સીઆઈએ ડિરેક્ટરની આ મુલાકાત દરમિયાન ધ વોલ સ્ટ્રીટ જર્નલે લીક થયેલી અમેરિકી ગુપ્તચર માહિતીના આધારે એક અહેવાલ પ્રકાશિત કર્યો હતો
Washington, તા.૨૮
અમેરિકી રાષ્ટ્રપ્રમુખ ડોનાલ્ડ ટ્રમ્પે દાવો કર્યો છે કે રશિયા નાટો ના કોઈ પણ સભ્ય દેશ પર હુમલો નહીં કરે. તેમનું આ નિવેદન સીઆઈએ ડિરેક્ટર જોન રેટક્લિફની અચાનક યોજાયેલી મોસ્કો મુલાકાત બાદ સામે આવ્યું છે. રિપોટ્ર્સ અનુસાર, રેટક્લિફે રશિયાના રાષ્ટ્રપ્રમુખ વ્લાદિમીર પુતિનને નાટોના દેશો પર હુમલો કરવા સામે કડક ચેતવણી આપી હતી. ૨૭ ઓગસ્ટે ઓવલ ઓફિસમાં વાતચીત દરમિયાન ટ્રમ્પે સ્પષ્ટ કર્યું હતું કે પુતિન સાથે તેમની સરાહનીય વાતચીત થઈ છે અને રશિયા નાટોના કોઈ પણ ક્ષેત્ર પર આક્રમણ કરવાનો ઈરાદો ધરાવતું નથી.જ્યારે રાષ્ટ્રપ્રમુખ ટ્રમ્પને પૂછવામાં આવ્યું કે શું તેમણે રેટક્લિફને મોસ્કો યાત્રા દરમિયાન પુતિનને ખાસ ચેતવણી આપવાનો નિર્દેશ આપ્યો હતો, ત્યારે તેમણે આ અંગે સીધો જવાબ આપવાનું ટાળ્યું હતું. ટ્રમ્પે જણાવ્યું હતું કે તેઓ આ બાબતે કોઈ ટિપ્પણી કરવા માંગતા નથી, પરંતુ રશિયા હુમલો નહીં કરે તે બાબતે તેઓ સંતોષ ધરાવે છે. અગાઉ ૨૬ ઓગસ્ટે ટ્રમ્પે રેટક્લિફની આ મુલાકાતને ‘સેમિ-રૂટિન’ ગણાવી હતી અને આ સફર અંગે ચાલતી વિવિધ અટકળોને ફગાવી દીધી હતી.સીઆઈએ ડિરેક્ટરની આ મુલાકાત દરમિયાન ધ વોલ સ્ટ્રીટ જર્નલે લીક થયેલી અમેરિકી ગુપ્તચર માહિતીના આધારે એક અહેવાલ પ્રકાશિત કર્યો હતો. આ રિપોર્ટમાં સંકેત આપવામાં આવ્યો હતો કે રશિયા નાટો દેશોની એકતા અને તેમની પ્રતિક્રિયા આપવાની ક્ષમતા ચકાસવા માટે કોઈ યોજના બનાવી રહ્યું હોઈ શકે છે. ઉલ્લેખનીય છે કે, નાટોના સામૂહિક સંરક્ષણ નિયમ અનુસાર જો કોઈ એક સભ્ય દેશ પર હુમલો થાય, તો અમેરિકા સહિતના તમામ સભ્ય દેશોએ તેની રક્ષા માટે આગળ આવવું ફરજિયાત બને છે.રેટક્લિફની આ મુલાકાતથી વૈશ્વિક સ્તરે અનેક તર્ક-વિતર્ક સર્જાયા છે. જોકે, ડોનાલ્ડ ટ્રમ્પે નાટો પર રશિયાના સંભવિત આક્રમણ કરતા યુક્રેન યુદ્ધને વહેલી તકે સમાપ્ત કરવાના પોતાના પ્રયાસો પર વધુ ભાર મૂક્યો છે. ટ્રમ્પે જણાવ્યું હતું કે તેઓ ફરીથી રાષ્ટ્રપ્રમુખ પદ સંભાળ્યા પછીથી જ રશિયા અને યુક્રેન વચ્ચે ચાલી રહેલા યુદ્ધનો અંત લાવવા માટે સતત પ્રયાસરત છે.
