છેલ્લા કેટલાક સમયથી ડિઝીટલ એરેસ્ટ બાબતે લોકોને જાગૃત કરવા છતાં લોકો સાઇબર માફિયાઓનો શિકાર બની રહ્યા છે
Vadodara, તા.૮
વડોદરાના એક વૃદ્ધને ડિજિટલ એરેસ્ટ કર્યા બાદ ૧૨.૫૨ લાખ રૂપિયા ડરાવી ધમકાવીને અલગ અલગ ખાતામાં ટ્રાન્સફર કરાવી લીધા હતા. આ સાયબર માફીયાઓને પોલીસે ઝડપી પાડીને તેમની પાસેથી પૂરેપૂરી રકમ રિકવર કરી વૃદ્ધને સહી સલામત પરત કરી દેવામાં આવી છે.વડોદરા શહેરના વિવિધ વિસ્તારોમાં રહેતા વૃદ્ધો સહિતના લોકોને સાયબર માફિયા દ્વારા ડિજિટલ એરેસ્ટ કરીને લાખો રૂપિયા પડાવી લેવામાં આવતા હોય છે. આ ઠગો દ્વારા લોકોને તમારા વિદેશ જઈ રહેલા પાર્સલમાંથી ગેરકાયદે વસ્તુ નીકળ્યું છે. જેથી તમારી ધરપકડ કરવામાં આવશે તેવી રીતે ડરાવીને રૂપિયા પડાવવામાં આવે છે. ત્યારે વડોદરા શહેરમાં રહેતા એક વૃદ્ધ જેમનું નામ અતુલભાઈ ત્રિવેદી છે. તેમને એક મહિના પહેલા સાયબર માફિયાઓ દ્વારા ડિજિટલ એરેસ્ટ કરવામાં આવ્યા હતા અને તમારી ધરપકડ કરવામાં આવશે તેવી રીતે ડરાવી ધમકાવીને તેમની પાસેથી રૂપિયા ૧૨.૫૨ લાખ અલગ અલગ ખાતામાં ટ્રાન્સફર કરાવી લીધા હતા.તમારો કેસ સોલ્વ થયા બાદ રૂપિયા પરત આપી દેવામાં આવશે તેવું ઠગો દ્વારા જણાવવામાં આવ્યું હતું. પરંતુ વૃદ્ધે પોતાની સાથે ઠગાઈ થઈ હોવાની ફરિયાદ સાયબર ક્રાઈમ પોલીસ સ્ટેશનમાં નોંધાવી હતી. જેથી પોલીસે હ્યુમન અને ટેકનિકલ સોર્સના આધારે તપાસ કરીને આરોપીઓને ઝડપી પાડ્યા હતા અને તેઓએ જે અલગ અલગ ખાતામાં રૂપિયા ટ્રાન્સફર કરાવ્યા હતા તે રૂપિયા પણ તેમના બેંક ખાતાઓમાંથી રિકવર કરી આપીને પણ રૂપિયા ૧૨.૫૨ લાખ સહી સલામત રીતે વૃદ્ધ અતુલભાઇ ત્રિવેદીને પરત કરી દેવામાં આવ્યા હતા. છેલ્લા કેટલાક સમયથી ડિઝીટલ એરેસ્ટ બાબતે લોકોને જાગૃત કરવા છતાં લોકો સાઇબર માફિયાઓનો શિકાર બની રહ્યા છે.
