Upleta તા.5
ઉપલેટા ડેપોના કંડક્ટરે મુસાફરના ભૂલાયેલા રૂા.20,060 પરત મહિલા કંડકટરની પ્રમાણિકતા ગુજરાત રાજ્ય માર્ગ વાહન વ્યવહાર નિગમએ રાજ્યની જીવાદોરી સમાન છે.ત્યારે માત્ર સુવિધાઓ જ નહીં, પણ કર્મચારીઓની નૈતિકતા અને ફરજ નિષ્ઠાના પણ અદભૂત ઉદાહરણો સામે આવી રહ્યા છે. આવો જ એક પ્રામાણિકતાનો કિસ્સો ઉપલેટા ડેપોમાં પ્રકાશમાં આવ્યો છે.
ગત તારીખ 02-04ના રોજ મુસાફર ધવલ અનિલભાઇ રાજપરા રાજકોટથી જેતપુર જવા માટે જુનાગઢ વિભાગની રાજકોટ-ઉપલેટા રૂટની બસ (નંબર: GJ-18-ZT-2175) માં સવાર થયા હતા. જેતપુર ઉતર્યા બાદ તેમને ખ્યાલ આવ્યો કે તેમની અંદાજે રૂા.20,060/ની રોકડ રકમ ક્યાંક પડી ગઈ છે અથવા બસમાં ભુલાઈ ગઈ છે.
ગભરાયેલા મુસાફરે ત્વરિત તે જ બસના મહિલા કંડક્ટર વર્ષાબેન કનારાનો સંપર્ક સાધ્યો હતો. વર્ષાબેને પૂરતી ગંભીરતા દાખવી બસમાં તપાસ કરી હતી અને અથાગ પ્રયત્નોના અંતે તેમને આ પૂરેપૂરી રકમ બસમાંથી મળી આવી હતી. તેમણે તુરંત આ અંગે ઉપલેટા ડેપો મેનેજર એસ. કે. મોરીને જાણ કરી પ્રામાણિકતાનું ઉત્કૃષ્ટ ઉદાહરણ પૂરું પાડ્યું હતું
જ્યારે મુસાફર હાજર થયા, ત્યારે ટ્રાફિક કંટ્રોલરની ઉપસ્થિતિમાં તમામ વિગતોની ખરાઈ કરવામાં આવી હતી. ખાતરી થયા બાદ મુસાફરને તેમના પૂરેપૂરા નાણાં પરત કરવામાં આવ્યા હતા. પોતાની મહેનતની કમાણી સુરક્ષિત પરત મળતા અનિલભાઇ ગદગદિત થઈ ગયા હતા.
ઉપલેટા ડેપોના અધિકારીઓ અને કર્મચારીઓની આ કર્તવ્યનિષ્ઠાની ચોમેર પ્રશંસા થઈ રહી છે. કંડક્ટર વર્ષાબેન કનારાની આ ઉમદા કામગીરીએ સાબિત કર્યું છે કે એસ.ટીનું તંત્ર આજે પણ મુસાફરોની સેવા અને સુરક્ષા માટે કટિબદ્ધ છે.વર્ષાબેનને ડેપો મેનેજર મોરી ભાઈ તથા ચંદુભાઈ તથા રણજીતભાઈ વાઢેર તથા દિલીપભાઈ મહિડા તથા કિશોરસિંહ ના સહિતના કર્મચારીઓએ અભિનંદન પાઠવે હતા.
