Rajkot,તા.૩૦
પાટણવાવ પોલીસ મથકની હદમાં આવતા નાગલખડા ગામની સીમમાં આવેલી વાડીમાં ધમધમતા જુગારધામ પર એલસીબીએ દરોડો પાડી સાત મહિલા સહિત કુલ ૧૧ આરોપીઓને રૂા. ૧૨.૨૯ લાખના મુદ્દામાલ સાથે ઝડપી લીધા હતા. કેટલા સમયથી આ જુગારધામ ચાલતુ હતું તે અંગે હવે પોલીસ તપાસ કરશે.
એલસીબીના પીએસઆઈ કે.એમ. ચાવડાને એવી માહિતી મળી હતી કે સિરાજ નુરમામદ સમા (રહે. હાડફોડી ગામ, તા. ઉપલેટા) તેના જ ગામના જાવીદ ગફારભાઈ સમા સાથે મળી નાગલખડા ગામની સીમમાં આવેલી પોતાની વાડીમાં જુગારધામ ચલાવે છે. જેના આધારે ગઇકાલે રાત્રે દરોડો પાડયો હતો.
સ્થળ પરથી સંચાલક સિરાજ, ઇમરાન આમદ મંધરા (રહે. જૂનાગઢ), ધર્મેશ મનુભાઈ ગોહેલ (રહે. રાજકોટ), સિકંદર હુસેન પઠાણ (રહે. જૂનાગઢ), હંસાબેન ધનજીભાઈ પરમાર (રહે. જામનગર), રેશ્માબેન ઇમરાન મંધરા (રહે. જૂનાગઢ), નયનાબેન રાજેશભાઈ બૂધ (રહે. જામનગર), એકતાબેન ઉર્ફે અંકિતાબેન જીજ્ઞોશ મણવર (રહે. રાજકોટ), રેશ્માબેન હારૂનભાઈ ઠેબા (રહે. ઉપલેટા), વર્ષાબા પુષ્પરાજસિંહ ચુડાસમા (રહે. રાજકોટ) અને ભારતીબેન તુલસીભાઈ રાઠોડ (રહે. પોરબંદર) ઝડપાયા હતા.જ્યારે જાવીદ નાસી જતાં તેને વોન્ટેડ દર્શાવ્યો છે. પટ્ટમાંથી રૂા. ૫.૬૮ લાખની રોકડ મળી હતી. જેના પરથી મોટાપાયે જુગાર રમાતો હોવાનુ સ્પષ્ટ બન્યું છે. પાંચ મોબાઇલ ફોન, અર્ટિગા કાર પણ કબજે કરાઇ હતી. સંચાલક સિરાજ સામે જુગારનો એક, ઇમરાન સામે પણ જુગારનો એક ગુનો નોંધાયો છે. હંસાબેન સામે જુગારના ચાર, નયનાબેન સામે પણ ચાર, રેશ્માબેન સામે પાંચ, ભારતીબેન સામે ચાર અને વોન્ટેડ જાવીદ સામે એક ગુનો નોંધાયો છે. જેના પરથી સ્પષ્ટ છે કે મોટાભાગના આરોપીઓ જુગાર રમવાના શોખીન છે.
