પાવા નગરની પવિત્ર ભૂમિ પર આયોજિત આ કાર્યક્રમમાં મુખ્યમંત્રીએ વિરોધ પક્ષો પર આકરા પ્રહારો કર્યા હતા
Lucknow,તા.૨
ઉત્તર પ્રદેશના મુખ્યમંત્રી યોગી આદિત્યનાથે કુશીનગરમાં એક જનસભા દરમિયાન ૪૨૪ કરોડથી વધુના ખર્ચે સાકાર થનારા ૨૭૮ વિકાસ કાર્યોનું લોકાર્પણ અને શિલાન્યાસ કરીને જિલ્લાને પ્રગતિની નવી ભેટ આપી છે.
અયોધ્યામાં ભવ્ય રામ મંદિરના નિર્માણ બાદ તમકુહી રાજ અને પાવા નગરની પવિત્ર ભૂમિ પર આયોજિત આ કાર્યક્રમમાં મુખ્યમંત્રીએ વિરોધ પક્ષો પર આકરા પ્રહારો કર્યા હતા. તેમણે અગાઉની સરકારોના સમયમાં રહેલી અરાજકતા અને માફિયા શાસનનો અંત આણવાની પોતાની સરકારની સિદ્ધિઓ ગણાવી હતી. આ સાથે જ તેમણે સ્થાનિક લોકપ્રતિનિધિઓની માંગ સ્વીકારીને ઐતિહાસિક ક્ષેત્ર ’ફાઝિલનગર’નું નામ બદલીને ’પાવાગઢ’ કરવાની સત્તાવાર જાહેરાત કરી હતી.મુખ્યમંત્રીએ કડક શબ્દોમાં જણાવ્યું કે, “અમારી સરકારમાં મચ્છર અને માફિયા બંનેનો સફાયો કરવામાં આવ્યો છે, જેનાથી બીમારી અને ગુનાખોરી બંને જડમૂળથી ખતમ થઈ ગયા છે.”
ભૂતકાળની પરિસ્થિતિને યાદ કરતા મુખ્યમંત્રી યોગી આદિત્યનાથે જણાવ્યું કે, આશરે નવ-દસ વર્ષ પહેલા કુશીનગર પોતાની ઓળખ અને ગંભીર બીમારીઓના સંકટ સામે ઝઝૂમી રહ્યું હતું. એ સમયે અહીં ખનન માફિયા, રેતી માફિયા અને ’જંગલ રાજ’નો ભારે આતંક હતો. આજની ૨૫ વર્ષથી ઓછી ઉંમરની યુવા પેઢીએ કદાચ એ સમયનો ભય અને અરાજકતા જોયા પણ નહીં હોય. આ ઉપરાંત, ઈન્સેફ્લાઈટીસ (મગજનો તાવ) જેવી જીવલેણ બીમારી દર વર્ષે નિર્દોષ બાળકોના જીવ લેતી હતી અને સમગ્ર આરોગ્ય પ્રણાલી સંપૂર્ણપણે ભાંગી પડી હતી.
સીએમ યોગીએ ઉમેર્યું કે અગાઉના શાસનમાં ખેડૂતોની સ્થિતિ અત્યંત દયનીય હતી. શેરડીના વેચાણ માટેની પર્ચીઓ પણ સરળતાથી મળતી નહોતી અને જો મળે તો વજનમાં છેતરપિંડી થતી હતી. વિરોધ પક્ષોને આડે હાથ લેતા તેમણે કહ્યું કે, કોંગ્રેસે આઝાદી પછી લાંબા સમય સુધી રામ મંદિરનું નિર્માણ થવા ન દીધું અને સમાજવાદી પાર્ટી તો જાહેર રામદ્રોહી છે. તેમણે ઈતિહાસની યાદ અપાવતા કહ્યું કે, ૪૯૮ વર્ષ પહેલા એક વિદેશી આક્રમણખોરે મંદિર તોડ્યું હતું, પરંતુ કેન્દ્ર અને રાજ્યની ડબલ એન્જિન ભાજપ સરકાર આવ્યા પછી જ રામભક્તોનો આ વર્ષો જૂનો સંકલ્પ પૂરો થઈ શક્યો છે.મુખ્યમંત્રીએ જણાવ્યું કે, વર્ષ ૨૦૨૨ પહેલા તમકુહીરાજ અને ફાઝિલનગરના નામે માત્ર રાજકીય મજાક જ થતી હતી. તેમણે મંચ પરથી જાહેરાત કરી કે ફાઝિલનગરના ધારાસભ્ય અને સાંસદની રજૂઆતના આધારે સરકારે પુનઃનામકરણની દરખાસ્ત તૈયાર કરી લીધી છે. હવે આ વિસ્તાર ફાઝિલનગર તરીકે નહીં, પરંતુ ભગવાન મહાવીરના પવિત્ર નામ સાથે જોડીને સત્તાવાર રીતે ’પાવાગઢ’ તરીકે નવી ઓળખ મેળવશે.
