Washington, તા.૨૮
અમેરિકામાં ૩ નવેમ્બરે યોજાનારી મધ્યસત્ર ચૂંટણી પહેલાં ફેડરલ ચૂંટણી પંચની વેબસાઇટ પર સાયબર હુમલાની ઘટના સામે આવી છે. આ હુમલાના પ્રયાસ બાદ ચૂંટણીમાં થતા ખર્ચ અને રાજકીય દાનની વિગતો નોંધાવતી ઇલેક્ટ્રોનિક ફાઇલિંગ સિસ્ટમ અસ્થાયી રૂપે બંધ કરવી પડી છે. ચૂંટણીના અંતિમ તબક્કામાં બનેલી આ ઘટનાને કારણે રાજકીય પક્ષો અને ચૂંટણી પર નજર રાખતી સંસ્થાઓમાં ચિંતા વધી છે.રોઇટર્સ ને મળેલા એક ઇમેઇલ અનુસાર, હેકર અથવા હેકર્સના જૂથે અમેરિકાના ફેડરલ ચૂંટણી પંચ ની સિસ્ટમમાં ઘૂસણખોરી કરવાનો પ્રયાસ કર્યો હતો.
આ ઘટનાને પગલે પંચે ઇન્ટરનેટ દ્વારા ઉપલબ્ધ કેટલીક સેવાઓ અસ્થાયી રૂપે બંધ કરી દીધી હતી.ચૂંટણી પંચે જણાવ્યું હતું કે તેની ઇલેક્ટ્રોનિક ફાઇલિંગ સિસ્ટમ હાલ બંધ છે અને આઇટી ટીમ તેને ફરી શરૂ કરવા માટે કામ કરી રહી છે. જોકે, વેબસાઇટ પર અગાઉની ચૂંટણીઓમાં થયેલા ખર્ચની જૂની રિપોટ્ર્સ હજુ પણ જોઈ શકાય છે.મળતી માહિતી મુજબ, સોમવારે રાત્રે લગભગ ૧૦ વાગ્યાથી સિસ્ટમ બંધ થઈ હતી. મંગળવારે રાત્રે પંચે જણાવ્યું હતું કે સમસ્યાની ઓળખ કરી લેવામાં આવી છે અને તેને દૂર કરવાની પ્રક્રિયા ચાલી રહી છે. જોકે, ત્યારબાદ પણ ફાઇલિંગ સિસ્ટમ બંધ હોવાની માહિતી વેબસાઇટ પર દર્શાવવામાં આવી હતી.આ ઘટનાથી મતદારોના મતદાનના અધિકાર પર સીધી અસર થવાની આશંકા નથી. તેનું મુખ્ય કારણ એ છે કે અમેરિકામાં ચૂંટણી યોજવાની જવાબદારી ફેડરલ ચૂંટણી પંચની નથી.
પંચની ભૂમિકા મુખ્યત્વે ચૂંટણીમાં થતા નાણાકીય વ્યવહારો, રાજકીય દાન અને ખર્ચ સંબંધિત નિયમોનું નિરીક્ષણ કરવાની છે.જોકે, સિસ્ટમ બંધ થવાથી રાજકીય સંગઠનો માટે ચૂંટણી ખર્ચની ફરજિયાત રિપોર્ટ સમયસર જમા કરાવવી મુશ્કેલ બની શકે છે. કેટલાક અહેવાલો ૨૪ કલાક અને ૪૮ કલાકની અંદર રજૂ કરવાના હોય છે.આ રિપોટ્ર્સ દ્વારા મતદારો જાણી શકે છે કે ચૂંટણીના અંતિમ દિવસોમાં કયા રાજકીય જૂથ દ્વારા કેટલો ખર્ચ કરવામાં આવી રહ્યો છે અને તેની પાછળ નાણાં કોણ પૂરાં પાડે છે. સિસ્ટમ લાંબા સમય સુધી બંધ રહે તો ચૂંટણીના ખર્ચમાં પારદર્શિતા જાળવવામાં મુશ્કેલી ઊભી થઈ શકે છે.અમેરિકામાં ૩ નવેમ્બરે યોજાનારી મધ્યસત્ર ચૂંટણીથી નક્કી થશે કે રાષ્ટ્રપતિ ડોનાલ્ડ ટ્રમ્પની રિપબ્લિકન પાર્ટી આગામી બે વર્ષ સુધી અમેરિકી સંસદમાં પોતાનું બહુમતીનું વર્ચસ્વ જાળવી શકશે કે નહીં.આ ચૂંટણી પહેલાં જ ચૂંટણી પંચની સિસ્ટમ પર સાયબર હુમલાના પ્રયાસે રાજકીય નાણાકીય વ્યવસ્થાની સુરક્ષા અંગે સવાલો ઊભા કર્યા છે. જોકે, ઉપલબ્ધ માહિતીમાં આ હુમલા પાછળ કોણ હતું અને હુમલાખોરો સિસ્ટમમાં સફળતાપૂર્વક ઘૂસ્યા હતા કે નહીં, તે સ્પષ્ટ કરવામાં આવ્યું નથી.
