૨૪ વર્ષીય ચાલકને નવરંગપુરા પોલીસે ગણતરીના કલાકોમાં ઝડપી પાડી કાર જપ્ત કરી હતી
Ahmedabad,તા.૨૬
સોશિયલ મીડિયામાં લાઈક્સ અને ફોલોઅર્સ મેળવવાની ઘેલછામાં જાહેર રોડ પર લોકોના જીવ જોખમમાં મૂકી સ્ટંટબાજી કરતા અસામાજિકતત્ત્વો સામે અમદાવાદ પોલીસે લાલ આંખ કરી છે. શહેરના નવરંગપુરા વિસ્તારમાં પોર્શ કાર પુરપાટ ઝડપે અને જોખમી રીતે દોડાવી હોવાનો વીડિયો ઈન્સ્ટાગ્રામ પર વાઈરલ કરનાર ૨૪ વર્ષીય ચાલકને નવરંગપુરા પોલીસે ગણતરીના કલાકોમાં ઝડપી પાડી કાર જપ્ત કરી હતી. ૧૦૦થી વધુની સ્પીડે કાર ચલાવવા મામલે એક યુવકની અરજીના આધારે નવરંગપુરા પોલીસે કાર્યવાહી કરી. નોંધનીય છે કે, આ જ કાર ૩૦૦ની સ્પીડમાં દોડતી હોવાનો અન્ય એક વીડિયો પણ સામે આવતા પોલીસે વધુ તપાસ હાથ ધરી છે.
આ ઘટના ત્યારે બની જ્યારે શ્રેયાંશ નામનો એક યુવક ૐઝ્રય્ હોસ્પિટલથી લો ગાર્ડન તરફ જઈ રહ્યો હતો. તેવામાં અચાનક પાછળથી પૂરઝડપે આવેલી પોર્શ કારે ઓવરટેક કરતા શ્રેયાંશને અકસ્માતનો ડર લાગ્યો હતો. સદનસીબે આ સ્પીડમાં જતી કારનો સમગ્ર વીડિયો શ્રેયાંશની ગાડીના ડેસકેમમાં કેદ થઈ ગયો હતો. આ વીડિયો પુરાવા તરીકે રજૂ કરી તેણે પોલીસમાં અરજી આપી હતી. બે દિવસ બાદ આ વીડિયો સોશિયલ મીડિયા પર વાઈરલ થતાં નવરંગપુરા પોલીસ એક્શનમાં આવી હતી અને કારના નંબરના આધારે માલિકની પૂછપરછ કરી બેદરકારીભર્યા ડ્રાઇવિંગ બદલ ગુનો દાખલ કર્યો હતો.
પોલીસ સૂત્રો પાસેથી મળતી માહિતી મુજબ, ઈન્સ્ટાગ્રામ પર એક આઈડી પરથી પોર્શ કાર બેફામ ઝડપે દોડાવવાનો વીડિયો અપલોડ કરવામાં આવ્યો હતો. આ વીડિયોમાં પોર્શ કારચાલકે વાહનચાલકો અને રાહદારીઓના જીવ જોખમમાં મૂકાયા તે રીતે ૐઝ્રય્ હોસ્પિટલ તરફથી નવરંગપુરા તરફ અત્યંત બેદરકારી અને જોખમી રીતે દોડાવી હતી.
અરજી દાખલ થયા બાદ કાર ચલાવનાર યુવકે અરજદાર શ્રેયાંશનો સંપર્ક સાધ્યો હતો. ફોન પર તેણે પોતે પાયલોટ હોવાની ઓળખ આપી હતી અને તે સમયે કાર ૧૧૦ની સ્પીડે ચલાવી હોવાની કબૂલાત પણ કરી હતી. એટલું જ નહીં, તેણે શ્રેયાંશ પર પોલીસ ફરિયાદ પાછી ખેંચી લેવા માટે ભારે દબાણ પણ કર્યું હતું. પરંતુ ગંભીર અકસ્માત સર્જાતા પહેલા જ પોલીસે સતર્કતા દાખવી કાર્યવાહી કરી છે. હવામાં પ્લેન ઉડાવનાર આ પાયલોટ રોડ પર પણ પ્લેનની ઝડપે કાર ચલાવતો હોય તેવા વાઈરલ થયેલા અન્ય ૩૦૦ની સ્પીડ વાળા વીડિયો અંગે પણ પોલીસ તપાસ શરૂ કરી છે.આ વાઈરલ વીડિયો પોલીસના ધ્યાને આવતા નવરંગપુરા પોલીસ સ્ટેશનની સર્વેલન્સ સ્ક્વોડ અને લો ગાર્ડન પોલીસ ચોકીની ટીમે તપાસ હાથ ધરી હતી. જેમાં ઘટનાસ્થળ અને આસપાસના વિસ્તારના ઝ્રઝ્ર્ફ ફૂટેજ ચકાસતાં ઘટના ૨૨ ઓગસ્ટની હોવાનું જણાયું હતું.
તપાસ દરમિયાન કારચાલક ગાંધીનગર જિલ્લાના લિંબડીયા વિસ્તારમાં રહેતો મોહમ્મદ અકરન હોવાનું ખુલ્યું હતું. નવરંગપુરા પોલીસે ગણતરીના કલાકોમાં જ મોહમ્મદ અકરનની અટકાયત કરી તેને પોર્શ કાર સાથે પોલીસ મથકે બોલાવાયો હતો.આ અંગે નવરંગપુરા પોલીસે જાહેર રોડ પર બેદરકારી અને જોખમી રીતે વાહન ચલાવવા મામલે ભારતીય ન્યાય સંહિતા(મ્દ્ગજી)ની સંબંધિત કલમો તેમજ મોટર વાહન કાયદાની કલમો હેઠળ ગુનો નોંધી આરોપી સામે કાયદેસરની કાર્યવાહી હાથ ધરી છે. આ સાથે પોલીસે સ્ટંટબાજીમાં વપરાયેલી કિંમતી પોર્શ કારને પણ જપ્ત કરી લીધી છે.
