બુલેટ સ્પીડમાં હંકારવા મામલે ટપારવા ગયેલા ક્ષત્રિય યુવાનને ચાલકને ટપારતા ફડાકા ઝીંકતા રાજવીરએ પિતા રણજીત વાળાને ફોન કરી બોલાવ્યા
પિતાએ સમજાવટ કરવાને બદલે ભડાકા કરી કૃષ્ણસિંહ જાડેજાને મોતને ઘાટ ઉતાર્યા , વચ્ચે પડેલા મોટાબાપુને બંદૂકના કુંદા વડે માર માર્યો
રાજકોટ
રંગીલું રાજકોટ ફરી એકવાર રક્તરંજીત થયું છે. ફક્ત વાહન ધીમે ચલાવવાની ટકોર મામલે શહેર પોલીસમાં ફરજ બજાવતા હેડ કોન્સ્ટેબલના પિતરાઈ પર ફાયરિંગ કરી હત્યા નીપજાવી દેવાઈ હતી જયારે પોલીસકર્મીના પિતા પર હુમલો કરવામાં આવ્યો હતો. ત્યારે ખાખીના ખૌફ પર સવાલો ઉભા થયાં છે. નાના મવા ગામતળ વિસ્તારમાં પુરપાટ ઝડપે બુલેટ ચલાવી રહીશોના જીવ જોખમમાં મુકતા શખ્સોને ટપારતા મામલો બીચકયો હતો. મવડીના અભિમન્યુ વાળા, રાજવીર વાળા અને તેના પિતા રણજીત વાળાએ ક્ષત્રિય યુવાનને ગોળી ધરબી દીધી હતી. જયારે વચ્ચે પડેલા મોટા બાપુને પણ માથામાં બંદુકના કુંદાનો ઘા ઝીંકી દીધો હતો. ક્રાઇમ બ્રાન્ચે ત્રણેય પિતા-પુત્રોને પકડી પાડ્યા હતા.
રાજકોટ શહેરના નાના મવા રોડ પર મોકાજી સર્કલ નજીક નાના મવા ગામતળ શેરી નં.૪ માં રહેતાં કુલદિપસિંહ જયેન્દ્રસિંહ જાડેજા (ઉ.વ.૪૦) એ નોંધાવેલ ફરીયાદમાં આરોપી તરીકે રણજીત વાળા, તેનો પુત્ર અભિમન્યુ વાળા, રાજવીર વાળા સહિતના શખ્સોના નામ આપતા તાલુકા પોલીસે હત્યા, આર્મ્સ એકટ સહિતની કલમ હેઠળ ગુનો નોંધી તપાસ આદરી હતી.
ફરીયાદીએ જણાવ્યું હતું કે, ગત રાત્રીના નવેક વાગ્યાના અરસામા તેઓ જમીને શેરીમા વોકીંગ કરવા નીકળેલ હતો. સાડા નવ વાગ્યે શેરીમા તેમના માસીના દીકરા કૃષ્ણસિંહ હરદેવસિંહ જાડેજા અને ત્રણ છોકરા સાથે ઉભા હતા. જેથી પોતે ત્યાં ગયેલ તો કૃષ્ણસિંહ ત્યાં છોકરા સાથે બોલાચાલી કરતા હતા. છોકરાઓ અવાર નવાર રોડ પરથી બુલેટ સ્પીડમા ચલાવી નીકળે છે અને હલ્લાબોલ કરે છે, તેમને રોડ પર બુલેટ ધીમે ચલાવવા બાબતે અવાર નવાર કહેલ છે તેમ છતાં તે બુલેટ લઈને નીકળે છે તેમ કહેતા એક છોકરો જેમફાવે તેમ ગાળો બોલવા લાગેલ હતો. જેથી કૃષ્ણસિંહએ તે છોકરાને ફડાકો મારતાં ફરીયાદીએ તેમને બંનેને જુદા પાડેલ હતા. કૃષ્ણસિંહએ છોકરાનુ નામ પુછતા તેને તેનુ નામ અભિમન્યુ અને પિતાનુ નામ પુછતા રણજીત વાળા જણાવેલ હતું. ત્યારબાદ અભિમન્યુએ કહેલ કે, ઉભા રહો હમણા મારા ભાઇ રાજવીરને બોલાવુ તેમ કહી તેને કોઈને ફોન કરેલ અને ફોનમા કહેલ કે, અમારે અહીં ટી.આર.પી.વાળા રોડે માથાકૂટ થઈ છે,
