છાતીમાં દુખાવો અને તાવ બાદ તબિયત લથડતાં ઇન્ડિયન કોસ્ટ ગાર્ડે સફળ મેડિકલ ઇવેક્યુએશન ઓપરેશન પાર પાડ્યું
Porbandar,તા.૨૭
અરબી સમુદ્રમાં ખરાબ હવામાન અને ઉછળતા દરિયાઈ મોજાં વચ્ચે ઇન્ડિયન કોસ્ટ ગાર્ડે ફરી એકવાર પોતાની સાહસિકતા અને ઝડપી કામગીરીનો પરિચય આપ્યો છે. પોરબંદર નજીક દરિયામાં આવેલા વેપારી જહાજ પર ફરજ બજાવી રહેલા ૨૧ વર્ષીય નાવિકની અચાનક તબિયત બગડતાં કોસ્ટ ગાર્ડે હેલિકોપ્ટરની મદદથી આશરે ૧૫૦ ફૂટની ઊંચાઈએથી જોખમી મેડિકલ રેસ્ક્યૂ ઓપરેશન હાથ ધરી સફળતાપૂર્વક તેનો જીવ બચાવ્યો હતો.
મળતી માહિતી મુજબ, ૨૫ જુલાઈની રાત્રે મુંબઈ સ્થિત મેરિટાઇમ રેસ્ક્યૂ કોઓર્ડિનેશન સેન્ટર તરફથી પોરબંદર સ્થિત ઇન્ડિયન કોસ્ટ ગાર્ડ ડિસ્ટ્રિક્ટ હેડક્વાર્ટરને ઇમરજન્સી સંદેશ મળ્યો હતો. વેપારી જહાજ એમ.વી. મુરલીકિશન પર ફરજ બજાવતા એક ૨૧ વર્ષીય નાવિકને અચાનક છાતીમાં અસહ્ય દુખાવો અને ભારે તાવ આવતાં તેની તબિયત ગંભીર બની હતી. તાત્કાલિક સારવાર ન મળે તો જીવને જોખમ થઈ શકે તેવી સ્થિતિ સર્જાતા કોસ્ટ ગાર્ડે તરત જ બચાવ અભિયાન શરૂ કર્યું હતું.
ખરાબ હવામાન અને ઊંચા મોજાંને કારણે ખુલ્લા દરિયામાં સીધી બચાવ કામગીરી કરવી અત્યંત મુશ્કેલ હતી. આથી કોસ્ટ ગાર્ડે પોરબંદર પોર્ટ સત્તાધીશો સાથે સંકલન કરીને વેપારી જહાજને બ્રેકવોટરથી અંદાજે ૨.૧ નોટિકલ માઈલ દૂર આવેલા ‘ઇનર એન્કરેજ’ સુધી લાવીને એન્કર કરાવ્યું, જેથી રેસ્ક્યૂ ઓપરેશન વધુ સુરક્ષિત રીતે હાથ ધરી શકાય.
સાંજ સુધીમાં હવામાન વધુ પ્રતિકૂળ બનતાં અને જેટી પર જહાજને લંગારવાની મંજૂરી ન મળતાં કોસ્ટ ગાર્ડે પોતાના એડવાન્સ્ડ લાઇટ હેલિકોપ્ટરનો ઉપયોગ કરવાનો નિર્ણય લીધો હતો. ભારે પવન અને પડકારજનક હવામાન વચ્ચે હેલિકોપ્ટરના પાયલટ અને રેસ્ક્યૂ ટીમે આશરે ૧૫૦ ફૂટની ઊંચાઈએથી અત્યંત જોખમી એરલિફ્ટ ઓપરેશન પાર પાડીને બિમાર નાવિકને સુરક્ષિત રીતે હેલિકોપ્ટરમાં ખસેડ્યો હતો.
બાદમાં નાવિકને પોરબંદર એર એન્ક્લેવ ખાતે લાવવામાં આવ્યો હતો, જ્યાં તબીબી ટીમે તેની પ્રાથમિક સારવાર કરી હતી. ત્યારબાદ વધુ સારવાર માટે તેને પોરબંદરની આશા હોસ્પિટલમાં દાખલ કરવામાં આવ્યો હતો. હોસ્પિટલના સૂત્રોના જણાવ્યા અનુસાર હાલ નાવિકની તબિયત સ્થિર છે અને તેની સારવાર ચાલુ છે.
આ સફળ મેડિકલ ઇવેક્યુએશન ઓપરેશન બાદ ઇન્ડિયન કોસ્ટ ગાર્ડની કામગીરીની વ્યાપક પ્રશંસા થઈ રહી છે.
દરિયામાં મુશ્કેલ પરિસ્થિતિઓ વચ્ચે સમયસર લેવાયેલા નિર્ણય, આધુનિક ટેક્નોલોજી અને તાલીમબદ્ધ ટીમના સંકલિત પ્રયાસોથી એક યુવાન નાવિકનો જીવ બચાવવામાં સફળતા મળી છે. આ કામગીરી ફરી એકવાર સાબિત કરે છે કે દરિયામાં કોઈપણ ઇમરજન્સી સમયે ઇન્ડિયન કોસ્ટ ગાર્ડ જીવ બચાવવા માટે હંમેશા તત્પર રહે છે.
