Rajkot, તા.6
રાજકોટવાસીઓ માટે છેલ્લા ઘણા વર્ષોથી આશિર્વાદરૂપ અને જીવાદોરી સમાન બનેલી સરકારની ‘સૌની’ યોજના થકી ફરી એક વખત ભરશિયાળે શહેરનાં મુખ્ય બે પાણીનાં સ્ત્રોત એવા આજી-1 અને ન્યારી-1 ડેમ છલકાય જવા પામ્યા છે અને આજી-1 તો ઓવરફ્લો પણ થવા લાગ્યા હતો.
અત્રે ઉલ્લેખનીય છે કે, 29 ફૂટની સપાટી ધરાવતો અને 917 એમસીએફટી પાણીની સંગ્રહ ધરાવતા આજી-1 ડેમમાં છેલ્લા એકાદ માસથી આરએમસીની ડિમાન્ડ મુજબ રાજકોટ સિંચાઇ વિભાગની સૌની યોજના અંતર્ગત નર્મદા નીર ઠાલવે છે અને ડેમમાં સતત નવું પાણી આવતા આજે બપોરે ભરશિયાળે આજી-1 ઓવરફ્લો થઇ ગયો હતો.
રાજકોટ સિંચાઇ વિભાગના ઇજનેરી સૂત્રોના જણાવ્યા મુજબ આજીમાં મહિના દિવસથી સૌની યોજનાનું પાણી ઠલવાય છે અને આજ સુધીમાં ડેમમાં 576 એમસીએફટી પાણી ઠલવાય ચૂક્યું છે ત્યારે આજે બપોરે 917 એમસીએફટીની સંગ્રહ ક્ષમતાવાળા આજીમાં 890 એમસીએફટી જેટલું પાણી ઠલવાઇ જતાં ડેમ ઓવરફ્લો થવા લાગ્યો હતો.
ડેમની સપાટી 28.50 ફૂટ ઉપર પહોંચી ગઇ હતી, હજુ આજ સાંજ સુધી ડેમમાં નવા નીર ઠાલવવામાં આવનાર છે અને આવતીકાલથી અથવા આજ મોડી રાત્રીથી ડેમમાં પાણી ઠાલવવાનું બંધ કરવામાં આવનાર છે તેમ સિંચાઇ વિભાગનાં ઇજનોરેએ જણાવ્યું હતું.
આ ઉપરાંત આજ રોજ આજીની સાથોસાથ રાજકોટનો ન્યારી-1 ડેમ પણ છલકાય ગયો છે. સિંચાઇ વિભાગનાં જણાવ્યા મુજબ 25 ફૂટે છલકાતો અને 1248 એમસીએફટી પાણીની સંગ્રહ સમતા ધરાવતા ન્યારી-1 ડેમમાં આજ સુધીમાં 609 એમસીએફટી નર્મદાનીર સિંચાઇ વિભાગે ઠાલવી દીધા છે. અને આજે બપોરે ન્યારી-1ની સપાટી 24.76 ફૂટ ઉપર પહોંચી ગઇ હતી અને ડેમમાં 1155 એમસીએફટી પાણીનો સંગ્રહ ડેમમાં થઇ ગયો છે અને બપોરે ન્યારી-1 પાણી છલકાય ગયો હતો.
સિંચાઇ વિભાગમાં ઇજનેરોનાં જણાવ્યા મુજબ ન્યારી-1માં હજુ સંભવત: એકાદ સપ્તાહ પાણી છોડવાનું ચાલુ રાખવામાં આવશે. સિંચાઇ વિભાગે એવું પણ જણાવેલ હતું કે હજુ પણ આરએમસી ઉનાળા દરમિયાન વધુ પાણીની ડિમાન્ડ કરશે તો અમારી ફરી પાણી છોડવાની પૂરતી તૈયારી છે. આમ ચાલુ વર્ષે પણ આવતા ચોમાસા સુધી રાજકોટવાસીઓને પીવાના પાણીની કોઇ સમસ્યા રહેશે નહીં તે નક્કી છે.
