સ્ટેન્ડિંગ કમિટીની મંજૂરી બાદ મહાનગરપાલિકા ટૂંક સમયમાં ટેન્ડર પ્રક્રિયા શરૂ કરશે, લાખો મુલાકાતીઓ માટે સુવિધાઓનું આયોજન કરાશે
(નયના દવે દ્વારા)
Jamnagar તા.25
જામનગર શહેરના પ્રદર્શન મેદાન ખાતે આગામી ૧ સપ્ટેમ્બરથી ૧૧ સપ્ટેમ્બર સુધી અગિયાર દિવસીય શ્રાવણી મેળાનું આયોજન કરવામાં આવશે. આ અંગેનો નિર્ણય શુક્રવારે સાંજે યોજાયેલી જામનગર મહાનગરપાલિકાની સ્ટેન્ડિંગ કમિટીની બેઠકમાં લેવામાં આવ્યો હતો. સ્ટેન્ડિંગ કમિટીએ મેળાના આયોજનને સૈદ્ધાંતિક મંજૂરી આપતાં હવે આગામી દિવસોમાં ટેન્ડર પ્રક્રિયા હાથ ધરી સમગ્ર આયોજનને અંતિમ સ્વરૂપ આપવામાં આવશે.
જામનગર મહાનગરપાલિકા દ્વારા દર વર્ષે શ્રાવણ માસ દરમિયાન પરંપરાગત રીતે શ્રાવણી મેળાનું આયોજન કરવામાં આવે છે. વર્ષોથી યોજાતો આ મેળો શહેર તેમજ જિલ્લાના લોકો માટે આકર્ષણનું કેન્દ્ર રહ્યો છે. દર વર્ષે મોટી સંખ્યામાં લોકો પરિવાર સાથે મેળાની મુલાકાત લેતા હોવાથી આ વર્ષે પણ મોટી જનમેદની ઉમટે તેવી શક્યતાને ધ્યાનમાં રાખીને આયોજન કરવામાં આવી રહ્યું છે.
સ્ટેન્ડિંગ કમિટીની મંજૂરી બાદ મહાનગરપાલિકા દ્વારા મેળાના સંચાલન માટે ખુલ્લી ટેન્ડર પ્રક્રિયા હાથ ધરવામાં આવશે. ટેન્ડર પ્રક્રિયા પૂર્ણ થયા બાદ મેળાના સંચાલકની પસંદગી કરવામાં આવશે અને ત્યારબાદ પ્રદર્શન મેદાન ખાતે વિવિધ પ્રકારની તૈયારીઓ શરૂ કરવામાં આવશે. મેળામાં મનોરંજનની રાઇડ્સ, બાળકો માટેના રમૂજી સાધનો, વિવિધ વેપારી અને ખાણીપીણીના સ્ટોલ સહિત અન્ય આકર્ષણો ઉભા કરવામાં આવશે.
મહાનગરપાલિકા દ્વારા મેળામાં આવતા મુલાકાતીઓની સુવિધા અને સલામતીને પ્રાથમિકતા આપવામાં આવશે. પાર્કિંગ, પીવાના પાણી, સ્વચ્છતા, પ્રકાશ વ્યવસ્થા, અગ્નિશામક સુરક્ષા, આરોગ્ય સુવિધા, વાહનવ્યવહારનું સુનિયોજન તેમજ ભીડ નિયંત્રણ માટે જરૂરી વ્યવસ્થાઓ પણ કરવામાં આવશે. વિવિધ વિભાગો સાથે સંકલન કરીને મેળાનું આયોજન સુવ્યવસ્થિત રીતે થાય તે માટે આગોતરી કામગીરી શરૂ કરવામાં આવશે.
શ્રાવણી મેળો માત્ર મનોરંજન પૂરતો મર્યાદિત ન રહી સ્થાનિક વેપારીઓ અને નાના ધંધાર્થીઓ માટે પણ રોજગારી અને વેપારની તક ઊભી કરતો હોવાથી શહેરના આર્થિક પ્રવાહને પણ વેગ મળે છે. દર વર્ષની જેમ આ વર્ષે પણ શ્રાવણી મેળો શહેરના નાગરિકો માટે ઉત્સવનું મુખ્ય આકર્ષણ બનશે તેવી અપેક્ષા વ્યક્ત કરવામાં આવી રહી છે.
