Colombo, તા. 21
ભારત અને શ્રીલંકા વચ્ચે શ્રેણીની બીજી ટેસ્ટ મેચ 23 ઓગસ્ટથી કોલંબોના સિંહલીઝ સ્પોર્ટ્સ ક્લબ (SSC) મેદાન પર રમાવાની છે. શ્રેણીમાં 1-0ની સરસાઈ મેળવી ચૂકેલી ભારતીય ટીમ બીજી ટેસ્ટ જીતીને શ્રીલંકાનો સફાયો કરવાના ઈરાદા સાથે મેદાનમાં ઉતરશે.
કોલંબોમાં ટેસ્ટ ક્રિકેટમાં ટીમ ઈન્ડિયા માટે સૌથી શ્રેષ્ઠ વ્યક્તિગત પ્રદર્શન મહાન બેટ્સમેન સચિન તેંડુલકરનું રહ્યું છે. તેમણે જુલાઈ 2010માં કોલંબોના સિંહલીઝ સ્પોર્ટ્સ ક્લબ (SSC) ગ્રાઉન્ડ પર શ્રીલંકા સામે શાનદાર 203 રનની ઐતિહાસિક ઈનિંગ રમી હતી, જે શ્રીલંકા સામે તેમનો સર્વોચ્ચ ટેસ્ટ સ્કોર છે.
ટીમ ઈન્ડિયાએ શ્રીલંકા સામે 2017માં રમી હતી ટેસ્ટ સિરીઝ
ટીમ ઈન્ડિયાએ શ્રીલંકા સામે શ્રીલંકામાં તેની છેલ્લી ટેસ્ટ સિરીઝ જુલાઈ-ઓગસ્ટ 2017માં રમી હતી, જેમાં ભારતે 3-0થી ક્લીન સ્વીપ કરીને જીત મેળવી હતી. હવે ફરી એકવાર 9 વર્ષ પછી ભારતીય ટીમ સિરીઝ ક્લીન સ્વીપ કરીને ઈતિહાસ રચવા ઈચ્છશે.
વિરાટ કોહલીની કેપ્ટન્સીમાં ટીમ ઈન્ડિયાની જીત
વર્ષ 2017માં વિરાટ કોહલીની આગેવાની હેઠળ રમતાં ટીમ ઈન્ડિયાએ શ્રીલંકાને એક ઈનિંગ્સ અને 53 રને હરાવ્યું હતું. આ મુકાબલામાં ભારતે પ્રથમ બેટિંગ કરતા 622 રન બનાવીને પોતાની પહેલી ઈનિંગ જાહેર કરી હતી અને શ્રીલંકાને ફોલોઓન રમવા માટે મજબૂર કર્યું હતું. રવિન્દ્ર જાડેજાએ આ ટેસ્ટમાં કુલ 7 વિકેટ ઝડપવાની સાથે-સાથે અણનમ અડધી સદી પણ ફટકારી હતી.
કોલંબોમાં ટીમ ઈન્ડિયાનો રેકોર્ડ
ભારતીય ટીમનો રેકોર્ડ કોલંબોના આ મેદાન પર મિશ્ર રહ્યો છે. ભારતે 1985થી લઈને અત્યાર સુધી આ મેદાન પર કુલ 9 ટેસ્ટ મેચ રમી છે, જેમાંથી ટીમને 3માં જીત મળી છે, જ્યારે 2 મેચમાં ભારતીય ટીમને હારનો સામનો કરવો પડ્યો છે. તો બીજી તરફ, 4 ટેસ્ટ મેચ ડ્રોમાં પરિણમી છે. જોકે, આ ગ્રાઉન્ડ પર રમાયેલી છેલ્લી ટેસ્ટમાં ભારતીય ટીમનું પ્રદર્શન લાજવાબ રહ્યું હતું.
પ્રથમ ટેસ્ટમાં મેળવી હતી ભવ્ય જીત
શ્રેણીની પહેલી ટેસ્ટમાં ભારતીય ટીમનું પ્રદર્શન શાનદાર રહ્યું હતું. શુભમન ગિલની આગેવાની હેઠળની ભારતીય ટીમે શ્રીલંકાને 165 રને હરાવ્યું હતું. ભારત તરફથી મળેલાં 372 રનનાં લક્ષ્યનો પીછો કરતી વખતે બીજી ઈનિંગમાં શ્રીલંકાની આખી ટીમ માત્ર 206 રન બનાવીને ઓલઆઉટ થઈ ગઈ હતી.
ભારત તરફથી બોલિંગમાં માનવ સુથારની સ્પિન બોલિંગનો જાદુ ચાલ્યો હતો અને તેણે બંને ઈનિંગ્સ મળીને કુલ 10 વિકેટ ઝડપી હતી. માનવે પહેલી ઈનિંગમાં 4 અને બીજી ઈનિંગમાં 6 વિકેટ લીધી હતી.
બીજી તરફ, બેટિંગમાં દેવદત્ત પડિક્કલે શાનદાર પ્રદર્શન કરતાં 167 રનની યાદગાર ઈનિંગ રમી હતી. પડિક્કલને તેની શ્રેષ્ઠ ઈનિંગ માટે ‘પ્લેયર ઓફ ધ મેચ’ પસંદ કરવામાં આવ્યો હતો. આ જીત સાથે ભારતે વર્લ્ડ ટેસ્ટ ચેમ્પિયનશિપ (WTC)ની ફાઇનલમાં પહોંચવાની પોતાની આશા પણ જીવંત રાખી છે.
