Banaskantha,તા. 27
બનાસકાંઠા જિલ્લાના કાંકરેજ તાલુકાના મુખ્ય મથક એવા થરા શહેરમાંથી રખડતા અને વિફરેલા પશુઓનો ત્રાસ દર્શાવતી એક ચોંકાવનારી ઘટના સામે આવી છે. થરાના ઇન્દિરા નગર વિસ્તારમાં એક હડકવાગ્રસ્ત આખલાએ ભારે આતંક મચાવ્યો હતો. આ વિફરેલા અને હડકાયા થયેલા આખલાએ રસ્તા પરથી સામાન્ય રીતે પસાર થઈ રહેલા એક નિર્દોષ યુવક પર અચાનક ધસી જઈને જીવલેણ હુમલો કરી દીધો હતો. આ હુમલો એટલો જોખમી હતો કે આખલાની અડફેટે આવવાના કારણે યુવાન રોડ પર પટકાયો હતો અને તેને શરીરે ગંભીર પ્રકારની ઇજાઓ પહોંચી હતી.
આ ઘટનાને પગલે ઇન્દિરા નગર વિસ્તારમાં ભારે અફરાતફરી મચી ગઈ હતી અને સ્થાનિક રહીશોમાં ફફડાટ વ્યાપી ગયો હતો. લોકો પોતાના ઘરના દરવાજા બંધ કરવા મજબૂર બન્યા હતા. હુમલા બાદ લોહીલુહાણ થયેલા ઘાયલ યુવકને આસપાસના લોકોએ તાત્કાલિક બચાવ્યો હતો અને લોક મદદથી તેને વધુ વિલંબ કર્યા વિના સારવાર અર્થે થરાની સરકારી હોસ્પિટલ ખાતે ખસેડવામાં આવ્યો હતો, જ્યાં હાલ તબીબો દ્વારા તેની સારવાર કરવામાં આવી રહી છે.
હડકવાગ્રસ્ત આખલો સતત વધુ હિંસક બની રહ્યો હોવાથી સ્થાનિક લોકોએ તાત્કાલિક વિસ્તારના જાગૃત ગૌસેવકોને આ અંગે જાણ કરી હતી. માહિતી મળતા જ ગૌસેવકોનો કાફલો દોરડા અને અન્ય જરૂરી સાધનો સાથે ઘટનાસ્થળે દોડી આવ્યો હતો. હડકવાગ્રસ્ત અને વિફરેલા આખલાને પકડવો અત્યંત જોખમી હોવા છતાં, ગૌસેવકોએ પોતાની જાનના જોખમે ભારે જહેમત ઉઠાવીને આખરે આખલાને ચારેયબાજુથી ઘેરીને સફળતાપૂર્વક કાબૂમાં લીધો હતો અને તેનું રેસ્ક્યૂ કર્યું હતું.
