બીજા લગ્ન બાદ પત્નીને શારીરિક-માનસિક ત્રાસ આપી જાહેરમાં ત્રણ વખત ’તલાક’ બોલ્યાનો આક્ષેપ
(નયના દવે દ્વારા)
Jamnagar તા.૧૧
જામનગર જિલ્લાના સિક્કા પોલીસ મથકમાં એક પરિણીત મહિલાની ફરિયાદના આધારે મુસ્લિમ મહિલા (લગ્ન અધિકારોનું સંરક્ષણ) અધિનિયમ, ૨૦૧૯ની કલમ ૪ હેઠળ પતિ સામે ગુનો નોંધવામાં આવ્યો છે.
ફરિયાદ મુજબ, સિક્કા ખાતે રહેતી હીનાબેનના લગ્ન વર્ષ ૨૦૨૦માં સલાયાના રહેવાસી હસન હમીદ ભાયા સાથે મુસ્લિમ રિવાજ મુજબ થયા હતા. લગ્નના શરૂઆતના લગભગ ત્રણ વર્ષ સુધી દામ્પત્ય જીવન સારું ચાલ્યું હતું, પરંતુ ત્યારબાદ પતિ નાની-નાની બાબતે ઝઘડા કરી ગાળો બોલતો, મારપીટ કરતો તેમજ શારીરિક અને માનસિક ત્રાસ આપતો હોવાનો આક્ષેપ કરવામાં આવ્યો છે.
ફરિયાદમાં વધુમાં જણાવાયું છે કે બીજી પુત્રીના જન્મ બાદ પતિના વર્તનમાં ફેરફાર આવ્યો હતો, અને તેને પડોશમાં રહેતી એક યુવતી સાથે પ્રેમસંબંધ થતાં તેની સાથે લગ્ન કરવાની ઈચ્છાથી પત્ની પર અત્યાચાર વધારી દીધા હતા. બાદમાં પતિ ઘર છોડીને ચાલ્યો ગયો હતો, અને પછી તે અન્ય મહિલા સાથે રહેતો હોવાનું જાણવા મળ્યું હતું.ફરિયાદી મહિલા છેલ્લા ચાર મહિનાથી પોતાની બે પુત્રીઓ સાથે પિયર સિક્કામાં રહે છે. અગાઉ પરિવારજનો દ્વારા સમાધાનના પ્રયાસો પણ કરવામાં આવ્યા હતા. દરમિયાન સિક્કા પોલીસ મથકે અરજી સંદર્ભે બંને પક્ષોને બોલાવવામાં આવ્યા હતા. તે સમયે પોલીસ મથકની બહાર પતિએ પોતાની બીજી યુવતિ સાથે લગ્ન કરી લીધા હોવાનું કહી પત્નીને ત્રણ વખત ’તલાક’ ઉચ્ચારી તલાક આપી દીધાનો આક્ષેપ ફરિયાદમાં કરવામાં આવ્યો છે.સમાજમાં સમાધાન થઈ જશે તેવી આશાએ ફરિયાદીએ તાત્કાલિક ફરિયાદ નોંધાવી ન હતી, પરંતુ સમાધાન ન થતાં તેમજ સાસરીયા પક્ષ તરફથી પોતાની કે બે પુત્રીઓની કોઈ સારસંભાળ લેવામાં ન આવતાં આખરે પોલીસમાં ફરિયાદ નોંધાવી હતી. સિક્કા પોલીસે ફરિયાદના આધારે ગુનો નોંધી વધુ તપાસ હાથ ધરી છે.
