Morbi તા.૧૨ઃ
મોરબીના પીપળીયા ચાર રસ્તા નજીક સાળા અને બનેવી સહિતના શખ્સોએ વચ્ચે મારામારી થઇ હતી જે ઉગ્ર બનતા બનેવીએ સાળાને છરીના ધા ઝીંકી દેતા બનાવ હત્યામાં પલટાયો છે જે મામલે મોરબી તાલુકા પોલીસે હત્યા સહિતની કલમો મુજબ ગુનો નોંધી વધુ તપાસ હાથ ધરી છે
બનાવની વિગત મુજબ, માળિયાના ન્યુ નવલખી વિસ્તારમાં રહેતા અબ્બાસ અબ્દુલ સોતા અને આરોપી આસીફ ઈલીયાસ દલના વચ્ચે આરોપીની બહેન સાથે મેસેજ પર થતી વાતચીત બાબતે લાંબા સમયથી મનદુખ ચાલતું હતું. આ બાબતે સમાધાન કરવા માટે પીપળીયા ચાર રસ્તા પાસે આમરણ રોડ પર બંને પક્ષો ભેગા થયા હતા. સમાધાનની વાતચીત ચાલી રહી હતી ત્યારે અચાનક મામલો બિચક્યો હતો અને આરોપીઓએ ઉશ્કેરાઈ જઈ હુમલો કર્યો હતો. જેમાં આસીફ દલે અબ્બાસ સોતાને છાતીના ભાગે છરીનો જીવલેણ ઘા ઝીંકી દીધો હતો, જ્યારે અન્ય આરોપી હુશૈન સાઇચાએ લોખંડના પાઈપ વડે હસનભાઈ અને સુલતાન પર હુમલો કર્યો હતો.
ગંભીર રીતે ઘાયલ અબ્બાસને તાત્કાલિક મોરબી સિવિલ હોસ્પિટલ ખસેડવામાં આવ્યો હતો, જ્યાં સારવાર દરમિયાન તેણે દમ તોડતા બનાવ હત્યામાં પલટાયો હતો. આ ઘટના બાદ હોસ્પિટલ પરિસરમાં પણ બંને પક્ષો વચ્ચે ઘર્ષણ થયું હોવાનું જાણવા મળ્યું છે. હાલ પોલીસે હસનભાઈ સોતાની ફરિયાદના આધારે આસીફ દલ અને હુશૈન સાઇચા વિરુદ્ધ ગુનો નોંધી આગળની કાર્યવાહી હાથ ધરી છે.
