New Delhi, તા.13
“2024માં ખેલાડી તરીકે અને હવે 2026માં કેપ્ટન તરીકે ICC T20 વર્લ્ડ કપ જીતવો એ એક સ્વપ્ન જેવું છે…”- આ વાત ભારતીય ટીમને ICC T20 વર્લ્ડ કપ જીત અપાવનાર કેપ્ટન સૂર્યકુમાર યાદવે કહી હતી.
તાજેતરના એક ઇન્ટરવ્યુમાં તેમણે ભારતીય ટીમની વિશ્વ ચેમ્પિયન બનવાની સફર અને તૈયારીનો ખુલાસો કર્યો હતો. આ દરમિયાન સૂર્યકુમાર યાદવે 18 મહિના પહેલા વર્લ્ડ કપ માટે રોડ મેપ બનાવવાનું શરૂ કર્યું હતું.
સૂર્યાએ એમ પણ કહ્યું કે, ટીમના તમામ 15 ખેલાડીઓ તેમની ભૂમિકાઓ અને તેમની પાસેથી શું અપેક્ષા રાખવામાં આવી હતી તેનાથી સારી રીતે વાકેફ હતા.
► હું તે દિવસ ક્યારેય ભૂલી શકતો નથી
સૂર્યકુમારે કહ્યું કે, 2024ના શ્રીલંકા પ્રવાસના એક અઠવાડિયા પહેલા, તેમને જય શાહનો ફોન આવ્યો, જે તે સમયે BCCI સેક્રેટરી હતા. “જ્યારે તેમણે મને કહ્યું કે મને T20 ટીમનો કેપ્ટન બનાવવામાં આવી રહ્યો છે ત્યારે મને આશ્ચર્ય થયું. હું તે દિવસ ક્યારેય ભૂલીશ નહીં.
તે પછી, મને મુખ્ય પસંદગીકાર અજિત અગરકરનો ફોન આવ્યો, અને પછી મેં ગૌતમ ગંભીર સાથે વાત કરી, કારણ કે તેઓ મુખ્ય કોચ બનવાના છે. જય શાહે મને બધા સિનિયરો સાથે વાત કરવા અને આગામી વર્લ્ડ કપ માટે રોડમેપ તૈયાર કરવા કહ્યું.”
► વર્લ્ડ કપ માટે અભિગમ બદલવા માંગતા હતા
ભારતીય કેપ્ટને કહ્યું, “અમને ખાતરી હતી કે 2024ના વર્લ્ડ કપમાં અમે જે પ્રકારનું ક્રિકેટ રમ્યા હતા તે હવે બદલું પડશે. અમે 2026ના વર્લ્ડ કપ માટે અમારો અભિગમ બદલવાનો નિર્ણય કર્યો. અમે નક્કી કર્યું કે વ્યક્તિગત સિદ્ધિ હવે પ્રાથમિકતા રહેશે નહીં અને દરેકનું લક્ષ્ય ટીમ જીત હશે.”
► પછી ટીમ બનાવવાની પ્રક્રિયા શરૂ કરી
સૂર્યકુમારે કહ્યું કે, માનસિકતા તૈયાર કર્યા પછી અને રોડમેપ બનાવ્યા પછી, અમે ટીમ બનાવવાનું શરૂ કર્યું. અમારા મનમાં ટીમના 80-90 ટકા લોકો તૈયાર હતા. અમને ખબર હતી કે જસપ્રીત બુમરાહ ફાસ્ટ બોલિંગનું નેતૃત્વ કરશે અને અર્શદીપ સિંહ તેમને ટેકો આપશે.
વરૂણ ચક્રવર્તીની વાપસીથી અમને વધુ મજબૂતી મળી, જ્યારે અક્ષર પટેલ પહેલાથી જ પોતાને સાબિત કરી ચૂક્યો હતો. આ પછી, અમે બેટિંગ ઓર્ડર તૈયાર કરવાનું શરૂ કર્યું.
