ઇસ્લામાબાદ,તા.૩૦
પાકિસ્તાનના ક્ષીણ થઈ રહેલા માળખાની હવે તેના દેશની પ્રખ્યાત અભિનેત્રી હિના ખ્વાજા બયાત દ્વારા જ તીવ્ર ટીકા કરવામાં આવી છે. સિંધુ જળ સંધિને લઈને ભારત સાથે વધી રહેલા તણાવ વચ્ચે, પાકિસ્તાની અભિનેત્રી હિના ખ્વાજા બયતે કરાચીના જિન્ના આંતરરાષ્ટ્રીય વિમાનમથક પર પાણીની અછત માટે અધિકારીઓની ટીકા કરી છે. ગુરુવારે એરપોર્ટ પરથી પોસ્ટ કરાયેલા એક વીડિયોમાં, હિના ખ્વાજા બયતે કરાચી આંતરરાષ્ટ્રીય વિમાનમથક પર મૂળભૂત સુવિધાઓના અભાવ પર નિરાશા વ્યક્ત કરી હતી. હિના ખ્વાજા બયતે તાજેતરમાં દેશની સ્થિતિ અંગે ચિંતા વ્યક્ત કરી હતી. તેણી કહે છે કે જ્યારે રાષ્ટ્રીય ગૌરવના દિવસે પણ કરાચી એરપોર્ટ જેવા મહત્વપૂર્ણ સ્થળોએ શૌચાલયમાં પાણી ઉપલબ્ધ નથી, તો પછી પાકિસ્તાન શેના પર ગર્વ કરવાનો દાવો કરી રહ્યું છે?
અભિનેત્રીએ એક વીડિયોમાં આખી પરિસ્થિતિ વ્યક્ત કરતા કહ્યું, ’આજે યૌમ-એ-તકબીર છે, હું અહીં કરાચી આંતરરાષ્ટ્રીય એરપોર્ટ પર ઉભી છું અને આ દિવસે જ્યારે આપણે પાકિસ્તાનની સિદ્ધિઓની ઉજવણી કરવી જોઈએ, ત્યારે હું જોઈ રહી છું કે કોઈ પણ શૌચાલયમાં પાણી નથી. લોકો વુઝુ કરવા માંગે છે, નમાઝ વાંચવા માંગે છે, પોતાના બાળકોને શૌચાલયમાં લઈ જવા માંગે છે, પરંતુ પાણી નથી. આપણું એરપોર્ટ, આપણી સંસ્થાઓ, આપણી સિસ્ટમ આવી કેમ બની ગઈ છે અને કોઈ પણ સ્વીકારવા તૈયાર નથી કે આ ભૂલો છે અને તેને સુધારવાની જરૂર છે. મોટા પ્રોજેક્ટ્સ બની રહ્યા છે, નવી ટ્રેનો વિશે વાત થઈ રહી છે, પરંતુ જૂની સિસ્ટમ, આંતરરાષ્ટ્રીય એરપોર્ટના બાથરૂમમાં પણ પાણી આપવામાં આવી રહ્યું નથી, આજે પસ્તાવાનો સમય છે.’
અભિનેત્રી હિના ખ્વાજા બયાતનો આ વિડિઓ એવા સમયે આવ્યો છે જ્યારે ભારતે ૨૨ એપ્રિલે પહેલગામમાં થયેલા આતંકવાદી હુમલાના જવાબમાં સિંધુ જળ સંધિને સ્થગિત કરવાનો નિર્ણય લીધો હતો. આ વિડિઓ જોયા પછી, ઘણા લોકોએ કહ્યું છે કે જે દેશ પાસે પાણી નથી તે યુદ્ધ કેવી રીતે લડી શકે છે. આ વિડિઓ ભારતમાં વાયરલ થઈ રહ્યો છે અને તેને મોટા પ્રમાણમાં શેર કરવામાં આવી રહ્યો છે. લોકો કહી રહ્યા છે કે તેમના દેશના લોકો પાકિસ્તાન વિરુદ્ધ ઉભા છે. કેટલાક લોકોએ પાકિસ્તાનને પહેલા દેશની આંતરિક પરિસ્થિતિ સુધારવા, પછી ભારત સાથે લડવા સૂચના આપી છે.
