New Delhi, તા. 10
દેશમાં ‘પ્રધાનમંત્રી જન ધન યોજના’ (PMJDY) હેઠળ ખોલવામાં આવેલાં કુલ બેંક ખાતાઓની સંખ્યા 22 જુલાઈ, 2026 સુધીમાં 58.84 કરોડને વટાવી ગઈ છે. લોકસભામાં નાણાં રાજ્ય મંત્રી પંકજ ચૌધરીએ આપેલી માહિતી મુજબ, આમાંથી 32.79 કરોડ ખાતા મહિલાઓના છે, જે કુલ ખાતાના અડધાથી પણ વધુ છે.
આ ઉપરાંત, કુલ ખાતામાંથી 45.77 કરોડ ખાતા ગ્રામીણ અને અર્ધ-શહેરી વિસ્તારોના લોકો દ્વારા ખોલવામાં આવ્યાં છે, જે દર્શાવે છે કે છેવાડાના માનવી સુધી બેંકિંગ સેવાઓ પહોંચી છે. આ જન ધન ખાતાઓ સરકાર દ્વારા અપાતા સીધા આર્થિક લાભ મેળવવા માટે ખૂબ જ ઉપયોગી સાબિત થઈ રહ્યાં છે.
આ યોજના સાથે જોડાયેલી અન્ય સરકારી સામાજિક સુરક્ષા યોજનાઓમાં પણ લોકોએ ઉત્સાહપૂર્વક ભાગ લીધો છે. જુલાઈ 2026 સુધીના આંકડા મુજબ, ‘પ્રધાનમંત્રી જીવન જ્યોતિ વીમા યોજના’ (PMJJBY) હેઠળ 28.05 કરોડ, ‘પ્રધાનમંત્રી સુરક્ષા વીમા યોજના’ (PMSBY) હેઠળ સૌથી વધુ 59.18 કરોડ અને અસંગઠિત ક્ષેત્રના કામદારો માટેની ‘અટલ પેન્શન યોજના’ (APY) હેઠળ 9.40 કરોડ લોકો નોંધાયા છે.