પાંચેક મિનિટમા એક છોકરો એકટીવા લઈને આવ્યો અને કૃષ્ણસિંહની સામે ઉભા રહીને પુછ્યુ કે શું છે તમારે ? મારા ભાઈની સાથે કેમ માથાકૂટ કરી ? દરમિયાન કૃષ્ણસિંહ આ છોકરા સાથે વાત કરતા હતા, ત્યા એકટીવામા આવેલ છોકરો પણ કૃષ્ણસિંહને જેમફાવે તેમ ગાળો આપવા લાગ્યો. જેથી કૃષ્ણસિંહએ આ છોકરાને બે-ત્રણ ફડાકા મારી દીધેલ ત્યારબાદ અભિમન્યુ બાજુમાંથી બોલ્યો કે, ભાઈ તુ આપણા પપ્પાને બોલાવ તેમ કહેતા, આ રાજવીરએ કોઇને ફોન લગાડી કહેલ કે પપ્પા તમે અહીં ટી.આર.પી.વાળા રોડ પર આવો અહી મને અને અભિમન્યુને એક અંકલે મારી લીધેલ છે. કૃષ્ણસિંહ શેરીમા ગયેલ અને સામેથી અભિમન્યુ તેમજ રાજવીર ગાળો દઈને બોલતા હતા કે, આ જો અમારો બાપ આવી ગયો એટલુ કહેતા તેના પિતાએ તેના હાથમાં રહેલ બંદુકથી હવામાં ફાયરીંગ કરેલ અને કૃષ્ણસિંહ તેને રોકવા જતા તેના બંને છોકરા અભિમન્યુ અને રાજવીર બંને કૃષ્ણસિંહની સાથે મારામારી કરવા લાગેલ અને બોલતા હતા કે, પપ્પા આને ૫તાવી જ દયો આપણુ નામ જ કેમ લીધુ. બાદ કૃષ્ણસિંહને ત્રણેય જણા મારવા લાગેલા હતા. ફરીયાદી પણ દરમ્યાન વચ્ચે પડેલ પરંતુ રણજીતએ તેમને ધક્કો મારી દઈ કૃષ્ણસિંહ પર બે રાઉન્ડ ફાયરીંગ કરેલ ત્યારબાદ કૃષ્ણસિંહ નીચે
પડી જતા તેના છોકરા બુમો પાડતા હતા કે,
દિગ્વિજયસિંહ આ લોકોને પકડવા જતા ૨ણજીત એ તેના હાથમા રહેલ બંદુક દિગ્વિજયસિંહ સામે તાકીને કહેલ કે, નજીક ના આવતો નહી તો ઉડાડી દઈશ એટલી વારમા કિરીટસિંહ તેના હાથમા પાઈપ લઈને આવેલ અને રણજીતને શરીરના ભાગે બે ત્રણ પાઈપ મારી દીધેલ ત્યારબાદ રણજીત તેમજ તેના બંને દીકરા પાર્કીંગ બાજુ ભાગી ગયેલ ત્યારબાદ કૃષ્ણસિંહના માથામાથી લોહી નીકળતુ હોય અને આંખો ઢાળી દીધેલ હોય જેથી તુરંત સારવારમાં ખાનગી હોસ્પિટલમાં ખસેડેલ હતો. જ્યાં ફરજ પરના તબીબે ભાઇ કૃષ્ણસિંહને તપાસી મૃત જાહેર કર્યો હતો. તેમજ કૃષ્ણણસિંહના પીતરાઇ દાદા રહેન્દ્રસિંહને માથાના ભાગે ગંભીર ઇજા થયેલ હોય તેને પણ સારવારમાં ખસેડેલ હાલ તેની સારવાર ચાલુ છે.
બનાવની જાણ થતાં જ મોટા પ્રમાણમાં ક્ષત્રિય આગેવાનો ઘટના સ્થળે અને હોસ્પિટલે દોડી જતાં વાતાવરણ તંગ બન્યું હતું. ઘટનાના પગલે ડીસીપી રાકેશ દેસાઈ, એસીપી સહિતના ઉચ્ચ પોલીસ અધિકારીઓ પણ દોડી ગયાં હતાં. જ્યારે ક્રાઈમ બ્રાન્ચ, એલસીબી, એસઓજી અને તાલુકા પોલીસની અલગ અલગ ટીમોએ આરોપીને દબોચવા તજવીજ આદરી હતી. જ્યારે મોડી રાતે જ આરોપીના પરીવારને ઉઠાવી પુછતાછ પણ આદરી હતી. દરમિયાન ક્રાઇમ બ્રાન્ચે ત્રણેય આરોપી પિતા-પુત્રોને દબોચી લીધા હતા.
