Mumbai,તા.06
આવકવેરાના રિટર્ન ફાઈલ કર્યા પછી બેન્ગ્લુરુ સીપીસી દ્વારા રિટર્નને ડિફેક્ટિવ એટલે કે ક્ષતિયુક્ત જાહેર કરવામાં આવે તે પછી તેમાં કરદાતા તરફથી પંદર જ દિવસમાં સુધારો ન કરવામાં આવે તો કરદાતાનું રિટર્ન જ ઇનવેલિડ થઈ જાય છે. આ અંગેની જાણકારી માત્ર કરદાતાના ઈ-મેઈલ પર જ મોકલવામાં આવે છે. તેથી સંખ્યાબંધ કરદાતાઓના તે ઘ્યાનમાં આવતું નથી અને તેમના રિટર્ન ઇનવેલિડ ઠરી રહ્યા છે.
15 દિવસમાં જવાબ ન મળે તો રિટર્ન ઇનવેલિડ થઈ જાય
કરદાતાને ક્ષતિયુક્ત રિટર્નનો ઈ-મેઈલ કર્યા પછી સામાન્ય રીતે પંદર દિવસનો સમય આપવામાં આવે છે. પરંતુ પંદર દિવસમાં કરદાતા તરફથી પ્રતિભાવ ન મળે તો તેના રિટર્નને ઇનવેલિડ-ગેરકાયદેસર ગણી લેવામાં આવે છે. આ મેઈલ જોવો જોઈએ અથવા તો કરદાતાએ લોગ ઇન કરીને તે ચેક કરી લેવાનું રહે છે. આ અંગે ડિપાર્ટમેન્ટ તરફથી અન્ય કોઈપણ રીતે જાણકારી આપવામાં આવતી નથી. અન્યથા તેમનું રિટર્ન ફાઈલ થયું જ નથી તેવું માની લેવામાં આવે છે.
કરદાતાને રિફંડ મળવાપાત્ર છે કે નહિ તે નક્કી કરવામાં આવે છે
આવકવેરાનું રિટર્ન ફાઈલ કર્યા પછી થતાં ઇ-વેરિફિકેશન બાદ આવકવેરા ખાતા પાસેના કરદાતાના ઉપલબ્ધ ડેટાને આધારે કરદાતાએ વેરા પેટે વધારાની રકમ જમા કરાવવાની આવે છે કે કેમ તે નક્કી કરીને કે પછી કરદાતાને રિફંડ મળવાપાત્ર છે કે નહિ તે નક્કી કરી કરે છે. તેમ જ કરદાતાના રિટર્નમાં અન્ય કોઈ ખામી છે કે નહિ તે નિશ્ચિત કરવામાં આવે છે.
ડિવિડંડની કે પછી ટીડીએસની રકમ કપાયાની નોંધ જ રિટર્નમાં કરવામાં ન આવી હોય જેવી ક્ષતિઓ આવકવેરા અધિકારીઓ દર્શાવે છે. ઇન્કમ ખોટા હેડ હેઠળ દર્શાવી હોય તો તેવા સંજોગોમાં પણ રિટર્ન ક્ષતિયુક્ત બની જાય છે. ખોટા ડિડક્શન ક્લેઈમ કર્યા કે ઓડિટ રિપોર્ટ સાથે રજૂ કરવાનો રહી ગયો હોય તો પણ રિટર્ન ક્ષતિયુક્ત ગણાઈ જાય છે. કુલ રિસિપ્ટ કરતાં વધારે ટીડીએસ ક્લેઈમ કર્યો હોવાનું જણાય તો પણ રિટર્ન ક્ષતિયુક્ત ગણાય છે.
ક્ષતિનો જવાબ પંદર દિવસમાં ન આપવામાં આવે તો રિટર્ન ઇનવેલિડ માનવામાં આવે છે
કરદાતાને મેઈલ પર દર્શાવવામાં આવેલી ઉપરોક્ત ક્ષતિનો જવાબ પંદર દિવસમાં ન આપી શકે તો કરદાતાનું રિટર્ન ઇનવેલિડ ઠરી જાય છે એમ ચાર્ટર્ડ એકાઉન્ટન્ટ કરીમ લાખાણીનું કહેવું છે. રિટર્ન ફાઈલ ન કર્યાનું ગણાઈ જાય અને ડિસેમ્બર સુધીમાં રિવાઈઝ રિટર્ન ફાઈલ ન થાય તો કરદાતાએ રિટર્ન ન ભરવા માટે પેનલ્ટી થાય છે. કરદાતાને કોઈ રિફંડ મળવા પાત્ર હોય તો તે રિફંડ પણ નથી મળતું. તેમાંય વળી લૉસનું રિટર્ન ફાઈલ કરવામાં આવ્યું હોય તો લૉસ કેરી ફોરવર્ડ પણ કરી શકાતો નથી.
આ પ્રકારના ક્ષતિયુક્ત રિટર્ન માટે અન્ય કોઈપણ રીતે સરકાર તરફથી કરદાતાને કોમ્યુનિકેટ કરવામાં આવતું જ નથી. કરદાતા તે મેઈલ જોઈ લે તો તેનો જવાબ પાઠવીને રિટર્નમાં સુધારો કરી શકે છે. તેમ જ રિટર્નમાં સુધારો કરવાની કેમ જરૂર નથી તેનો જવાબ પણ આપી શકે છે.
આવકવેરાની સાઈટ પર લોગ ઈન કરીને ચકાસણી કરતા રહો
આવકવેરાનું રિટર્ન ફાઈલ કર્યા પછી આવકવેરા વિભાગ દ્વારા ઈ-મેઈલ મળે તો તેને ગંભીરતાથી લઈને તમે પોતે તેનો જવાબ આપવાની કે પછી તમારા ટેક્સ કન્સલ્ટન્ટનો અભિપ્રાય લઈને તમે તેનો 15 દિવસમાં જવાબ આપવાની વ્યવસ્થા કરવી જોઈએ. પંદર દિવસમાં જવાબ આપશે તો તેને રિવાઈઝ રિટર્ન ફાઈલ કરવાની તક મળશે. મોટાભાગના કરદાતાઓ મેઈલ પર આવેલા મેસેજને જોતાં નથી. તેથી એક બે વર્ષે તેમને ખબર પડે છે કે તેમનું રિટર્ન તો ફાઈલ થયું જ નથી. કારણ કે આવકવેરા અધિકારી જવાબ ન મળતા તે રિટર્નને ગેરકાયદે ઠેરવી દે છે.
રિટર્નની ચકાસણી અને પ્રોસેસ કઈ રીતે થાય
– કરદાતા રિટર્ન ફાઈલ કરે
– ઈ-વેરિફિકેશન કરતા રિટર્ન અપલોડ થયાનું કન્ફર્મ થઈ જશે
– બેન્ગ્લુરુના સેન્ટ્રલ પ્રોસેસિંગ સેન્ટરના અધિકારી તેમાં કોઈ ક્ષતિ છે કે નહિ તેની ચકાસણી કરશે
– ક્ષતિ જણાતા કરદાતાને ઈ-મેઈલ મોકલી દેશ
– ઈ-મેઈલ કર્યા પછી પંદર દિવસ જવાબ આપવાની તક આપવામાં આવશે
– ઈ-મેઈલ સિવાય કોઈપણ માઘ્યમથી મેસેજ મોકલવામાં આવતા નથી
– ઈ-મેઈલનો જવાબ પંદર દિવસમાં નહિ આપવામાં આવે તો તમે રિટર્ન ફાઈલ નથી કર્યું તેમ નક્કી કરી દેવામાં આવશે.
