London,તા.25
વિશ્વની સૌથી પ્રતિષ્ઠિત અને જૂની ટેનિસ ટૂર્નામેન્ટ પૈકીની એક ‘વિમ્બલ્ડન 2026’ ચેમ્પિયનશિપની શરૂઆત આગામી 29 જૂનથી થવા જઈ રહી છે. આ પ્રતિષ્ઠિત ટૂર્નામેન્ટમાં આ વર્ષે જેનિક સિનર અને આર્યના સબાલેન્કા જેવા દિગ્ગજ ખેલાડીઓ ટોપ સીડ્સ તરીકે મેદાને ઉતરશે.
જોકે, મેચ શરૂ થાય તે પહેલાં જ વિમ્બલ્ડનની પ્રીમિયમ વીઆઈપી સીટોની કિંમતોએ રમતજગતમાં નવો ઇતિહાસ રચી દીધો છે. ટૂર્નામેન્ટની સૌથી પ્રીમિયમ ગણાતી ‘સેન્ટર કોર્ટ’ ની સીટો માટેના ડિબેન્ચર્સ (ટિકિટ બોન્ડ) આ વર્ષે રેકોર્ડતોડ 5,10,000 અમેરિકી ડોલર (આશરે 3,80,000 પાઉન્ડ) ની કિંમતે વેચાયા છે, જે રમતગમતનાં ઇતિહાસની સૌથી મોંઘી ટિકિટોમાં સ્થાન પામે છે.
શું છે આ વિમ્બલ્ડન ડિબેન્ચર્સ અને તેની ખાસિયત?
અહીં એ સમજવું જરૂરી છે કે, સામાન્ય ટિકિટોની સરખામણીએ વિમ્બલ્ડન ડિબેન્ચર્સ એ એક પ્રકારનાં પ્રીમિયમ ટિકિટ બોન્ડ છે. આ ડિબેન્ચર ખરીદનાર ગ્રાહકને આગામી પાંચ વર્ષ સુધી વિમ્બલ્ડનની મુખ્ય સેન્ટર કોર્ટની પ્રાઇમ રો (સૌથી શ્રેષ્ઠ લાઈનો) માં સીટ મેળવવાની લેખિત ગેરંટી મળે છે, જ્યાંથી મેચનો અદભુત નજારો માણી શકાય છે.
આ સાથે જ ખરીદદારોને સ્ટેડિયમના ખાસ વીઆઈપી લાઉન્જમાં જવાની પણ વિશેષ સુવિધા મળે છે. માર્કેટના અહેવાલો અનુસાર, આ વર્ષની કિંમત 2024ની મૂળ ઇશ્યૂ પ્રાઇસ (1,16,000 પાઉન્ડ) કરતાં ત્રણ ગણી વધારે છે, જ્યારે ગયા વર્ષના ટ્રેડિંગ માર્કેટના ભાવની સરખામણીએ આ કિંમતો સીધી બમણી થઈ ચૂકી છે.
આ કમાણીમાંથી બનશે નવું આધુનિક સ્ટેડિયમ
વિમ્બલ્ડન ટૂર્નામેન્ટનું સંચાલન કરતી સંસ્થા ‘ઓલ ઇંગ્લેન્ડ લોન ટેનિસ ક્લબ’ માટે આ ડિબેન્ચર્સ વર્ષોથી ફંડ એકત્ર કરવાનો સૌથી મોટો સ્ત્રોત રહ્યાં છે. લગભગ એક સદી કરતાં પણ વધુ સમય પહેલાં જ્યારે આ ડિબેન્ચર્સ પહેલીવાર વેચવામાં આવ્યાં હતાં, ત્યારથી લઈને આજ સુધી આ ભંડોળનો ઉપયોગ સ્ટેડિયમની જાળવણી અને તેના વિસ્તાર માટે કરવામાં આવે છે.
ક્લબના સત્તાવાર પ્લાન મુજબ, આ વર્ષે ડિબેન્ચર્સના વેચાણમાંથી મળેલી રકમનો ઉપયોગ સ્ટેડિયમ પરિસરમાં નવા 39 ટેનિસ કોર્ટ ઉમેરવા અને એક અધ્યતન 8,000 બેઠકોની ક્ષમતા ધરાવતું નવું સ્ટેડિયમ તૈયાર કરવા માટે કરવામાં આવશે.
માત્ર ટેનિસનો રોમાંચ નહીં, પણ કમાણીનું મોટું સાધન
શ્રીમંત રોકાણકારો આ ડિબેન્ચર્સને માત્ર ટેનિસ જોવાનાં શોખ તરીકે નથી ખરીદતાં, પરંતુ તે એક અત્યંત નફાકારક એસેટ (મિલકત) તરીકે જોવામાં આવે છે. વિમ્બલ્ડનમાં આ એકમાત્ર એવી ટિકિટો છે જેને માલિકો કાયદેસર રીતે બજારમાં ટ્રેડ કરી શકે છે અથવા કોઈપણ ચોક્કસ દિવસની સીટ અન્ય વ્યક્તિને ઊંચા ભાવે વેચીને મોટો નફો મેળવી શકે છે.
જો આ પાંચ વર્ષનાં બોન્ડનું ગણિત માંડીએ તો ટૂર્નામેન્ટના દિવસો મુજબ આ સીટનો સરેરાશ ખર્ચ રોજનો અંદાજે 5,400 પાઉન્ડ જેટલો થાય છે. સામાન્ય ફેન્સ જ્યાં થોડાક સો પાઉન્ડની ટિકિટ માટે નસીબ કે લાંબી લાઈનો પર આધાર રાખે છે, ત્યાં અમીરો સીધા પૈસાના જોરે આ સીટો મેળવી લે છે. હાલમાં ઓપન માર્કેટમાં રીસેલર્સ દ્વારા મેન્સ ફાઇનલ મેચ માટે સેન્ટર કોર્ટની બે સીટોની કિંમત અંદાજે 23,000 પાઉન્ડ સુધી બોલાઈ રહી છે.
