Rajkot તા. ૧૨ઃ
નવરાત્રિના શુભ સમયગાળામાં મિલકતના દસ્તાવેજોની નોંધણી કરાવવા ઇચ્છતા નાગરિકોને રાજકોટની સબ-રજિસ્ટ્રાર કચેરીઓમાં એપોઇન્ટમેન્ટ મેળવવામાં ભારે મુશ્કેલી પડી રહી છે.હાલની સ્થિતિ મુજબ કોઠારિયા સબ-રજિસ્ટ્રાર કચેરીમાં તા. ૨૧/૧૦/૨૦૨૬ સુધી, લોધિકા કચેરીમાં તા. ૧૬/૧૦/૨૦૨૬ સુધી અને ઝોન-૮માં તા. ૧૯/૧૦/૨૦૨૬ સુધીના એપોઇન્ટમેન્ટ સ્લોટ બુક થઈ ગયા છે. પરિણામે નાગરિકોને સમયસર એપોઇન્ટમેન્ટ મળતી નથી અને દસ્તાવેજ નોંધણીની કામગીરીમાં વિલંબ થાય છે.
નવરાત્રિ ધાર્મિક દૃષ્ટિએ શુભ કાર્યો માટે વિશેષ મહત્ત્વ ધરાવતી હોવાથી મોટી સંખ્યામાં નાગરિકો આ સમયગાળામાં જમીન, મકાન અને અન્ય મિલકતોના દસ્તાવેજ નોંધાવવા ઇચ્છે છે. આ સંજોગોમાં જાહેરહિતમાં વધારાના સ્લોટ ખોલવા જરૂરી બન્યા છે.
આ બાબતને ગંભીરતાથી લઈને રાજકોટ રેવન્યુ બાર એસોસિએશનના સેક્રેટરી એડવોકેટ વિજય તોગડિયા દ્વારા શ્રી ચારેલ સાહેબ સમક્ષ રજૂઆત કરવામાં આવી હતી. રજૂઆતમાં કોઠારિયા, લોધિકા અને ઝોન-૮ ખાતે દસ્તાવેજ નોંધણી માટે એપોઇન્ટમેન્ટ સ્લોટ ઉપલબ્ધ ન હોવાના કારણે નાગરિકોને પડતી મુશ્કેલીઓ દૂર કરવા અને તાત્કાલિક ધોરણે વધારાના એપોઇન્ટમેન્ટ સ્લોટ ખોલવા માંગ કરવામાં આવી હતી.આ રજૂઆતને હકારાત્મક પ્રતિસાદ આપતાં શ્રી ચારેલ સાહેબ દ્વારા ટૂંક સમયમાં નવા એપોઇન્ટમેન્ટ સ્લોટ ખોલવામાં આવશે તેવી માહિતી આપવામાં આવી હતી. આથી દસ્તાવેજ નોંધણી કરાવવા ઇચ્છતા નાગરિકો અને વકીલમિત્રોને રાહત મળવાની આશા છે.
