દરેડમાં તીનપત્તી રમતા પાંચ ઝડપાયા, શિવનગરમાં ત્રણ મહિલા સહિત પાંચ ઝડપાયા; બંને દરોડામાં રૂ.૧,૧૨,૯૬૦નો મુદ્દામાલ કબજે
(નયના દવે દ્વારા)
Jamnagar તા.૮
જામનગર શહેરમાં જાહેરમાં ગંજીપત્તા વડે જુગાર રમતા શખ્સો સામે પોલીસે બે અલગ-અલગ સ્થળે દરોડા પાડી કુલ ૧૦ શખ્સોને ઝડપી પાડ્યા હતા. દરેડ જીઆઈડીસીમાં પંચકોશી બી ડિવિઝન પોલીસે તીનપત્તીનો જુગાર રમતા પાંચ શખ્સોને ઝડપી રૂ.૧૧,૨૧૦ની રોકડ તથા ગંજીપત્તાના પાનાં કબજે કર્યા હતા, જ્યારે હરીયા કોલેજ પાછળ શિવનગરમાં લોકલ ક્રાઇમ બ્રાન્ચે ત્રણ મહિલા સહિત પાંચ શખ્સોને ઝડપી રૂ.૧,૦૧,૭૫૦નો મુદ્દામાલ કબજે કર્યો હતો.
દરેડ જીઆઈડીસીના ગૌશાળા સર્કલથી આગળ પ્રથમ શેરીમાં પ્લોટ નં.૪૫૧૦ની આગળ કરંજના ઝાડ નીચે લાઈટના અજવાળામાં કેટલાક શખ્સો તીનપત્તી રોન-પોલીસનો જુગાર રમતા હોવાની બાતમીના આધારે પંચકોશી બી ડિવિઝન પોલીસે દરોડો પાડ્યો હતો. પોલીસે ભુપેન્દ્ર લક્ષ્મીનારાયણ જાટવ (ઉ.વ.૨૭), સોનુ રામસ્વરૂપ જાટવ (ઉ.વ.૨૪), સંતોષ મેહરબાનસિંહ જાટવ (ઉ.વ.૩૧), રાજેન્દ્ર ધનશ્યામ જાટવ (ઉ.વ.૩૨) અને સુરેશ ભુપતભાઈ ભીલ (ઉ.વ.૩૦)ને ઝડપી પાડ્યા હતા. પોલીસ ફરિયાદ મુજબ તમામ શખ્સો જામનગરમાં અલગ-અલગ સ્થળે મજૂરી કામ કરતા હતા.
પોલીસે આરોપીઓની અંગઝડતીમાંથી રૂ.૧૦,૮૫૦ની રોકડ તેમજ સ્થળ પરથી રૂ.૩૬૦ અને ગંજીપત્તાના ૩૭ પાનાં મળી કુલ રૂ.૧૧,૨૧૦નો મુદ્દામાલ કબજે કર્યો હતો. આ મામલે પાંચેય સામે જુગારધારા કલમ ૧૨ મુજબ ગુનો નોંધવામાં આવ્યો છે. બીજી તરફ જામનગરના હરીયા કોલેજ પાછળ શિવનગર શેરી નં.૨માં જાહેરમાં ગંજીપત્તા વડે જુગાર રમાતો હોવાની બાતમીના આધારે લોકલ ક્રાઇમ બ્રાન્ચે દરોડો પાડ્યો હતો. દરોડા દરમિયાન હરભમભાઈ જીવણભાઈ નરા ચારણ, જીવણભાઈ હરભમભાઈ નરા ચારણ, દિવ્યાબેન ખીમજીભાઈ કરંગીયા, લતાબેન દિનેશભાઈ વિઠલાપરા અને માયાબેન જીતેન્દ્રભાઈ સુમરીયાને ઝડપી પાડવામાં આવ્યા હતા. ઝડપાયેલા પાંચ પૈકી ત્રણ મહિલાઓ છે.
એલસીબીએ સ્થળ પરથી રૂ.૪૧,૭૫૦ની રોકડ, ગંજીપત્તાના પાનાં તથા રૂ.૬૦,૦૦૦ની કિંમતનું એક મોટરસાયકલ મળી કુલ રૂ.૧,૦૧,૭૫૦નો મુદ્દામાલ કબજે કર્યો હતો. આ કાર્યવાહી રાજકોટ રેન્જના નિર્લિપ્ત રાયના માર્ગદર્શન અને જામનગર જિલ્લા પોલીસવડા ડો. રવિ મોહન સૈનીની સૂચના હેઠળ એલસીબી પીઆઈ વી.બી. ચૌધરીના માર્ગદર્શન હેઠળ પો.સ.ઈ. એમ.વી. ભાટીયા તથા સ્ટાફ દ્વારા કરવામાં આવી હતી. આમ, પોલીસે જુગારના બંને દરોડામાં કુલ ૧૦ શખ્સોને ઝડપી પાડીને રૂ.૧,૧૨,૯૬૦નો મુદ્દામાલ કબજે કર્યો છે અને તમામ સામે કાયદેસરની કાર્યવાહી હાથ ધરી છે.
