સોશિયલ મીડિયા પર તેઓ શોરાની ઝલક ભાગ્યે જ શેર કરે છે, જેને તેમના ચાહકો હંમેશાં પસંદ કરે છે
Mumbai,તા.20
રાષ્ટ્રીય પુરસ્કાર વિજેતા અભિનેતા નવાઝુદ્દીન સિદ્દીકી ૨૫ વર્ષના લાંબા વિરામ બાદ ફરી એકવાર રંગમંચ પર વાપસી કરવા જઈ રહ્યા છે. તેઓ ‘નકાબ’ નામના નાટક દ્વારા થિયેટરમાં કમબેક કરી રહ્યા છે. આ ખાસ નાટક માટે નવાઝુદ્દીન પોતાની પુત્રી શોરા સિદ્દીકી અને નાટકની ટીમ સાથે અમેરિકાના શિકાગો જવા રવાના થયા છે.નવાઝુદ્દીને પોતાની ઇન્સ્ટાગ્રામ સ્ટોરી પર પ્રવાસની ઝલક શેર કરી હતી. તસવીર પોસ્ટ કરતાં તેણે લખ્યું, “નકાબની ટીમ સાથે શિકાગો તરફ જઈ રહ્યો છું.”નવાઝુદ્દીન માટે ‘નકાબ’ માત્ર એક નાટક નથી, પરંતુ તે તેમની અભિનયયાત્રાની મૂળભૂત શરૂઆત સાથે ફરી જોડાવાનો અવસર છે. ફિલ્મોમાં સફળતા મેળવતા પહેલાં તેમણે વર્ષો સુધી રંગમંચ પર કામ કરીને પોતાની અભિનયકલા ઘડેલી હતી.છેલ્લા બે દાયકામાં નવાઝુદ્દીને ફિલ્મો અને ઓટીટી પ્લેટફોર્મ પર અનેક યાદગાર પાત્રો ભજવીને પોતાની અલગ ઓળખ ઉભી કરી છે. વાસ્તવિક અભિનય અને પાત્રને જીવંત બનાવવાની તેમની ક્ષમતાને કારણે તેઓ દેશના શ્રેષ્ઠ કલાકારોમાં સ્થાન ધરાવે છે.સ્ક્રીન પર મોટી સફળતા મેળવ્યા બાદ પણ નવાઝુદ્દીનનો રંગમંચ પ્રત્યેનો પ્રેમ આજે પણ અકબંધ છે. ૨૫ વર્ષ બાદ થિયેટરમાં તેમની વાપસી તેમની અભિનય પ્રત્યેની પ્રતિબદ્ધતા અને નવા પડકારો સ્વીકારવાની તૈયારીને દર્શાવે છે. આ ખાસ પ્રવાસને તેમની પુત્રી શોરા સિદ્દીકીની હાજરી વધુ યાદગાર બનાવે છે. નવાઝુદ્દીન હંમેશાં પોતાના બાળકો સાથે ક્વોલિટી ટાઇમ પસાર કરવાનું મહત્વ આપતા આવ્યા છે. સોશિયલ મીડિયા પર તેઓ શોરાની ઝલક ભાગ્યે જ શેર કરે છે, જેને તેમના ચાહકો હંમેશાં પસંદ કરે છે.‘નકાબ’ના શિકાગોમાં યોજાનારા નાટકને લઈને થિયેટરપ્રેમીઓ અને નવાઝુદ્દીન સિદ્દીકીના ચાહકોમાં ભારે ઉત્સાહ જોવા મળી રહ્યો છે. બે દાયકાથી વધુ સમય બાદ તેમને ફરી લાઇવ મંચ પર અભિનય કરતાં જોવા માટે સૌ આતુર છે.
