શેરી, મહોલ્લામાં નાની બાળાઓ પ્રાચીન રાસ ગરબાની રમઝટ બોલાવી રહૈ છે પાર્ટી પ્લોટ, સામાજિક જ્ઞાતિની વાડીઓના આયોજનોમાં અર્વાચીન રાસ-ગરબાની ધૂમ
(મિલન જોશી દ્વારા)
Junagadh તા.૧૩ઃ
જૂનાગઢ મહાનગર સહિત સમગ્ર સોરઠ પંથકમાં માઈભક્તો દ્વારા જગતજનની મા જગદંબાની આરાધનાનો મહાઉત્સવ એટલે આસો નોરતાની અત્યંત ભક્તિભાવ અને ઉત્સાહપૂર્વક ઉજવણી થઈ રહી છે. માતાજીના મંદિરો, મઢોમાં શ્રદ્ધાળુઓનું ઘોડાપૂર ઉમટી રહ્યા છે, બીજી બાજુ માતાજીના ભક્તો દ્વારા માતાજીની આરાધના, અનુષ્ઠાન, દિવ્ય મહાઆરતી થઈ રહ્યા છે. શક્તિધામો ’જય માતાજી’ના નાદથી ગુંજી ઊઠ્યા છે, આ સાથે શેરી, પાર્ટી પ્લોટ, સામાજિક જ્ઞાતિની વાડીઓના આયોજનોમાં અર્વાચીન રાસ-ગરબાની ધૂમ જમાવટ થઈ રહી છે. સમગ્ર જિલ્લામાં માતાજીના ૬૦૦ થી વધુ સ્થળો એ રાસ-ગરબા રમાઈ રહ્યા છે.
નવ દિવસ સુધી ચાલનારા શક્તિના પાવન પૂજનના પર્વ નવરાત્રીના પ્રથમ નોરતાથી જ જૂનાગઢના તમામ નાના-મોટા શક્તિયામો રંગબેરંગી રોશની અને ભાતભાતના શણગાર સાથે અલૌકિક બનાવવામાં આવ્યા છે, અને માઈ ભક્તોના ’જય માતાજી’ ના ગગનભેદી નાદથી મંદિરો ગુંજી ઊઠયા છે. અને સમગ્ર સોરઠમાં ભક્તિમય અને મનમોહક વાતાવરણ સર્જયું છે.
શાસ્ત્રો, પુરાણોમાં જગત જનની મા શક્તિના વિવિધ સ્વરૂપોની સાધના, જપ, તપ અને અનુષ્ઠાન માતાજીના આસો નવરાત્રિમાં કરવાનું વિશેષ મહાત્મ્ય રહેલું છે. ત્યારે અનેક માઇભકતો દ્વારા માતાજીના મંદિરો, મઢ અને અનેક ભાવિકો દ્વારા ગિરનાર સહિતના પર્વતો પર આકરા અનુષ્ઠાનો પ્રારંભ કર્યા છે. તેની સાથે નવરાત્રીના પ્રથમ દિવસથી જ માઇભક્તોએ પોતાના ઘરોમાં માટીના પાત્રમાં અગિયાર પ્રકારના ધાન્યની વાવણી કરીને જવારા ઉગાડવાની સાથે શ્રદ્ધાપૂર્વક ઘટ અને ગરબાનું સ્થાપન કર્યું છે, જેનું ભાવિકો નવ દિવસ સુધી ઉપવાસ, એકટાણાં કરી વિશેષ પૂજા-અર્ચના કરશે.
નવરાત્રિમાં માતાજીની પૂજન, અર્ચનાની સાથે, માતાજીના ગરબા ગાવા અને બાળાઓ દ્વારા રમાતી ગરબીઓનું વિશેષ મહત્વ છે ત્યારે જૂનાગઢ જિલ્લામાં આ વર્ષે નવરાત્રી ઉત્સવને લઈને ખેલૈયાઓ અને પ્રાચીન ગરબી મંડળો તથા અર્વાચીન રાસોત્સવના આયોજકોમાં ભારે ઉત્સાહ જોવા મળી રહ્યો છે. તંત્રના દફતરે ગઇકાલ સુધીની મળેલ માહીતી મુજબ સમગ્ર જૂનાગઢ જિલ્લામાં ૫૪૮ શેરી ગરબા, ૮૮ જાહેર ગરબીઓ અને ૩૮ ખાનગી ગરબા મહોત્સવો મળી કુલ ૬૦૦ સ્થળોએ રાસ-ગરબાના આયોજનની નોંધણી કરવામાં આવી છે. જેને લઈને પાર્ટી પ્લોટ, સામાજિક જ્ઞાતિની વાડીઓ અને ખાનગી આયોજનોમાં યુવક – યુવતીઓ અર્વાચીન રાસ-ગરબાની ધૂમ મચાવી રહ્યા છે. જ્યારે શેરી-મહોલ્લાઓમાં નાની-નાની બાળાઓ દ્વારા પ્રાચીન પદ્ધતિથી ભાવથી ગરબીઓ રમવામાં આવી રહી છે, આમ સમગ્ર સોરઠ પંથક હાલ મા ભગવતીની આરાધના અને ભક્તિના રંગે રંગાઈ ગયું છે.
