New Delhi તા. 8
યુગાન્ડાના ઈન્ટરનેશનલ ફૂટબોલ ખેલાડી ડેવિડ ઓવેરીની હત્યા કરવામાં આવી છે. 28 વર્ષનાં ઓવેરી દેશનાં સૌથી મોટા ફૂટબોલ ક્લબોમાંથી એક એવા `SC વિલા’ના કપ્તાન હતા.
સ્થાનીય પોલીસનાં જણાવ્યાં અનુસાર, મંગળવારે રાજધાની કંપાલાના એક ઉપનગરમાં અજાણ્યા હુમલાખોરોએ ઓવેરી પર હુમલો કરીને તેમને ગંભીર રીતે ઘાયલ કર્યા હતા.
રસ્તેથી પસાર થતા લોકોએ તેમને બેભાન અવસ્થામાં જોઈને તાત્કાલિક નજીકની હોસ્પિટલમાં પહોંચાડ્યા હતા, જ્યાંથી બીજી હોસ્પિટલમાં શિફ્ટ કર્યા બાદ તબીબોએ તેમને મૃત જાહેર કર્યા હતા.
ફેડરેશન ઓફ યુગાન્ડા ફૂટબોલ એસોસિએશને પોતાનાં નિવેદનમાં જણાવ્યું કે ડેવિડ માત્ર એક ફૂટબોલર નહોતાં, પરંતુ એક લીડર અને યુવાનો માટે પ્રેરણા સ્ત્રોત હતાં. જઈ વિલાના કપ્તાન તરીકે તેમણે સાહસ, નમ્રતા અને જુસ્સા સાથે ટીમનું નેતૃત્વ કર્યું હતું અને યુગાન્ડા ક્રેન્સ જર્સી પહેરીને દેશની આશાઓને આગળ વધારી હતી.
રમતજગતના અગ્રણીઓએ સોશિયલ મીડિયા પર પોસ્ટ કરીને તેમને ભાવભીની શ્રદ્ધાંજલિ અર્પણ કરી છે. ઓવેરીની ગોઝારી હત્યા અગાઉ જૂન મહિનામાં પણ કંપાલામાં જ એક લોકપ્રિય રગ્બી ખેલાડી સિડની ગોંગોડ્યોની ભીડ દ્વારા હુમલો કરીને હત્યા કરવામાં આવી હતી.
જેમને ભૂલથી ચોર સમજી લેવાયાં હતાં. નેશનલ કાઉન્સિલ ઓફ સ્પોર્ટ્સ યુગાન્ડાએ ચિંતા વ્યક્ત કરતાં કહ્યું કે દેશનું રમતજગત સતત આવી દુઃખદ ઘટનાઓનો ભોગ બની રહ્યું છે.
આ સમગ્ર મામલે સંસદનાં ડેપ્યુટી સ્પીકર થોમસ તયેબવાએ અધિકારીઓને દેશમાં સુરક્ષાનાં પડકારો સામે કડક પગલાં ભરીને ન્યાય અપાવવાની અપીલ કરી છે.
