(નયના દવે દ્વારા)
Jamnagar તા.૨૬ઃ
જામનગર શહેરમાં રહેણાંક મકાનમાંથી અંગ્રેજી દારૂનો જથ્થો ઝડપવામાં એલસીબીને સફળતા મળી છે. કિશાનચોક વિસ્તારમાં આવેલા માલદે ભુવનમાં રહેતા એક શખ્સના મકાનમાં દરોડો પાડી પોલીસે અલગ-અલગ બ્રાન્ડના અંગ્રેજી દારૂના ૧૩૮ નંગ ચપટા સહિત કુલ રૂ.૨૭,૮૦૦નો મુદ્દામાલ કબજે કરી એક શખ્સને ઝડપી લીધો હતો. જામનગર જિલ્લા પોલીસ અધિક્ષક ડો. રવિ મોહન સૈનીની સૂચના હેઠળ જામનગર એલસીબી દ્વારા દારૂ-જુગારની પ્રવૃત્તિઓ સામે કાર્યવાહી હાથ ધરવામાં આવી રહી છે. એલસીબી પોલીસ ઇન્સ્પેક્ટર વી.બી. ચૌધરીના માર્ગદર્શન હેઠળ પોલીસ સબ-ઇન્સ્પેક્ટર એમ.વી. ભાટીયા અને સ્ટાફ શહેર વિસ્તારમાં પેટ્રોલિંગમાં હતા.
દરમિયાન એલસીબીના મયુરસિંહ પરમાર, રૂષીરાજસિંહ વાળા તથા મયુદીનભાઈ સૈયદને મળેલી સંયુક્ત બાતમીના આધારે કિશાનચોકના માલદે ભુવનમાં રહેતા કિશનભાઈ મયુરભાઈ કનખરાના રહેણાંક મકાનમાં તપાસ કરવામાં આવી હતી. તપાસ દરમિયાન અલગ-અલગ બ્રાન્ડના અંગ્રેજી દારૂના ૧૩૮ નંગ ચપટા કિંમત રૂ.૨૨,૮૦૦ તથા રૂ.૫,૦૦૦ની કિંમતનો મોબાઇલ ફોન મળી આવ્યો હતો. પોલીસે કુલ રૂ.૨૭,૮૦૦નો મુદ્દામાલ કબજે કરી કિશનભાઈ કનખરાને ઝડપી લીધો હતો.આ અંગે પોલીસ હેડ કોન્સ્ટેબલ યુવરાજસિંહ ઝાલાએ ફરિયાદ રિપોર્ટ આપતા પોલીસ હેડ કોન્સ્ટેબલ મયુદીનભાઈ સૈયદે પ્રોહિબિશન ધારાની કલમો હેઠળ કાયદેસરની કાર્યવાહી હાથ ધરી છે.પોલીસ તપાસમાં દારૂના વેચાણમાં ભાગીદાર તરીકે કિશાનચોકમાં રહેતા ધાર્મિકભાઈ નંદા તથા દારૂનો જથ્થો સપ્લાય કરનાર તરીકે જડેશ્વરપાર્કમાં રહેતા ભાવેશભાઈ પ્રકાશભાઈ દામાનું નામ સામે આવ્યું છે. બંનેને ઝડપી પાડવા માટે પોલીસે કાર્યવાહી શરૂ કરી છે.આ કાર્યવાહી એલસીબીના પોલીસ સબ-ઇન્સ્પેક્ટર એમ.વી. ભાટીયા તથા એલસીબીના સ્ટાફ દ્વારા કરવામાં આવી હતી.
