જામનગરના શખ્સને પેરોલ ફર્લો સ્કોડની ટીમે ઇસ્કોન મંદિર નજીકથી દબોચ્યો
Rajkot,
સોની બજારના બે વેપારીઓનું રૂ.31 લાખનું સોનું ઓળવી જનાર શખ્સને પેરોલ ફર્લો સ્ક્વોડની ટીમે જામનગર હાઇવે પરથી ઝડપી લઈ કાયદેસરની કાર્યવાહી કરી હતી.
પેરોલ ફર્લો સ્ક્વોડની ટીમ પેટ્રોલિંગમાં હતી. દરમિયાન શહેરના એ ડિવિઝન પોલીસ મથકમાં નોંધાયેલા છેતરપિંડીના ગુનામાં નાસતો ફરતો આરોપી જામનગર રોડ પર હોવાની બાતમી મળતા ટીમે વર્કઆઉટ કરી જામનગર રોડ પર ઇસ્કોન મંદિર પાસે ટોયોટા કારના શો-રૂમ પાસેથી આરોપી કિરીટ મહેન્દ્રભાઈ રાધનપુરા (ઉ.વ. ૪૯, રહે. વિભાપર, જામનગર)ને ઝડપી લીધો હતો.
પોલીસ સૂત્રોમાંથી મળતી વિગત મુજબ આરોપી કિરીટ તેના બે પાર્ટનર મિલન પાટડિયા અને ચિંતન પાટડિયા સોનીબજારની જૂની ગધીવાડમાં રીયા ગોલ્ડ નામે દુકાન ધરાવી વેપાર કરતા હતા. એકાદ વર્ષ પહેલાં આરોપીઓએ સોનાના દાગીના બનાવતા અલ્કાજુદ્દીન અને સુરજઅલીને વિશ્વાસમાં લઈ ઓર્ડર આપી તૈયાર સોનાના દાગીના લીધા હતા. તેની સામે હિસાબ પેટે રૂ.૩૦.૮૦ લાખની કિંમતનું ૧૮૫.૬૯૦ ગ્રામ ફાઇન સોનું નહીં આપી છેતરપિંડી કરી હતી. આ અંગે ફરિયાદ નોંધાતા એ-ડિવિઝન પોલીસે આરોપી મિલન અને ચિંતનની ધરપકડ કરી હતી.ફરાર આરોપી કિરીટ અલગ-અલગ શહેરોમાં છૂટક મજૂરી કામ કરતો હતો. તે રાજકોટમાં આવ્યો હોવાની માહિતી મળતા તેને દબોચી લીધો હતો અને એ-ડિવિઝન પોલીસના હવાલે કર્યો હતો.

