America,તા.29
ઇરાનમાં અર્ધ સૈનિક દળ, રિવોલ્યુશનરી ગાર્ડ કોર્પ્સે અમેરિકાના હવાઈ હુમલાના જવાબમાં બહેરિન અને કુવૈતને નિશાન બનાવી રવિવારે ડ્રોન અને મિસાઈલ્સ હુમલા કર્યા હતા, સાથે અમેરિકાને ધમકી આપી હતી કે, જો હુમલા તમે ચાલુ રાખશો તો શાંતિ મંત્રણા સંપૂર્ણ રીતે બંધ થઈ જશે.
ઇરાન-અમેરિકા વચ્ચે ફરી તંગદિલી વ્યાપી : હોર્મુઝમાં એક શિપને નિશાન બનાવ્યા પછી અમેરિકાના ઇરાની સૈન્ય મથકો પર હુમલા
બહેરિન અને કુવૈત પર ઇરાને તેવે સમયે હુમલા કર્યા છે કે જ્યારે અમેરિકી નૌ-સેનાની દેખરેખ નીચે કામ કરતી એક બહુરાષ્ટ્રીય સમુદ્રીય સંસ્થાએ શનિવારે કહ્યું હતું હોર્મુઝ સ્ટ્રેઈટ્સમાં ઓમાન તરફનો એક માર્ગ વિસ્તારવામાં આવશે, જેથી તે ખાડીમાં પ્રવેશનારી અને બહાર નીકળનારી સ્ટીમરોની આવજા થઈ શકે.
આ પગલું ઇરાન સાથેની ટક્કરનું એક નવું કારણ ઊભું કરી શકે તેમ છે. અમેરિકા-ઇરાન વચ્ચેનું યુદ્ધ પૂરું કરવા માટે થયેલી વચગાળાની સમજૂતીમાં હોર્મુઝ સ્ટ્રેઈટસમાંથી જહાજોનાં આવન-જાવન ફરી શરૂ કરવાની વાત છે. પરંતુ સંયુક્ત રાષ્ટ્રની એક એજન્સીનાં સમર્થનથી રચેલા ઓમાન માર્ગ ઉપર થઈ પસાર થતાં જહાજો ઉપર ઇરાને બે વાર હુમલા કર્યા. અમેરિકા અને ખાડી દેશોનાં આરબ રાષ્ટ્રોના વિરોધ છતાં ઇરાનનું કહેવું છે કે તે મહત્વના માર્ગ ઉપર તેનું જ નિયંત્રણ હોવું જોઈએ.
એક સમયે દુનિયાનાં તેલ અને કુદરતી ગેસનો પાંચમો ભાગ હોર્મુઝમાંથી જ પસાર થતો હતો. યુએસ સેન્ટ્રલ કમાન્ડે રવિવારે સવારે કહ્યુ ંહતું કે શનિવારે સવારે હોર્મુઝ સ્ટ્રેઈટ પાસેથી પસાર થયેલાં એક જહાજ ઉપર ઇરાને હુમલો કર્યો હતો.
આ પછી અમે ઇરાની સૈન્યની રેડાર-પદ્ધતિઓ, સંચાર-પ્રણાલી, હવાઈ સલામતી વ્યવસ્થા ડ્રોન ભંડારનાંસ્થળો તથા બારૂદી સુરંગ પાથરવાની ક્ષમતાઓને નિશાન બનાવ્યાં હતાં. આ પછી ડોનાલ્ડ ટ્રમ્પે ઇરાનને ચેતવણી આપતાં કહ્યું હતું કે હવે એવો સમય આવી રહ્યો છે કે જેમાં અમેરિકા માટે સંયમ રાખવો સંભવ નથી. તે સૈન્ય કાર્યવાહી માટે મજબૂર થશે. તેમણે ટ્રૂથ સોશ્યલ પર લખ્યું છે કે જો આમ થશે તો ઇસ્લામી ગણરાજ્ય ઇરાનનું અસ્તિત્વ જ સમાપ્ત થઈ જશે.
આ પછી ઇરાનનાં ઇસ્લામિક રીવોલ્યુશનરી ગાર્ડઝે વળતી ધમકી આપતાં કહ્યું હતું કે દુશ્મનને તે ખબર પડવી જ જોઈએ કે યુદ્ધવિરામનું ઉલ્લંઘન આવી રહેલી શાંતિ-મંત્રણાને સંપૂર્ણ રીતે બંધ કરાવી દેશે.
