Mehsana,તા.૧૨
વિસનગર એપીએમસી ખાતે રાજ્યપાલ આચાર્ય દેવવ્રતની અધ્યક્ષતામાં પ્રાકૃતિક કૃષિ પરિસંવાદનું આયોજન કરવામાં આવ્યું હતું. કાર્યક્રમમાં મોટી સંખ્યામાં ખેડૂતો જોડાયા હતા અને પ્રાકૃતિક ખેતીના વિવિધ પાસાં અંગે માર્ગદર્શન મેળવ્યું હતું.
પરિસંવાદ દરમિયાન રાજ્યપાલ આચાર્ય દેવવ્રતે ખેડૂતો સાથે પ્રાકૃતિક ખેતીના ફાયદા અને તેની વ્યવહારુ પદ્ધતિઓ અંગે વિસ્તૃત સંવાદ કર્યો હતો. તેમણે ઓછા ખર્ચે ખેતી કરીને ઉત્પાદન વધારવા તેમજ ખેતીમાં થતા બિનજરૂરી ખર્ચને ઘટાડવા પર ભાર મૂક્યો હતો. રાજ્યપાલે પોતાના અનુભવનો ઉલ્લેખ કરતા કહ્યું હતું કે રાસાયણિક ખેતીમાં એક એકર પાછળ અંદાજે રૂ.૨૦ હજારનો ખર્ચ થાય છે, જ્યારે પ્રાકૃતિક ખેતીમાં આ ખર્ચ આશરે રૂ.૨ હજાર સુધી રહી શકે છે. તેમના જણાવ્યા મુજબ યોગ્ય પદ્ધતિથી પ્રાકૃતિક ખેતી કરવામાં આવે તો શરૂઆતથી જ સારું ઉત્પાદન મેળવી શકાય છે અને સમય જતાં જમીનની ગુણવત્તામાં સુધારો થઈ શકે છે.
રાજ્યપાલે જણાવ્યું હતું કે રાસાયણિક ખાતરો અને જંતુનાશકોના અતિશય ઉપયોગથી જમીનની ફળદ્રુપતા ઘટી રહી છે. જમીનમાં રહેલા સૂક્ષ્મ જીવાણુઓ અને અળસિયાનો નાશ થવા ઉપરાંત પક્ષીઓની કેટલીક પ્રજાતિઓ પણ ઘટી રહી છે. વરસાદી પાણી જમીનમાં પૂરતા પ્રમાણમાં ન ઉતરવાથી પૂર અને દુષ્કાળ જેવી સ્થિતિ સર્જાવા પાછળ પણ જમીનની બદલાયેલી સ્થિતિ એક મહત્વનું કારણ હોવાનું તેમણે જણાવ્યું હતું.
કાર્યક્રમમાં જળ સંરક્ષણ તથા ગાય આધારિત પ્રાકૃતિક કૃષિના વિવિધ લાભો અંગે પણ ચર્ચા કરવામાં આવી હતી. ખેડૂતોના પ્રશ્નો સાંભળીને તેમના નિરાકરણ માટે માર્ગદર્શન આપવામાં આવ્યું હતું. પ્રાકૃતિક ખેતીને માત્ર ખેતીની પદ્ધતિ નહીં પરંતુ જમીન, પાણી અને પર્યાવરણના સંરક્ષણ સાથે જોડાયેલી વિચારધારા તરીકે રજૂ કરવામાં આવી હતી. ખેડૂતોને રસાયણમુક્ત, સ્વાસ્થ્યવર્ધક અને ટકાઉ ખેતી તરફ આગળ વધવા માટે પ્રોત્સાહિત કરવામાં આવ્યા હતા.
પરિસંવાદમાં સાંસદ હરિ પટેલ સહિત સ્થાનિક આગેવાનો અને મોટી સંખ્યામાં ખેડૂતબંધુઓ ઉપસ્થિત રહ્યા હતા. કાર્યક્રમ દરમિયાન ખેડૂતોને પ્રાકૃતિક કૃષિના વિવિધ પાસાં અંગે માહિતી મળી હતી અને ખેતીને વધુ ટકાઉ તથા ખર્ચ-અસરકારક બનાવવાના માર્ગો અંગે ચર્ચા થઈ હતી. આ પ્રસંગે મંત્રી ઋષિકેશ પટેલે જણાવ્યું હતું કે વડાપ્રધાન નરેન્દ્ર મોદી અને રાજ્યપાલ આચાર્ય દેવવ્રતના માર્ગદર્શન હેઠળ ગુજરાતમાં પ્રાકૃતિક ખેતીને પ્રોત્સાહન આપવામાં આવી રહ્યું છે. તેમના જણાવ્યા મુજબ રાસાયણિક ખાતરોના વધુ પડતા ઉપયોગથી જમીનની ફળદ્રુપતા ઉપરાંત આરોગ્ય અને પર્યાવરણ સામે પણ પડકારો ઊભા થયા છે. તેમણે ખેડૂતો અને યુવાઓને પશુપાલન સાથે પ્રાકૃતિક ખેતી અપનાવવા અપીલ કરી હતી. પોતાની જમીનના નાના ભાગથી પણ પ્રાકૃતિક ખેતીની શરૂઆત કરી શકાય છે તેમ તેમણે જણાવ્યું હતું.
