એક્ટિવાની સીટ પાછળ છુપાયેલા સાપે કિશોરને ,પુત્રીના ઘરે ગયેલા વૃદ્ધાને અને રાજ સમઢીયાળામાં સાઇટ પર કામ કરતા પ્રોઢને સાપે ડંખ માર્યો
Rajkot,તા.09
ચોમાસાની ઋતુ જામતાની સાથે જ ગ્રામ્ય તેમજ શહેરી વિસ્તારોમાં ઝેરી સરિસૃપો (સાપ) નો કેર યથાવત જોવા મળી રહ્યો છે. સાપ કરડવાના ૩ અલગ-અલગ બનાવો સામે આવ્યા છે, જેમાં સ્કૂલે જઈ રહેલા ૧૫ વર્ષના માસુમ વિદ્યાર્થી, દીકરીના ઘરે રોકાવા ગયેલા વૃદ્ધા અને સાઇટ પર કામ કરતા આધેડ સાપદંશનો ભોગ બન્યા છે.
પ્રાપ્ત વિગતો મુજબ, શહેરના રૈયાધાર વિસ્તારમાં આવેલા બંસીધર પાર્કમાં રહેતો અને ધોરણ-૧૦માં અભ્યાસ કરતો જેનિશ જીતેન્દ્રભાઈ ટાંક (ઉં.વ. ૧૫) નામનો વિદ્યાર્થી અને તેનો નાનો ભાઈ ધ્રુવ, બંને પોતાના દાદા દેવજીભાઈના એક્ટિવા સ્કૂટર પર બેસીને સ્કૂલે જઈ રહ્યા હતા. રસ્તામાં પહેલા નાના ભાઈ ધ્રુવની સ્કૂલ આવતા તે ઉતરી ગયો હતો. ત્યારબાદ જેનિશની સ્કૂલ આવતા જ જેવો તે એક્ટિવા પરથી ઉતરવા ગયો, ત્યારે જ એક્ટિવાની સીટની પાછળ છુપાઈને બેઠેલા ઝેરી સાપે બહાર નીકળી જેનિશના જમણા હાથમાં દંશ મારી દીધો હતો. બીજા બનાવમાં, શહેરના મોચીનગરમાં રહેતા ધનવંતીબેન જગદીશભાઈ ધામેચા (ઉં.વ. ૬૦) નામના વૃદ્ધા જામનગર રોડ પર આવેલા પરસાલા નગરમાં રહેતી તેમની દીકરી ચાંદાબેનના ઘરે રોકાવા માટે ગયા હતા. દરમિયાન ગઈકાલે રાત્રે ૯ વાગ્યાની આસપાસ દીકરીના ઘરે જ તેઓને અચાનક ઝેરી સાપે દંશ દીધો હતો.
ત્રીજા બનાવમાં રાજ સમઢીયાળા ગામે રહેતા સંજયભાઈ રાજગીર (ઉં.વ. ૪૮) નામના આધેડ ગામમાં જ દીપભાઈની સાઇટ (બાંધકામ અથવા વાડીની જગ્યા) પર હાજર હતા, ત્યારે અચાનક ક્યાંકથી ધસી આવેલા સાપે તેમને દંશ દીધો હતો. સાપ કરડ્યાની જાણ થતાં જ આજુબાજુના લોકો એકઠા થઈ ગયા હતા અને તેમને સારવાર માટે સિવિલ હોસ્પિટલ લાવવામાં આવ્યા હતા.
