gujrat,તા.11
ગુજરાતમાં લોકસભા ચૂંટણીના ધમધમાટ બાદ હવે મીની ધારાસભા ચૂંટણી ખેડા અને બનાસકાંઠા જીલ્લા પંચાયત, 80 નગરપાલિકા અને 17 તાલુકા પંચાયત તથા 539 જેટલી નવી અસ્તિત્વમાં આવેલી 4765 ગ્રામ્ય પંચાયતની ચુંટણી માટે હવે ગમે તે સમયે જાહેરનામું બહાર પડી જશે.
જાન્યુઆરી માસમાં આ ચૂંટણીઓ યોજાશે અને રાજયમાં પ્રથમ વખત 27% ઓબીસી અનામતની જોગવાઈ સાથે આ ચૂંટણી યોજાવાની છે અને તેથી ભાજપનું ઓબીસી કાર્ડ પણ કસોટીએ હશે. માઈક્રોલેવલે યોજાતી આ ચુંટણીમાં જ્ઞાતિ-જાતિ સમુદાય વિગેરે મહત્વના ફેકટર છે.
તેથી તેમાં ઓબીસી જે વસતિના 50% આસપાસ હોવાનો અંદાજ છે તે પણ કેવું અસરકારક હશે તે પ્રશ્ન છે. ભાજપે તેની તૈયારીના ભાગરૂપે દરેક જીલ્લા પ્રભારી મંત્રીઓ તથા પક્ષના સંગઠન-જીલ્લા પ્રભારીઓને તેમના જીલ્લાઓની જવાબદારી સોંપી છે.
ભાજપ એક તરફ તાલુકા કક્ષાએ સંગઠન નવરચના પણ કરી રહ્યું છે તેથી તાલુકા ભાજપ પ્રમુખોની નિયુક્તિ-ગ્રામ્ય-પંચાયત તાલુકાઓની ચુંટણીઓ વિ. પ્રક્રિયા સમાંતર ચાલે કે હાલ જે સંગઠન બ્રેક લગાવાઈ છે તે લાંબી ચાલશે તે પ્રશ્ન છે.
બીજી તરફ વિધાનસભા ચૂંટણીમાં કોંગ્રેસને જે રીતે જબરી પછડાટ લાગી અને માંડ 17 બેઠકો જીત્યા બાદ પણ પાંચ ધારાસભ્યોના પક્ષાંતર અને હાલમાં વાવ પેટાચૂંટણીમાં પરાજય પછી તેને ગ્રામીણ કક્ષાએ ફરી તેનું અસ્તિત્વ બચાવવા આ ચૂંટણી મહત્વની છે.
ખાસ કરીને ગ્રામીણ ક્ષેત્રમા હજું પણ કોંગ્રેસનું અસ્તિત્વ છે. તેને પુન: જીવિત કરીને આગામી ધારાસભા ચૂંટણી માટે સંગઠન સહિતની નવરચનામાં પણ કોંગ્રેસ માટે તક છે.
પક્ષનું સંગઠન માળખુ પણ ‘એડહોક’ છે તો ગ્રામીણ સહિતના ક્ષેત્રોની સમસ્યાઓનો કોઈ અંત જ નથી. આથી કોંગ્રેસ તેના મુદાઓ ઉઠાવીને પછી તેના આધારે ભાજપને ટકકર આપી તેને અસ્તિત્વ મજબૂત કરવા માટે તક મળી શકે છે. રાજય વિધાનસભાનું સત્ર ફેબ્રુઆરીના મધ્યથી શરૂ થશે અને તે પુર્વે સમગ્ર પ્રક્રિયા પુરી કરવા માટે ચુંટણીપંચ આગળ વધી રહ્યું છે.
