Surat, તા.8
ગુજરાતમાં ખાસ કરીને દક્ષિણ ગુજરાતમાં મેઘતાંડવની હાલત યથાવત રહી હોય તેમ જુદા-જુદા તાલુકાઓમાં 18 ઇંચ સુધીનો વરસાદ નોંધાયો હતો. છેલ્લા 24 કલાકમાં 195 તાલુકામાં વરસાદ હતો. આજે સવારે પણ વલસાડ સહિતના જિલ્લાઓમાં વરસાદી દોર જારી રહ્યો હતો.
સ્ટેટ ઇમરજન્સી ઓપરેશન સેન્ટરના રીપોર્ટ પ્રમાણે સુરતના પલસાણામાં સૌથી વધુ 18.19 ઇંચ પાણી વરસ્યું હતું. કામરેજમાં 17.4 ઇંચ વરસાદ હતો. સુરત શહેરમાં 14.09 ઇંચ ખાબક્યો હતો. નવસારીમાં 15.28 ઇંચ, વલસાડના કપરાડામાં 12.68 ઇંચ, નવસારીના જલાલપોરમાં 11.02 ઇંચ વરસાદ હતો. તાપી, ડાંગ, ભરૂચ, નર્મદા સહિત દક્ષિણ ગુજરાતના જિલ્લાઓમાં ધોધમાર વરસાદ હતો.
ડાયમંડ સીટી તરીકે ઓળખ ધરાવતું સુરત ફલડ સીટી બની ગયાનું ચિત્ર સર્જાયું હતું. મુખ્ય માર્ગો પર કેડસમા પાણી ભરાયા હતા. વાહનોને પણ પસાર થવાનું મુશ્કેલ થઇ ગયું હતું.
જળબંબાકારની સ્થિતિમાં બોટ ચલાવીને ફસાયેલા લોકોને રેસ્ક્યૂ કરવામાં આવ્યા હતા. સમગ્ર શહેરમાં ચારેકોર પાણી હતું. શહેરમાંથી પસાર થતી પાંચમાંથી ચાર ખાડી ઓવરફ્લો થતાં સ્લમ વિસ્તારથી માંડીને પોશ વિસ્તારોમાં જળબંબાકારની હાલત થઇ હતી.
સુરતમાં અનરાધાર વરસાદનો 85 વર્ષ જુનો રેકોર્ડ તૂટ્યો હતો. 1941માં જુલાઇ મહિનામાં 18 ઇંચ વરસાદ થયાનો રેકોર્ડ હતો. મેઘરાજાએ સુરતની સૂરત બગાડી નાખી હોય તેમ એકપણ વિસ્તાર જળબંબાકારની સ્થિતિમાંથી બાકાત રહ્યો નહતો. ફસાયેલા લોકોને બચાવવા ટ્રેક્ટર તથા ડમ્પરનો ઉપયોગ કરવામાં આવ્યો હતો.
વરસાદી દોર જારી રહેવાની આશંકા વચ્ચે આજે સુરત, વલસાડ તથા નવસારીમાં શાળા-કોલેજોમાં રજા જાહેર કરવામાં આવી હતી. સુરતની કાપડ બજાર પણ આજે બંધ રાખવાનું એલાન કરવામાં આવ્યું હતું.
વરસાદી દુર્ઘટના રોકવા તથા રેસ્ક્યુ કામગીરી માટે એનડીઆરએફ તથા એસડીઆરએફની 7 ટીમો ઉતારવામાં આવી હતી. 3400 લોકોનું રેસ્ક્યુ કરાયું હતું. ઝાડ પડવાથી બે, વિજ કરંટથી ચાર, પાણીમાં ડુબવાથી બે અને તણાઇ જવાથી એક સહિત કુલ નવ લોકોના મૃત્યુ નિપજ્યા હતા.
સુરત ઉપરાંત નવસારી તથા વલસાડમાં પણ હાલત ગંભીર જ બની રહી હતી. વહીવટીતંત્ર એક્શનમાં હતું. આવતા દિવસોમાં વધુ ભારે વરસાદની આગાહીને પગલે રેસ્ક્યુ ટીમોને સ્ટેન્ડ-ટુ રાખવામાં આવી હતી.
