Surendranagar,તા.18
સુરેન્દ્રનગર જિલ્લામાં મિલકત સંબંધી ગુનાઓ અટકાવવા અને વણઉકેલાયેલા ગુનાઓ શોધી કાઢવા માટે જિલ્લા પોલીસ વડા દ્વારા આપવામાં આવેલી ખાસ સૂચનાના આધારે લોકલ ક્રાઇમ બ્રાન્ચે કાર્યવાહી હાથ ધરી હતી.
બાતમીના આધારે વઢવાણ- લીંબડી હાઇવે રોડ પરથી ખેતરોમાંથી મોટર ચોરી કરતી ધ્રાંગધ્રાની એક શાતિર ગેંગના ત્રણ સાગરીતોને ઝડપી લીધા છે. આ ઓપરેશન દરમિયાન પોલીસે ચોરીના અલગ-અલગ 4 ગુનાઓ ડિટેક્ટ કરી કુલ રૂ.5,08,500નો મુદ્દામાલ રિકવર કર્યો છે.
સુરેન્દ્રનગર એલસીબી ટીમને ચોરીની મોટરો સાથે તસ્કરો ઇકો ગાડીમાં પસાર થઈ રહ્યા છે. બાતમીના આધારે પોલીસે વઢવાણ-લીંબડી હાઇવે પર વોચ ગોઠવીને ઇકો ગાડીને અટકાવી તલાશી લેતા તેમાંથી ચોરીનો મોટો જથ્થો મળી આવ્યો હતો.
પોલીસે ઘટનાસ્થળેથી ત્રણ શખ્સો અખતર ગફારભાઇ ભટ્ટી ખાટકીવાડ, મદીના મસ્જિદ પાસે, ધ્રાંગધ્રા, સમીરભાઇ અલ્તાફભાઇ મમાણી ખાટકીવાડ, મદીના મસ્જિદ પાસે, ધ્રાંગધ્રા,સમીરભાઇ યુનુશભાઇ ભટ્ટી ખાટકીવાડ, ધ્રાંગધ્રા પોલીસે આરોપીઓ પાસેથી ચોરી અને ગુનામાં વપરાયેલ ઇલેક્ટ્રિક દેડકા મોટર નંગ-10, ઇલેક્ટ્રિક વાયર આશરે 41 મીટર, ઇલેક્ટ્રિક દેડકા મોટર નંગ-1 તથા અન્ય સ્પેરપાર્ટ્સ, મોબાઇલ ફોન નંગ-3 કાર સહિત રૂ.5,08,500 નો મુદામાલ જપ્ત કરાયો હતો.
આ કાર્યવાહીમાં પી.આઈ. બી.એચ. શીંગરખીયા, પી.એસ.આઈ આર.જે. ગોહિલ, પેરોલ ફ્લો સ્ક્વોડના પી.એસ.આઈ.એન.એ. રાયમા તથા એલ.સી.બી ટીમ જોડાઇ હતી. ત્રણેય આરોપીઓને મુદ્દામાલ સાથે આગળની કાનૂની કાર્યવાહી માટે વઢવાણ પોલીસ સ્ટેશનને સોંપવામાં આવ્યા છે.
પકડાયેલા શખસોની પૂછપરછ દરમિયાન વઢવાણ પોલીસ સ્ટેશન, જોરાવરનગર પોલીસ સ્ટેશન, લખતર પોલીસ સ્ટેશન, ચુડા પોલીસ સ્ટેશન સુરેન્દ્રનગર જિલ્લાના અલગ-અલગ વિસ્તારના 4 ગુનાઓનો ભેદ ઉકેલાયો છે.
