હરીપરથી વંડા અને વીજપડીથી વાંકુનીધાર સુધી વરસાદી માહોલ
(મિલાપ રૂપારેલ દ્વારા)
Amreli તા.૧૦ઃ
અમરેલી જિલ્લામાં લાંબા સમયથી વરસાદ ખેંચાતા ચિંતામાં મુકાયેલા અમરેલી જિલ્લાના ખેડૂતો માટે આજે ગુરુવારે વરસાદી માહોલ આશાનું કિરણ લઈને આવ્યો હતો. જિલ્લામાં સતત બીજા દિવસે અનેક વિસ્તારોમાં વરસાદી ઝાપટાં પડતાં વાતાવરણમાં ઠંડક પ્રસરી હતી. ખાસ કરીને ખાંભા તાલુકાના વાંકુનીધાર પંથકમાં અનરાધાર વરસાદ વરસતાં અંદાજે દોઢથી બે ઈંચ જેટલો વરસાદ નોંધાયો હોવાનું જાણવા મળ્યું હતું. ભારે વરસાદના પગલે નદી-નાળામાં નવા નીર આવ્યા હતા અને ખેડૂતોમાં ખુશીની લહેર જોવા મળી હતી.
અમરેલી જિલ્લાના અનેક ગામોમાં બપોર બાદ અચાનક વાતાવરણમાં પલટો આવ્યો હતો. લીલીયા તાલુકાના હરીપર ગામે ઘોઘમાર વરસાદ પડતાં રસ્તાઓ પર પાણી ફરી વળ્યાં હતાં. બીજી તરફ સાવરકુંડલા તાલુકાના વંડા ગામે પણ ધોધમાર વરસાદ વરસ્યો હતો. સાવરકુંડલાના મહુવા રોડ પંથકમાં આવેલા વીજપડી અને ખડસલી સહિતના ગામોમાં સતત બીજા દિવસે હળવાથી મધ્યમ વરસાદી ઝાપટાં પડતાં ગરમી અને બફારામાંથી લોકોને રાહત મળી હતી.
સાવરકુંડલા તાલુકાના નેસડી, મેવાસા, શેલણા, મોટા ભમોદરા સહિતના ગામોમાં પણ બપોર બાદ વરસાદનું આગમન થયું હતું. વરસાદી માહોલ સર્જાતા લાંબા સમયથી વરસાદની કાગડોળે રાહ જોઈ રહેલા ખેડૂતોમાં આશા બંધાઈ છે. ખાસ કરીને વરસાદ ખેંચાતા જ્યાં પાકને પાણીની તાતી જરૂરિયાત ઊભી થઈ હતી, તેવા વિસ્તારોમાં વરસાદી ઝાપટાંથી ખેડૂતોને થોડી રાહત મળી છે.
ખાંભા તાલુકાના ગીરકાંઠાના અનિડા, ભાડ અને મોટા સમઢિયાળા સહિત આસપાસના વિસ્તારોમાં પણ વરસાદ પડ્યો હતો. જ્યારે ધારી તાલુકાના વીરપુર, ઈંગોરાળા પંથકમાં પણ વરસાદી ઝાપટાં પડતાં ખેડૂતોમાં ખુશી છવાઈ હતી.
ખાંભા તાલુકાના વાંકુનીધાર વિસ્તારમાં વરસાદે જોર પકડતાં ટૂંકા ગાળામાં અંદાજે ૧.૫ થી ૨ ઈંચ જેટલો વરસાદ વરસ્યો હોવાનું જાણવા મળ્યું છે. ભારે વરસાદના પગલે સ્થાનિક નદી-નાળામાં પાણીનો પ્રવાહ વધ્યો હતો અને કેટલાક સ્થળોએ પૂર જેવી સ્થિતિ જોવા મળી હતી. લાંબા વિરામ બાદ નોંધપાત્ર વરસાદ થતાં ગ્રામ્ય પંથકમાં પણ આનંદનો માહોલ જોવા મળ્યો હતો.
છેલ્લા ઘણા સમયથી વરસાદ ખેંચાતા અમરેલી જિલ્લાના અનેક ગામોમાં ખેડૂતો મુશ્કેલીમાં મુકાયા હતા. વાવેતર કરેલા પાકને પૂરતા પાણીની જરૂરિયાત ઊભી થઈ હતી ત્યારે સતત બીજા દિવસે વિવિધ પંથકોમાં વરસાદી ઝાપટાં પડતાં હવે મેઘરાજા મહેરબાન થશે તેવી ખેડૂતોમાં આશા જાગી છે.જોકે જિલ્લામાં વરસાદનું વિતરણ અલગ-અલગ વિસ્તારોમાં અલગ રહ્યું છે. કેટલાક ગામોમાં ધોધમાર વરસાદ પડ્યો છે તો કેટલાક વિસ્તારોમાં માત્ર હળવા ઝાપટાં જ પડ્યા છે. તેમ છતાં લાંબા વિરામ બાદ પડેલા વરસાદથી જગતના તાતમાં ફરી એકવાર આશાનો સંચાર થયો છે અને ખેડૂતો હવે આગામી દિવસોમાં સારો વરસાદ થાય તેવી મીટ માંડીને બેઠા છે.
