માસિક વ્યાજે લીધા હતા. તેના બદલામાં બેંકનો કોરો ચેક આપ્યો હતો. બાદમાં વધુ રૂ.૭ લાખ અને ત્યારપછી રૂ.૮ લાખ લઈ કુલ રૂ.૨૦ લાખ લીધા હતા અને અલગ અલગ કોરા ચેક આપ્યા હતા.
ફરિયાદીનો આક્ષેપ છે કે, રૂ.૨૦ લાખની મૂળ રકમ સામે વર્ષો દરમિયાન વ્યાજ પેટે કુલ રૂ.૧૦.૮૯ લાખ ચૂકવ્યા હોવા છતાં વધુ વ્યાજની માંગણી કરવામાં આવી હતી. વર્ષ ૨૦૨૫માં જ રૂ.૩૬ લાખ જેટલું વ્યાજ રોકડમાં તથા રૂ.૫૮ હજાર ગુગલ પે મારફતે ચૂકવ્યાનો ફરિયાદમાં ઉલ્લેખ છે. વર્ષ ૨૦૨૬માં પાંચ મહિના દરમિયાન રૂ.૨૦ લાખ જેટલું વ્યાજ ચૂકવ્યું હોવાનો તથા ત્રણ સોનાની વીંટી અને જમીનની ખાતાવહી પણ લઈ લેવાયાનો આક્ષેપ કરવામાં આવ્યો છે.દરમિયાન બીજા આરોપી રાહુલભાઈ બચુભાઈ ડાંગર પાસેથી પણ ફરિયાદીએ રૂ.૯ લાખ ૩ ટકા માસિક વ્યાજે લીધા હતા. તેના બદલામાં સેન્ટ્રલ બેંકના કોરા ચેક આપ્યા હતા.
ફરિયાદ મુજબ, આ રકમના વ્યાજ પેટે આશરે રૂ.૩.૫ લાખ ગુગલ પે તથા રોકડમાં ચૂકવ્યા બાદ મૂળ રકમ પણ પરત કરી દેવામાં આવી હતી.ત્યારબાદ વર્ષ ૨૦૨૬માં ફરી રૂ.૯ લાખ લીધા હોવાનું અને આરોપીએ વ્યાજ વધ્યું હોવાનું કહી એક દિવસના રૂ.૨૦ હજાર લેખે ત્રણ મહિના સુધી કુલ રૂ.૧૮ લાખ વ્યાજ તરીકે વસૂલ્યાનો ફરિયાદમાં આક્ષેપ છે. ફરિયાદીનો વધુ આક્ષેપ છે કે, પરિવારના સભ્યોને નુકસાન પહોંચાડવાની ધમકી આપી વધુ રકમની ઉઘરાણી કરવામાં આવી હતી તેમજ રૂ.૯ લાખ હાથઉછીના લીધા હોવાનું બળજબરીપૂર્વક લખાણ કરાવવામાં આવ્યું હતું.
ફરિયાદમાં વધુમાં જણાવ્યા મુજબ, બંને શખ્સોએ અગાઉ લીધેલા કોરા ચેકમાં પોતાની રીતે મોટી રકમો ભરી બેંકમાં રજૂ કરતાં ચેક પરત ફર્યા હતા અને ત્યારબાદ તેમના વકીલ મારફતે ફરિયાદીને નોટિસો મોકલવામાં આવી હતી. મૂળ રકમ કરતાં વધુ વ્યાજ ચૂકવી દીધા હોવા છતાં ધાકધમકી આપી વધુ રકમની ઉઘરાણી કરવામાં આવતી હોવાના આક્ષેપ સાથે ફરિયાદ નોંધાવવામાં આવી છે.