► હવે કોઈ પણ ખેલાડી ટીમથી ઉપર નથી
સૂર્યાએ કહ્યું, “અમે સાથે બેઠા અને કંઈક મોટું કરવાનું નક્કી કર્યું. અમે ઇચ્છતા હતા કે અમે જ્યાં પણ રમીએ ત્યાં લોકો ટીમ ઇન્ડિયાને જોવા આવે છે, ફક્ત કોઈ એક ખેલાડીને નહીં. અમે ખેલાડીઓને નહીં, પણ ટીમને પ્રથમ રાખવાનું નક્કી કર્યું. અમે એવા બંધન સાથે ક્રિકેટ રમવા માંગતા હતા જેનો લોકો આનંદ માણે.”
► સવારે 7 વાગ્યા સુધી ઉજવણી ચાલુ રહી
ભારતીય કેપ્ટને કહ્યું કે, વર્લ્ડ કપ જીત્યા પછી તે આખી રાત ઊંઘ્યો નહીં. સૂર્યકુમારે કહ્યું, “ટીમનો ઉત્સવ સ્ટેડિયમમાં જ શરૂ થયો હતો. જ્યારે અમે સવારે 3 વાગ્યાની આસપાસ હોટેલ પાછા ફર્યા, ત્યારે ખેલાડીઓએ સ્નાન પણ ન કર્યું અને ઉજવણી ચાલુ રાખી. લગભગ 75 ટકા ખેલાડીઓએ સવારે 7 વાગ્યા સુધી ઉજવણી કરી અને ઊંઘ્યા નહીં.”
► સૂર્યકુમારે સાથી ખેલાડીઓ વિશે રસપ્રદ વાતો રજૂ કરી…
♦ અક્ષર પટેલને પડતા મૂકવામાં આવ્યો ત્યારે તે ગુસ્સે હતો
સૂર્યકુમારે એક ઘટનાનો ઉલ્લેખ કર્યો જ્યારે સ્પિન ઓલરાઉન્ડર અક્ષર પટેલ તેમના પર ખૂબ ગુસ્સે થયો હતો. ભારતીય કેપ્ટને કહ્યું, “અમે તેને બે મેચમાંથી બહાર રાખ્યો હતો. જ્યારે મેં તેને બહાર રાખવાનો નિર્ણય લીધો ત્યારે તે ખૂબ ગુસ્સે થયો હતો.
તે સમજી શકાય તેવી રીતે ગુસ્સે થયો હતો, કારણ કે તે એક સિનિયર ખેલાડી છે જેને IPL ફ્રેન્ચાઇઝીની કેપ્ટનશીપનો અનુભવ છે. મેં તેની માફી માંગી અને તેને કહ્યું કે આ નિર્ણય ટીમ માટે લેવામાં આવી રહ્યો છે.”
♦ સંજુ સેમસને પૂછ્યું, મને કહો કે તમે મારી પાસેથી શું ઈચ્છો છો
સૂર્યકુમાર યાદવે ઓપનર સંજુ સેમસન સાથેની તેમની ચર્ચાનો પણ ઉલ્લેખ કર્યો. તેમણે કહ્યું, “સંજુ મારી પાસે આવ્યો અને પૂછ્યું, `મને કહો કે ટીમ મારી પાસેથી શું ઇચ્છે છે?’
મેં કહ્યું, ‘અમે તે સંજુ સેમસન ઇચ્છીએ છીએ જેને અમે પહેલા વિરોધી ટીમોને તબાહ કરતા જોયો છે.” પછી, આખી ટીમને સંબોધતા તેમણે કહ્યું, “અમે અમારી પોતાની ઇચ્છાઓ પહેલાં ટીમની ઇચ્છાઓ અનુસાર રમીશું. ત્યારે જ અમે કંઈક ખાસ પ્રાપ્ત કરી શકીશું.”
