રાજકોટ રેન્જ ટીમના છ ઇસમોના ઘર અને ડેરીઓ પર દરોડા; ૭,૧૫૦ લિટર શંકાસ્પદ દૂધ, ૧૨૦ કિલો વનસ્પતિ ઘી અને ૧૫ કિલો પાવડર મળી આવ્યો
(નયના દવે દ્વારા)
Jamnagar તા.૨૪
જામનગર જિલ્લાના કાલાવડ ગ્રામ્ય પોલીસ સ્ટેશન વિસ્તારના હરીપર મેવાસા ગામે શંકાસ્પદ ભેળસેળયુક્ત દૂધ બનાવવાનો કારોબાર ચાલતો હોવાની મળેલી બાતમીના આધારે રાજકોટ રેન્જ પોલીસની ટીમે છ અલગ-અલગ ધંધાર્થીઓના રહેણાંક મકાનો અને ડેરીઓ પર દરોડા પાડી મોટા પ્રમાણમાં શંકાસ્પદ દૂધ સહિતનો જથ્થો ઝડપી પાડ્યો છે. દરોડા દરમિયાન આશરે ૭,૧૫૦ લિટર શંકાસ્પદ ભેળસેળયુક્ત દૂધ, ૧૨૦ કિલો વનસ્પતિ ઘી તથા ૧૫ કિલો દૂધ બનાવવાનો પાવડર મળી આવ્યો હતો. ફૂડ સેફ્ટી વિભાગને સ્થળ પર બોલાવી આગળની કાયદેસરની કાર્યવાહી હાથ ધરવામાં આવી છે.
રાજકોટ વિભાગના નાયબ પોલીસ મહાનિરીક્ષક શ્રી નિર્લિપ્ત રાય (આઈપીએસ) દ્વારા રાજકોટ રેન્જ હેઠળના જિલ્લાઓમાં લોકોના આરોગ્યને નુકસાન પહોંચે તેવી રોજિંદા ઉપયોગની ખાદ્ય ચીજવસ્તુઓમાં ભેળસેળ કરીને આર્થિક લાભ મેળવતા ધંધાર્થીઓ સામે કડક કાર્યવાહી કરવા સૂચના આપવામાં આવી હતી.આ સૂચના અનુસાર રાજકોટ રેન્જના પોલીસ ઇન્સ્પેક્ટર અપૂર્વ પટેલના માર્ગદર્શન હેઠળ પો.સ.ઇ. પી.એન. મોરી, બી.સી. મિયાત્રા, સી.એમ. કોટેલીયા તથા સ્ટાફ દ્વારા આવા શંકાસ્પદ ધંધાર્થીઓ અંગે હ્યુમન સોર્સ મારફતે માહિતી એકત્ર કરી તેનું ટેકનિકલ એનાલિસિસ અને વર્કઆઉટ કરવામાં આવી રહ્યું હતું.
દરમિયાન મળેલી ચોક્કસ બાતમીના આધારે પો.સ.ઇ. સી.એમ. કોટેલીયા તથા સ્ટાફના સંદીપસિંહ ઝાલા, કાસમભાઈ બ્લોચ, વનરાજભાઈ મકવાણા, મીતેશભાઈ પટેલ, કમલેશભાઈ રબારી, વિપુલભાઈ મોરી, નવલદાન ગઢવી, પરેશભાઈ સાંજવા અને ડૉ. ધર્મેન્દ્રસિંહ જાડેજાએ હરીપર મેવાસા ગામે દરોડાની કાર્યવાહી હાથ ધરી હતી.
પોલીસ ટીમે હરીપર ગામના નીચેના શંકાસ્પદ દૂધના ધંધાર્થીઓના રહેણાંક મકાનો અને તેમની નજીક આવેલી અલગ-અલગ ડેરીઓમાં તપાસ હાથ ધરી હતી જેમાં મેરૂભાઈ વીરાભાઈ ભારાઈ, રહે. રબારીપાળો, હરીપર, ૨. અરજણભાઈ હમીરભાઈ હુણ, રહે. હરીપર, ૩. બધાભાઈ બાવનભાઈ ચાવડા, રહે. હરીપર, ૪. મેરૂભાઈ બધાભાઈ વંશ, રહે. રબારીપાળો, હરીપર, ૫. રાણાભાઈ બટુકભાઈ ભારાઈ, રહે. રબારીપાળો, હરીપર, ૬. બોધાભાઈ નાથાભાઈ વંશ, રહે. રબારીપાળો, હરીપર સામે કાર્યવાહી કરાઈ હતી.
પોલીસે દરોડા દરમિયાન અલગ-અલગ સ્થળોએ શંકાસ્પદ રીતે દૂધ બનાવવાની કામગીરી ચાલતી હોવાનું જણાવી કુલ આશરે ૭,૧૫૦ લિટર દૂધ, ૧૨૦ કિલો વનસ્પતિ ઘી અને ૧૫ કિલો દૂધ બનાવવાનો પાવડર કબજે કર્યો હતો.
મળેલા દૂધ અને અન્ય સામગ્રી શંકાસ્પદ જણાતાં તાત્કાલિક ફૂડ સેફ્ટી વિભાગના અધિકારીઓને ટેલિફોનિક જાણ કરીને સ્થળ પર બોલાવવામાં આવ્યા હતા. ફૂડ સેફ્ટી ઓફિસર દ્વારા જરૂરી તપાસ, નમૂના લેવાની કાર્યવાહી તથા લેબોરેટરી પરીક્ષણ સહિતની આગળની કાયદેસરની કાર્યવાહી હાથ ધરવામાં આવી રહી છે.પોલીસ અને ફૂડ સેફ્ટી વિભાગની સંયુક્ત કાર્યવાહી બાદ દૂધમાં ભેળસેળનો મુદ્દો તપાસના કેન્દ્રમાં આવ્યો છે અને નમૂનાઓના પરીક્ષણનો રિપોર્ટ આવ્યા બાદ વધુ કાર્યવાહી કરવામાં આવશે.
