રૂ.૬૪.૪૯ લાખના અનધિકૃત વ્યવહારો કરાયા ખાતા ખોલાવી કમિશન મેળવી સાગરીતને કિટ સહિત ખાતા સોંપ્યાનો આક્ષેપ
(નયના દવે દ્વારા)
Jamnagar તા.૧૦ઃ
જામનગર સાયબર ક્રાઇમ પોલીસે ઓનલાઈન છેતરપિંડીના નાણાંની હેરાફેરી માટે પોતાના નામે બેંક ખાતા ખોલાવી સાગરીતને ખાતાની કિટ સહિત આપી કમિશન મેળવનાર નવ શખ્સો સામે ગુનો નોંધ્યો છે. પોલીસે તપાસ દરમિયાન આશરે રૂ.૬૪,૪૯,૬૯૯ના અનધિકૃત નાણાકીય વ્યવહારો થયાનું સામે આવતાં કાર્યવાહી હાથ ધરી છે.
સાયબર ક્રાઇમ પોલીસ સ્ટેશનમાં પોલીસ કોન્સ્ટેબલ કારૂભાઈ ડાડુભાઈ વસરાએ સરકાર તરફે ફરિયાદ નોંધાવી હતી. ફરિયાદ મુજબ, સાયબર ગઠિયાઓ દ્વારા બેંક ખાતા ધારકોને કમિશન આપી તેમના ખાતામાં ઓનલાઈન છેતરપિંડીથી મેળવેલા નાણાં જમા કરાવી ગેરકાયદેસર આર્થિક વ્યવહારો કરવાની પ્રવૃત્તિ સામે કાર્યવાહી કરવા પોલીસને સૂચના આપવામાં આવી હતી.આ અંગે પોલીસે રાષ્ટ્રીય સાયબર ક્રાઇમ રિપોર્ટિંગ પોર્ટલ તેમજ સમન્વય પોર્ટલ ઉપર મળેલી માહિતીના આધારે શંકાસ્પદ ખાતાઓની તપાસ કરી હતી. પોસ્ટ ઓફિસ જામનગર ડિવિઝનના બેંક ખાતાઓના કેવાયસી દસ્તાવેજો તથા સ્ટેટમેન્ટનું વિશ્લેષણ કરતાં અનધિકૃત વ્યવહારો મળી આવ્યા હતા. પોર્ટલ ઉપર મળેલી ફરિયાદોમાં પણ જામનગર જિલ્લાના કેટલાક વ્યક્તિઓ પોતાના નામે ખાતા ખોલાવી પોતાના મળતિયાઓને ખાતાની કિટ સહિત સોંપી કમિશન મેળવતા હોવાનું સામે આવ્યું હતું.
ફરિયાદમાં યાસ્મીન ઇસાકભાઈ પીઠડિયા સહિત ફરવાન મુસ્તાકભાઈ પાંઢડીયા, જમીર વલીમામદ ઠાસરીયા, અમીન મહમદ બ્લોચ, અબરાર સુલેમાન ઓડીયા, સાહિત્ય સાજીદ માડકીયા, અલ્તાફ સુલેમાનભાઈ ઓડીયા, સાજીદ સતારભાઈ માડકીયા તથા આતીક ઉર્ફે આતીફ યાકુબભાઈ માડકીયાના નામ આરોપી તરીકે દર્શાવવામાં આવ્યા છે.
પોલીસના જણાવ્યા મુજબ, આરોપીઓએ પૂર્વઆયોજિત ગુનાહિત કાવતરું રચી એકસમાન ઈરાદાથી ખોટી ઓળખ ઊભી કરી સાયબર છેતરપિંડી માટે બેંક ખાતાઓ ખોલાવ્યાં હતાં. ત્યારબાદ ખાતા સહઆરોપી આતીક ઉર્ફે આતીફ યાકુબભાઈ માડકીયાને કિટ સહિત સોંપી દરેક ખાતા દીઠ અલગ-અલગ કમિશન મેળવ્યું હોવાનું ફરિયાદમાં જણાવાયું છે. આ ખાતાઓ મારફતે લોકો સાથે છેતરપિંડીથી મેળવેલા નાણાંના વ્યવહારો કરી નાણા સગેવગે કરવામાં આવ્યા હોવાનો આક્ષેપ છે. પોલીસે ભારતીય ન્યાય સંહિતાની કલમ ૩૧૮(૪), ૧૧(૨), ૩(૫), ૫૪ તથા માહિતી પ્રૌદ્યોગિકી અધિનિયમની કલમ ૬૬(ડી) હેઠળ ગુનો નોંધી વધુ તપાસ હાથ ધરી છે.
