જીજ્ઞેશ પટેલ
Manavadar તા.૨૦ઃ
માણાવદર તાલુકાના એકલેરા ગામનું નામ હાલ સમગ્ર પંથકમાં રોશન થયું છે. અહીંના પશુપાલક દાસાભાઈ બાવનભાઈ છેલાણાના જાફરાબાદી નસલના પ્રખ્યાત ’અર્જુન’ નામના પાડાએ તરણેતરના મેળામાં પ્રથમ નંબર પ્રાપ્ત કરી ઉત્કૃષ્ટ સિદ્ધિ હાંસલ કરી છે. આ ગૌરવવંતી સિદ્ધિ બદલ તેને ૫૧,૦૦૦ રૂપિયાનું રોકડ ઇનામ એનાયત કરવામાં આવ્યું છે.
આજે સમગ્ર પશુપાલન જગતમાં ચર્ચાનો વિષય બનેલા ’અર્જુન’ પાડાનો વંશવેલો પણ અતિ ઉત્તમ છે. તેના માલિક દાસાભાઈના જણાવ્યા અનુસાર, અર્જુનની માતા અદ્ભુત ક્ષમતા ધરાવે છે અને તે આખા દિવસ દરમિયાન ૨૬ લીટર દૂધ આપે છે. વિશેષ વાત એ છે કે આ પાડાની માતા ભાવનગરના જંગલની છે, જે આ જાફરાબાદી નસલની શુદ્ધતા અને મજબૂતાઈની સાક્ષી પૂરે છે.
તરણેતરના મેળામાં યોજાયેલી પશુ સ્પર્ધામાં ગુજરાતભરમાંથી ઉત્તમ નસલના પશુઓએ ભાગ લીધો હતો. આ સ્પર્ધામાં જાફરાબાદી નસલની ખાસ વિશેષતાઓ ધરાવતા ’અર્જુન’ પાડાએ તેની ભવ્ય શારીરિક રચના અને આકર્ષક બાંધાના બળે તમામનું ધ્યાન ખેંચ્યું હતું. નિર્ણાયકો દ્વારા તેને પ્રથમ ક્રમાંક વિજેતા જાહેર કરવામાં આવ્યો હતો.
એકલેરા ગામના પશુપાલક દાસાભાઈ બાવનભાઈ છેલાણાની મહેનત અને જાફરાબાદી નસલના જતનનું આ પરિણામ છે. આ સિદ્ધિથી માત્ર દાસાભાઈના પરિવારમાં જ નહીં, પરંતુ સમગ્ર માણાવદર પંથક અને સોરઠના પશુપાલકોમાં ભારે ઉત્સાહ અને આનંદની લાગણી ફેલાઈ ગઈ છે. ’અર્જુન’ પાડાની આ સફળતા અન્ય પશુપાલકોને પણ ઉત્તમ નસલના પશુઓનું જતન કરવા માટે પ્રેરણા પૂરી પાડશે.
