Ahmedabad,તા.૩૦
નવેમ્બર એન્ડથી જ શિયાળાની શરૂઆત થઈ ગઈ છે. ઉત્તર પૂર્વના પવનો ફૂંકાવાના કારણે વારંવાર તાપમાનમાં વધારો-ઘટાડો જોવા મળી રહ્યો છે. આ દરમિયાન અંબાલાલ પટેલે આગાહી આપી છે.
રાજ્યમાં નવેમ્બર મહિનામાં તાપમાન સામાન્ય કરતા વધી રહ્યું છે. જેના કારણે બેવડી ઋતુનો અનુભવ થઈ રહ્યો છે. જોકે નવેમ્બર એન્ડમાં શિયાળાની શરૂઆત થઈ ગઈ છે. ઉત્તર પૂર્વના પવનો ફૂંકાવાના કારણે વારંવાર તાપમાનમાં વધારો-ઘટાડો જોવા મળી રહ્યો છે. વેસ્ટર્ન ડિસ્ટર્બન્સ ન આવવાના કારણે તાપમાન પણ વધી રહ્યું છે. જોકે, ડિસેમ્બરના ગુજરાતમાં ઉત્તરના પવનો ફૂંકાવાના કારણે લઘુતમ તાપમાન રહે છે અને ઠંડી અનુભવાય છે. જ્યારે નિષ્ણાતોનું માનવું છે કે ડિસેમ્બરના પહેલા અઠવાડિયામાં પણ શીત લહેરની કોઈ શક્યતા નથી.
હવામાન નિષ્ણાત અંબાલાલ પટેલે આગાહી આપતા જણાવ્યું છે કે, હાલ તો દક્ષિણ-પશ્ચિમ બંગાળની ખાડીમાં ફેંગલ વાવાઝોડું સક્રિય છે. જેની અસર ઉત્તર તામિલનાડુથી લઈને પોડુચેરી સુધી રહેશે અને ભારે વરસાદ પણ થશે. આ સાથે દક્ષિણ ભારતમાં પણ તેની અસર જોવા મળશે. જેમાં બંગાળનો ઉપસાગર અને અરબી સમુદ્રની સિસ્ટમને કારણે ૪ ડિસેમ્બરથી ૮ ડિસેમ્બર આસપાસ દક્ષિણ મહારાષ્ટ્રમાં વરસાદની સંભાવના રહેશે ત્યારે દક્ષિણ ગુજરાતના વાતાવરણમાં પણ પલટો આવવાની શક્યતા છે.અંબાલાલ પટેલે વધુમાં જણાવતા કહે છે કે, ડિસેમ્બરના પહેલા અઠવાડિયામાં રાજ્યમાં કોઈ શીત લહેરની સંભાવના નથી. છતાં પણ ઉત્તર ગુજરાતના ભાગોમાં ૧૨ ડિગ્રી જેટલું ઓછું તાપમાન રહેવાની શક્યતા છે. ૮ ડિસેમ્બરથી લઈને ૧૦ ડિસેમ્બર વચ્ચે લઘુત્તમ તાપમાન ૧૫ થી ૧૬ ડિગ્રી વચ્ચે રહી શકે છે. ત્યારે ૪ ડિસેમ્બરથી વાદળછાયું વાતાવરણ રહેશે. જેના કારણે તાપમાન વધવાની સંભાવના છે. ૪થી ૮ ડિસેમ્બર દરમિયાન અરબી સમુદ્રમાં ડિપ્રેશન બની શકે છે. જેના કારણે વાતાવરણમાં પલટો આવવાની શક્યતા છે.
