વાણિજ્ય વિભાગ જાન્યુઆરીમાં મોટી બેઠક યોજવાની તૈયારી કરી રહ્યું છે. આ બેઠકમાં અમેરિકા, ઓસ્ટ્રેલિયા, ફ્રાન્સ, ચીન, રશિયા, બ્રિટન, જાપાન, દક્ષિણ કોરિયા, સિંગાપોર, ઈન્ડોનેશિયા સહિતના ૨૦ ફોકસ દેશોમાં એન્જિનિયરિંગ અને ઈલેક્ટ્રોનિક સામાન સહિત ૬ મુખ્ય પ્રોડક્ટ કેટેગરીની નિકાસને પ્રોત્સાહન આપવા માટે એક નક્કર વ્યૂહરચના તૈયાર કરવામાં આવશે તેમ આ બાબતથી વાકેફ સરકારી સુત્રોએ આ માહિતી આપી હતી.
આ બેઠક એવા સમયે થઈ રહી છે જ્યારે નવેમ્બરમાં માલની નિકાસ ઘટીને ૨૫ વર્ષની નીચી સપાટીએ પહોંચી ગઈ છે. આ ઉપરાંત, ભૌગોલિક રાજકીય તણાવ ચાલુ રહ્યો છે અને પેટ્રોલિયમના ભાવમાં ઘટાડો થયો છે. એકંદરે, એપ્રિલથી નવેમ્બર દરમિયાન ભારતની મર્ચેન્ડાઇઝ નિકાસ ૨૮૪ બિલિયન ડોલર રહી હતી, જે ગયા વર્ષ કરતાં ૨.૧ ટકા વધુ છે.
નિકાસ વ્યૂહરચના ઘડતી વખતે એવા દેશો પર ધ્યાન કેન્દ્રિત કરવામાં આવશે જ્યાં નિકાસની વધુ સંભાવના છે. આ ઉપરાંત આ દેશોમાં નિકાસ વધારવા માટે નક્કર પગલાંની પણ ભલામણ કરવામાં આવશે. અમે છ ઉત્પાદન ક્ષેત્રો પર પણ ધ્યાન કેન્દ્રિત કરી રહ્યા છીએ જ્યાં અમને લાગે છે કે ભારતમાં ઉત્પાદન અને નિકાસની પૂરતી સંભાવના છે.
કુલ વૈશ્વિક આયાતમાં આ ૨૦ દેશોનો હિસ્સો ૬૦ ટકા છે. એ જ રીતે, ઓળખાયેલ છ મુખ્ય ઉત્પાદનો કુલ વૈશ્વિક આયાતમાં બે તૃતીયાંશ કરતાં વધુ હિસ્સો ધરાવે છે. એન્જિનિયરિંગ ગુડ્સ અને ઇલેક્ટ્રોનિક્સ ઉપરાંત, અન્ય ફોકસ ક્ષેત્રોમાં રસાયણો અને પ્લાસ્ટિક, ફાર્માસ્યુટિકલ્સ, કૃષિ અને સંલગ્ન ઉત્પાદનો અને કાપડનો સમાવેશ થાય છે.
સરકારનો હેતુ આ દેશોમાં સંતુલિત વેપાર કરારો દ્વારા બજારની પહોંચ સુધારવા અને આર્થિક ભાગીદારી દ્વારા રોકાણને પ્રોત્સાહન આપવાનો છે. આ ઉપરાંત, આ દેશોમાં ભારત દ્વારા સામનો કરવામાં આવતા બિન-વ્યાપારી અવરોધોને દૂર કરવા પર પણ ધ્યાન આપવામાં આવશે. સરકારે ૨૦૩૦ સુધીમાં ૨ ટ્રિલિયન ડોલરની મર્ચેન્ડાઇઝ નિકાસનું લક્ષ્ય નક્કી કર્યું છે.
