Dhoraji તા.15
ધોરાજીમાં જીનમીલ રોડ પર એન્ટરપ્રાઇઝ નામે પેઢી ધરાવનાર વેપારી પાસેથી સુરતના શખ્સે માખીયાળા,જુનાગઢ- ધોરાજી રોડ પર આવેલા પોતાના બાયોકોલ કારખાના માટે મગફળીની ફોતરીનો માલ મંગાવ્યો હતો. શરૂઆતમાં પાર્ટ પેમેન્ટ કર્યા બાદ આરોપીએ પૈસા આપવાનું બંધ કરી દીધું હતું.
વેપારીએ કુલ રૂ. 70.17 લાખનો માલ આરોપીના કારખાને મોકલ્યો હોય જે પૈકી 15 લાખનુંપાર્ટ પેમેન્ટ કર્યા બાદ બાકી રહેતી રકમ 55.17 લાખ ન ચૂકવી વેપારી સાથે વિશ્વાસઘાત કરતા આ અંગે ધોરાજી સિટી પોલીસ સ્ટેશનમાં ફરિયાદ નોંધાવવામાં આવી છે.
બનાવ અંગે ધોરાજીમાં નવા બસ સ્ટેન્ડ પાસે રહેતા મયુરભાઈ રણછોડભાઈ દેસાઈ (ઉ.વ. 37) નામના વેપારીએ નોંધાવેલી ફરિયાદમાં આરોપી તરીકે સુરતમાં રહેતા એમ.વિશાલ એન્ડ કુ. પેઢીના માલિક વિશાલ મનજી માંગુકિયાનું નામ આપી જણાવ્યું હતું કે, તેઓને ધોરાજીમાં જીન મિલ રોડ પર ખરાવડ પ્લોટ ખાતે પેઢી આવેલી છે. આ પેઢી તેમના પિતા રણછોડભાઈ દેસાઈના નામે રજીસ્ટર છે. પેઢીમાં માર્કેટમાંથી સીંગદાણાના કારખાનામાંથી મગફળી ફોતરી લઈ બાયોકોલ બનાવતી અલગ અલગ કંપનીને ફોતરી વેચવાનો વ્યવસાય કરે છે.
ગત ફેબ્રુઆરી 2025 માં વિશાલ માંગુકિયાએ ફરિયાદીના પિતા રણછોડભાઈ દેસાઈને ફોન કરી તેમનો સંપર્ક કર્યો હતો અને કહ્યું હતું કે, મારે માખીયાળા, જુનાગઢ-ધોરાજી રોડ પર પૂનમ વેબ બ્રિજની પાસે એમ.વિશાલ એન્ડ નામથી બાયોકોલ કારખાનું ચાલુ કરવાનું છે અને મારે તમારી સાથે મગફળીના ફોતરીનો વેપાર કરવો છે. ત્યારબાદ બે-ત્રણ દિવસ બાદ વિશાલ ફરિયાદીની ઓફિસે તેના પિતાને મળવા માટે આવ્યો હતો અને વેપાર કરવાનું નક્કી કરી પેમેન્ટની ટર્મ અને કન્ડિશન 15 થી 20 દિવસ રાખી હતી.
બાદમાં વિશાલના કહેવાથી તા. 20-2-2025 ના પ્રથમ ફોતરીની ગાડી જુનાગઢથી ભરાવી વિશાલના કારખાને મોકલી હતી. ત્યારબાદ તામ 12-3-2025 સુધીમાં 29 પાલ (29 ગાડી) ફોતરીની વિશાલના કારખાને મોકલી હતી. તા. 21-3-2025 ના તેનું તેનું બિલ 17.44 લાખ વિશાલને મોકલ્યું હતું, જે બિલ પેટે વિશાલે બે કટકામાં 10 લાખનું પાર્ટ પેમેન્ટ કર્યું હતું. બાદમાં આ પ્રકારે આરોપીના કહ્યા મુજબ તેમને મગફળીની ફોતરીનો માલ વેપારીની પેઢી દ્વારા મોકલવામાં આવ્યો હતો. જેનું શરૂઆતમાં પાર્ટ પેમેન્ટ કરી વેપારીનો વિશ્વાસ જીત્યો હતો જેથી વેપારીએ તેના કહ્યા મુજબ માલ મોકલતા રહ્યા હતા.
બાદમાં બાકી પેમેન્ટની રકમ વધી જતા આ બાબતે વિશાલને કહેતા તેણે કહ્યું હતું કે, મારું એક પેમેન્ટ અટવાયેલું છે, એ આવી જશે એટલે હું તમારો બધો હિસાબ ચૂકતે કરી દઈશ, અત્યારે સીઝન છે.
બજારપીઠે માલ ચાલુ રાખજો. જેથી આ વિશાલ પર ભરોસો કરી માલ મોકલવાનું ચાલુ રાખ્યું હતું. ત્યારબાદ પણ તેણે પેમેન્ટ ન ચૂકવતા ફરી તેને બાકી રહેતી રકમ ચૂકવવાનું કહેતા તેણે કહ્યું હતું કે, તમે માલ નાખવાનું ચાલુ રાખો હું હિસાબ ચૂકતે કરી દઈશ. પરંતુ બાકી રકમ વધી ગયેલ હોય જેથી વેપારીએ માલ મોકલવાનું બંધ કરી દીધું હતું.
આરોપીના વિશ્વાસમાં આવી તા. 28-2-2025 થી તા. 22-7-2025 સુધીમાં વેપારીએ કુલ 119 પાલ (119 ગાડી) મગફળી ફોતરીનો માલ તેને મોકલ્યો હતો જેની કિંમત રૂ.70.17 લાખ થાય છે, જેનું વિશાલે રૂપિયા 15 લાખ પાર્ટ પેમેન્ટ કર્યું હોય બાકી રહેતી રકમ રૂ.55.17 તેણે ચૂકવી ન હોય અને તેની માંગણી કરતા બહાના આપતો હોય અને આજ સુધી રકમ ન ચૂકવતા અંતે વેપારીએ આ અંગે વિશાલ માંગુકિયા વિરુદ્ધ વિશ્વાસઘાત કર્યા અંગેની ફરિયાદ નોંધાવતા પોલીસે ગુનો નોંધી આરોપી સામે કાર્યવાહી કરવા તજવીજ હાથ ધરી હતી.
