ઉચાપત રકમ લાખોમાં જઈ સકે તેવો ડેપ્યુટી કમિશનરે સ્વીકાર કર્યો
(રવિ નિમાવત દ્વારા) Morbi તા.૯
મોરબી મહાનગરપાલિકાના વર્કશોપ વિભાગમાં ફરજ બજાવતા રોજમદાર કર્મચારીઓએ અન્ય કર્મચારીઓની જાણ બહાર ઇલેક્ટ્રિક એટેન્ડન્સ મશીનમાં ખોટી રીતે હાજરી પુરાવી આર્થિક ઉચાપત કરી હોવાનો કિસ્સો પ્રકાશમાં આવ્યો છે. રાજકોટના મવડી વિસ્તારમાં રહેતા અને મહાનગરપાલિકામાં ફરજ બજાવતા દિપભાઇ સુરેશભાઇ ફળદુએ આ મામલે આઠ શખ્સો સામે મોરબી સીટી એ ડિવિઝન પોલીસ મથકે ફરિયાદ નોંધાવી છે.
મોરબી મહાનગરપાલિકાના વર્કશોપ વિભાગમાં આરોપી મંદીપ ચાવડા, વિમલભાઇ બાવળીયા, અભયભાઇ છબીલભાઇ ચૌહાણ, સુનીલભાઇ ભરતભાઇ મકવાણા, રોહીતભાઇ ધીરુભાઇ, લલીતભાઇ કુમાર ચાવડા, સંજયભાઇ ઘનશ્યામભાઇ ચાવડા, રાજેશભાઇ વિરુદ્ધ પોલીસ ફરિયાદ નોંધાવી છે જેમાં જણાવ્યું છે કે મનદીપ ચાવડા, વિમલ બાવળિયા અને અભય ચૌહાણ તથા સુનીલ મકવાણા દ્વારા મહાપાલિકાના વર્કશોપ શાખાના અમુક લોકોની હાજરી નોકરી પર આવતા ના હોવા છતાં ખોટી રીતે હાજરી પૂરી ઉચાપત કરી હતી અને રોહિત ધીરૂભાઈ, લલિત ચાવડા, સંજય ચાવડા અને રાજેશભાઈએ તેમનું એકાઉન્ટ આપી તેમાં ખોટી હાજરીના નાણા કુલ ૧૩ રોજમદારના બે દિવસના પગારની રકમ રૂ ૯૭૫૫ રૂપિયાની ઉચાપત કરી હતી
મહાનગરપાલિકામાં હાજરી કોભાંડ કેવી રીતે ખુલ્યું ?
મહાપાલિકાની જુદી જુદી શાખાના કર્મચારીની હાજરી ચકાસતા અમુક કર્મચારીઓની હાજરી પૂરી ખોટી પ્રેક્ટીસ ખુલી હતી જેથી તા. ૦૫ અને ૦૬ મેના બે દિવસના હાજરી રજીસ્ટરના રીપોર્ટ ચકાસણી કરતા વર્કશોપ શાખાના ધ્યાને ગેરરીતી આવી હતી અને નાયબ કમિશ્નર કુલદીપસિંહ વાળા તથા ટાઈમ કીપર શાખાના અધ્યક્ષ મહેશ મહેતાએ રોજમદારના હાજરીના સમય અને હાજરી પૂર્યા બાદ બહાર નીકળવાનો સમય લગભગ સરખો જણાતા સીસીટીવી ચકાસણી કરી હતી અને રૂબરૂ બોલાવી એટેન્ડન્સ મશીનમાં હાજરી નોંધ કરાવતા ગેરરીતી સામે આવી હતી
કર્મચારી અન્યની હાજરી પૂરી નાખતા અને રકમ ચાઉં કરતા
આરોપીઓ પૈકી મનદીપ ચાવડા, વિમલ બાવળિયા અને અભય ચૌહાણ હાજરી પૂરી નાખતો હતો તેમજ સુનીલ મકવાણા નામનો ઇસમ બીજે કામ કરતો હતો અને પંચિંગ કરવા આવતો હોવાનો ખુલાસો થયો છે પત્રકાર પરિષદમાં ડેપ્યુટી કમિશ્નર કુલદીપસિંહ વાળાએ સમયગાળો છ માસ, કોઈ કિસ્સામાં ૮ માસ અને દોઢ વર્ષ સુધીનો હોવાનું જણાવી લાખોની રકમ ઉચાપત થઇ હોવાનો સ્વીકાર કર્યો હતો જે વિગતો પોલીસને સોપવામાં આવશે અને પોલીસ તપાસ ચલાવી રહી હોવાનું જણાવ્યું હતું
ઉચાપત કરનાર સામે ફરિયાદ થઇ, ફરજમાં બેદરકારી દાખવનાર સામે કોણ એક્શન લેશે ?
ગેરરીતી મામલે પોલીસ ફરિયાદ કરવામાં આવી છે અને પોલીસે ફરિયાદ નોંધી તપાસ હાથ ધરી છે જોકે ડેપ્યુટી કમિશ્નરે સમયગાળા અંગે જે સ્વીકાર કર્યો છે અને મહાપાલિકા બન્યા બાદથી આવડી મોટી લોલમલોલ ચાલતી હતી જે ફરજમાં બેદરકારી છે તેના માટે કોણ જવાબદાર તે મોટો પ્રશ્ન છે અને ફરજમાં બેદરકારી બદલ એક્શન લેવાશે કે કેમ તે જોવું રહ્યું
