શહેરથી ગ્રામ્ય વિસ્તારો સુધી તીનપત્તી અને વરલી મટકાના જુગાર પર કાર્યવાહી રોકડ, ત્રણ મોટરસાયકલ સહિત રૂ. ૨ લાખથી વધુનો મુદ્દામાલ કબજે
(નયના દવે દ્વારા)
Jamnagar તા.૨૫
જામનગર શહેર અને જિલ્લામાં જુગાર વિરોધી ઝુંબેશ અંતર્ગત પોલીસે વિવિધ વિસ્તારોમાં સઘન કાર્યવાહી હાથ ધરી હતી. જામજોધપુર, લાલપુર, સિટી એ, સિટી સી, કાલાવડ ગ્રામ્ય, મેઘપર (પડાણા) તથા પંચકોશી બી ડિવિઝન સહિતના પોલીસ મથકો દ્વારા અલગ-અલગ સ્થળોએ કુલ ૧૧ દરોડા પાડવામાં આવ્યા હતા.
આ કાર્યવાહીમાં તીનપત્તી તેમજ વરલી મટકાનો જુગાર રમતા અને રમાડતા મળી આવેલા કુલ ૫૬ શખ્સો સામે કાર્યવાહી કરવામાં આવી હતી. પોલીસે રોકડ રકમ, ગંજીપત્તાના પાનાં તેમજ ત્રણ મોટરસાયકલ સહિત રૂ. ૨ લાખથી વધુનો મુદ્દામાલ કબજે કર્યો હોવાનું જાણવા મળે છે.
જામનગર શહેરમાં સિટી એ ડિવિઝન પોલીસે દિગ્વિજય પ્લોટ વિસ્તારમાં તીનપત્તીનો જુગાર રમતા ચાર શખ્સોને ઝડપી રૂ. ૨,૪૭૦ રોકડા કબજે કર્યા હતા. ઉપરાંત સિટી એ ડિવિઝનની સર્વેલન્સ સ્કોડે મોહનનગર આવાસ વિસ્તારમાં દરોડો પાડી સાત શખ્સોને ઝડપી રૂ. ૧૦,૨૫૦ રોકડા કબજે કર્યા હતા.
સિટી સી ડિવિઝન પોલીસે ગોકુલનગર-અયોધ્યાનગર વિસ્તારમાં પાંચ શખ્સોને ઝડપી રૂ. ૧૨,૨૫૦ રોકડા કબજે કર્યા હતા, જ્યારે સિટી સી ડિવિઝનની સર્વેલન્સ સ્કોડે રણજીતનગરના જુના હુડકો વિસ્તારમાં નવ શખ્સોને ઝડપી રૂ. ૨૫,૩૭૦ની રોકડ રકમ ઉપરાંત ત્રણ મોટરસાયકલ સહિત રૂ. ૧,૦૫,૩૭૦નો મુદ્દામાલ જપ્ત કર્યો હતો.
પંચકોશી બી ડિવિઝન પોલીસે દડીયા ગામે દરોડો પાડી આઠ શખ્સોને ઝડપી રૂ. ૪૫,૫૪૦ રોકડા કબજે કર્યા હતા.
લાલપુર તાલુકામાં ટેભડા ગામે વરલી મટકાના જુગારમાં એક શખ્સ સામે કાર્યવાહી કરી રૂ. ૨૩૦નો મુદ્દામાલ કબજે કરાયો હતો. જ્યારે સણોસરા ગામના પાદરમાં એક જ રાત્રે બે અલગ-અલગ સ્થળોએ દરોડા પાડી કુલ નવ શખ્સોને ઝડપી રૂ. ૧૪,૬૦૦ની રોકડ રકમ કબજે કરવામાં આવી હતી.
કાલાવડ ગ્રામ્ય પોલીસે લલોઇ ગામે નદીના હોકળા વિસ્તારમાં દરોડો પાડી સાત શખ્સોને ઝડપી રૂ. ૨,૦૭૦ રોકડા કબજે કર્યા હતા. જામજોધપુર પોલીસે ખરાવાડ વિસ્તારમાં વરલી મટકાના જુગાર અંગે કાર્યવાહી કરી એક શખ્સ પાસેથી રૂ. ૨૧૦નો મુદ્દામાલ કબજે કર્યો હતો.
મેઘપર (પડાણા) પોલીસે જોગવડ ગામે દરોડો પાડી બે શખ્સોને તીનપત્તીનો જુગાર રમતા ઝડપી રૂ. ૧૩,૨૫૦ રોકડા કબજે કર્યા હતા.
આમ, જામનગર શહેર અને જિલ્લાના વિવિધ વિસ્તારોમાં પોલીસે કરેલી સંયુક્ત જુગાર વિરોધી કાર્યવાહીમાં કુલ ૧૧ દરોડા પાડી ૫૬ શખ્સો સામે જુગારધારા હેઠળ કાર્યવાહી હાથ ધરવામાં આવી હતી. રોકડ રકમ ઉપરાંત ગંજીપત્તાના પાનાં અને વાહનો સહિતનો મુદ્દામાલ કબજે કરવામાં આવ્યો હતો.
