New Delhi, તા.23
નેશનલ ડિઝાસ્ટર મેનેજમેન્ટ ઓથોરિટી (NDMA)ની મોબાઇલ ફોન બ્રોડકાસ્ટ અર્લી વોર્નિંગ મેસેજ સિસ્ટમ ભવિષ્યમાં અનેક નવી ભૂમિકાઓ ભજવી શકે છે. જરૂરિયાત મુજબ આ સિસ્ટમ આતંકવાદીઓ, ગેંગસ્ટરો અને અન્ય ગુનેગારોને પકડાવવામાં `સુપર કોપ’ની ભૂમિકા ભજવી શકે છે.
ઉપરાંત, ગુમ થયેલા બાળકો, વૃદ્ધો અને અન્ય વ્યક્તિઓને શોધવામાં `દેવદૂત’ સમાન સાબિત થઈ શકે છે. તે ડિમેન્શિયા(ભૂલકણાપણું)થી પીડાતા વૃદ્ધોને તેમના પરિવારો સાથે ફરીથી જોડવામાં પણ ખાસ મહત્વપૂર્ણ ભૂમિકા ભજવશે.
અધિકારીઓએ જણાવ્યું હતું કે, ભવિષ્યમાં જરૂરિયાત મુજબ આ બ્રોડકાસ્ટ એલર્ટ સિસ્ટમમાં નવા ફીચર્સ ઉમેરવામાં આવી શકે છે. તેના હેઠળ કોઈ વ્યક્તિ ગુમ થાય તો તેની તસવીર સાથેનો સંદેશ તેના સ્થાનથી 5થી 7 કિલોમીટરના વિસ્તારમાં રહેતા તમામ લોકોના મોબાઇલ ફોન પર મોકલી શકાશે. આથી ગુમ થયેલી વ્યક્તિને ખૂબ ઓછા સમયમાં શોધી કાઢવી સરળ બનશે.
આ ઉપરાંત, મોસ્ટ વોન્ટેડ આતંકવાદીઓ અને ગેંગસ્ટરોની તસવીરો સાથે પણ લોકોને મોબાઇલ પર સંદેશ મોકલી શકાય છે કે પોલીસ તેમને શોધી રહી છે. આવી સ્થિતિમાં આ સિસ્ટમ પોલીસ માટે અત્યંત ઉપયોગી સાબિત થશે.
જો કોઈ ગેંગસ્ટર અથવા ખતરનાક ગુનેગાર પોલીસ કસ્ટડી અથવા જેલમાંથી ફરાર થઈ જાય, તો તેની તસવીર અને માહિતી સાથેનો સંદેશ લોકોના મોબાઇલ ફોન પર મોકલી શકાશે. પરિણામે, ફરાર ગુનેગારને ઝડપથી શોધી પકડવામાં મદદ મળશે.
ડિસ્પ્લે બોર્ડ પર પણ ચેતવણી સંદેશાઓ દેખાશે
અધિકારીઓના જણાવ્યાનુસાર, આ ચેતવણી સંદેશ સિસ્ટમ, મોટા અવાજ સાથે, ઘણા દેશોમાં પહેલાથી જ કાર્યરત છે. તે ભારતમાં લાગુ કરવામાં આવી રહી છે. અપગ્રેડને કારણે તેને હાલ પૂરતું સ્થગિત કરવામાં આવ્યું છે. તે થોડા દિવસોમાં ફરી શરૂ થશે. ભવિષ્યમાં, આ સિસ્ટમ લોકોના મોબાઇલ ફોન ઉપરાંત, રેલ્વે સ્ટેશનો પર ડિસ્પ્લે બોર્ડ પર પણ સંદેશાઓ પ્રદર્શિત કરી શકે છે.
