માંડા ડુંગર વિસ્તારમાંથી આરોપીને દબોચી અપહ્યતને મુક્ત કરાવતી શાપર પોલીસ
Rajkot,તા.02
શાપર વિસ્તારમાંથી બે દિવસ પૂર્વે સગીરાને શખસ ભગાડી જતા શાપર-વેરાવળ પોલીસે શખસ સામે અપહરણનો ગુનો નોંધી શોધખોળ હાથ ધરતા તે ભોગ બનનાર સાથે રાજકોટના માંડા ડુંગર વિસ્તારમાં હોવાની બાતમી આધારે દબોચી અપહ્નત સગીરાને મુકત કરાવી પરિવારને સોંપી હતી. શખસે સગીરાને મારકુટ કરી વિવિધ સ્થળે દુષ્કર્મ આચર્યુ હોવાની જાણ થતા પોલીસે પોકસો સહિતની કલમોનો ઉમેરો કરી ધરપકડ કરી હતી.
શાપર-વેરાવળ વિસ્તારમાં રહેતા પરિવારની સગીર પુત્રી ઘરેથી લાપતા બનતા પરિવારજનોએ શોધખોળ કરી હતી.દરમ્યાન નવાગામ રંગીલા ઢોરાપર રહેતો વિશાલ ચંદુભાઈ જાડા ઉ.વ.૨૨ નામનો શખસ ભગાડી ગયો હોવાની પરિવારજનોને શાપર પોલીસમાં ફરિયાદ નોંધાવતા પીઆઈ આર.બી.રાણાના માર્ગદર્શન હેઠળ સ્ટાફે ગુનો નોંધી વિવિધ ટીમો બનાવી તપાસ હાથ ધરતા આરોપી રાજકોટના માંડાડુંગર વિસ્તારમાં હાજર હોવાની બાતમી આધારે ટીમ દોડાવાઈ હતી.દરમ્યાન આરોપી અપહૃત સાથે મળી આવતા પોલીસે શખસના સકંજામાંથી મુકત કરાવી આરોપીની ધરપકડ કરી હતી. ભોગ બનનાર સગીરાએ પરિવારને જણાવ્યું હતું કે વિશાલે મારકુટ કરી વિવિધ સ્થળે તેણી સાથે દુષ્કર્મ આચર્યુ હોવાની પોલીસમાં ફરિયાદ નોંધાવતા પોલીસે શખસ સામે પોકસો સહિતની કલમોનો ઉમેરો કરી કાર્યવાહી હાથ ધરી હતી પ્રાથમિક તપાસમાં આરોપીને સગીરા સાથે પ્રેમસંબંધ હોવાથી ભગાડી ગયો હોવાનું જાણવા મળ્યું છે.
